[بابكر مخير]

التوفير
دي بقى من محاسن الكُبر...
1) ندر ما يكون عندك نفس تأكل يعني في اليوم ربما تكون وجبة واحدة وممكن ما تتم ليه وجبة كاملة... نقدر أنهو الوجبة ونقول بالدولار حد أدنى 5 دولار وهن تلاتة وجبات "فطور، غدآ وعشآ" يعني خمستاشر منهم بتوفر عشرة وفي الشهر تولتمية دولار بدلن من الاربعمية وخمسين الكان ممكن ينصرفن..
2) السكري وهنا دافع وسبب حاسم في توفير حق السكر لأنك ممنوع تتناولهو ولو درتا بتلقى أولاد الحلال البيقيفوا مانعيين لك التمتع بحلاوة الشئ كان إن شاء الله عصير فراولة
3) الإمتناع عن تناول المنبهات من ناس شاي وقهوة ما مع الضغط وين. وخاصة لو الزول بتااع مزاج فهو قطعن ما محتاج لي حاجة تضبط الرأس لأنهو الدوشة ولفت الرأس الطوالي دي بتكفي "مش بيقولوا ليك لمن تسف راسك بيلف ولا لو ضربت سجارة تخليك محلق لاك في الواطة ولا في السمآ ولمن تشرب ليك كأس تورجغ وتهضرب وتملى الكون نقة"
4) الترفيه دآ طبعن في سيستم الزول الكبر ما عندهو فجة ولا فرقة بس ملازماهو القرفآ، ما طوالي أوجاع وألم ودبرسة وزهج مما يعني حتى لو قلت ترفه تلقى أنه الترفيه يزيد في الملل ومحتاج لي طاقة، مشي لمكان الترفيه ولا القعدة في محل التريه ولا تحمل الأصوات وشفتا الناس والناس يشوفوك وإتا مركب ومركعب ومبشتن، ضهرك معوج ورجلين يكعلبن و و وهلما جرآ
5) التسوق من ملابس ولا روائح ولا شفرات حلاقة وناس ربطة عنق وحزام وملفحة دآ أنسى لأنك خلاص مقوقع داخل نفسك ومرقة ظاتها ما في عشان تتلبس ليها وحوافز "سك" من شان تتهندم ليها
6) توفير في حق التعليم ودآ باب إنقفل وقدامهو حيطة منصبة مش قالوا: العلم في الكبر كالنقش في البحر
7) في بلاد العالم المتحضر الذينا دآ بسموهو "سنيرسيتزن" بيتوفر ليهو في التوفير!؟ بطاقة مواصلات مجان، علاج مجان يعني عديييييييييييل مقارنة بأحولنا في عوالمنا دي. نقول بتوصف أنها عيشة جنان...........