[بابكر مخير]

المطر ياهو ظاتهو مطر زمان والبيوت ياهن ما نقصن لكن زادن فلل وعمارات يعني المفروض أنهو في تطور عمراني والمفروض أنه يصاحبهو تطور في كل أوجه الحياة كان فهم ولا رخاء ولا بنية تحتية وسطحية وفوقانية تواكب هذا التطور.
لكن رغم أنهو المطر ما إتغير. لا زاد ولا نقص وأيامهو معروفات (ويمكن نقول أنهو الفصل الوحيد الفي السنة نسبيا محافظ علي مواعيدهو، نعمهو وشرورهو..) بس الحصل أنهو المطر بقآ سبب إنتكاسات وعتراسات. ينزل ينهمر يخلي السيول تبقآ جارفة وما بتنقدر وللزرع يحرق خضارهو ومن جزورهو ينقلع..
كان زمان يرشو بالمبيد لو إتجمعن مليليترات موية. خوفن من الناموس والباعوض والذباب ومع أنهو ما بيعض! لكنهو بينقل الأمراض ويخلي الناس تموت وتنقرض..
بتذكر كان نغني ونطرب وكتيييييير بنفرح بالخريف وأكتر لمن يكون المطر بي غزارة بينهمر. أكييييييييييييد المدارس تتعطل والخيران تتملي وتبقآ؟ عطلة من المدرسة واللهو العوامل المساعدة ليهو متوفرة في الخيران. شئ عوم وشئ خوضان وعند الحرفآ يجتمعن الإثنان....
وبعد دآ برضك الخريف على أيتها حال ما هو أفضل بكثير من الفصلين الإتنين (الشتآ والصيف) والما ليهم تالت (ما هو الربيع دآ عندنا في السودان يعدمنا إلا نسمع بيهو أسماء للأطفال الذكور "وهنا بتذكر أخ وصديق جميل وطيب ونظك ربيع عبد المعطي نجار، له كل المحبة")....
الباقي لينا الصيف الفيهو بتعرف عظمة الصيام.....