[بابكر مخير]

الكُبر والفلس
إتنينتهم قريبين من بعض
الكُبر بتفقد فيهو حاجات كتيييييييرة
الفلس بتفقد فيو برضك حاجات. "المال، الجاه، تقرب الناس ليك وحاجات وحاجات...
فا أهااا لقيت روحي ذي الخواجة الفلس...
بفتش في دفاتري القديمة وهنا هي مواضيع كتبتها في سودانيات وإخترت منها؟؟
والله ما أظني شوفتا جمالن متل دا ..
وقررتا أجمع كل مشاركاتي في البوست في مشاركة وااااااحدة وطويلة...
لأنهو في ناس تانية في الفيس بوك دايرهم يكونوا معاكم...
____________

والله ما أظني شوفتا جمالن متل دا وناس كتيرين ما بيكونو شافوا ليها شبيها
لونها أبيض، قمحي فاتح، دهب مصقول، مجمر، لون القمحة،،، ما تعرف لكن حاجة بتتناسب مع زولة يعني بالجد في سمحاتا
التلوين الفي الوش، ما النوع الفيهو مبالغة، مع إنو عدد الألوان قدر عدد ألوان قوز قزح، لكن برضو ما بتشوفها كتيرة يمكن لأنها منتظمة ومنظمة، الحكاية الفوق الحواجب لونها على بنفسجي وكل ما تنزل تحت في إتجاه العين اللون بي نعومة وسهولة يتحول لمن يكون بمبا فاتح.
الرموش، بس حراب مرصوصة، سواد الليل بالنسبة ليهو نص نهارية وفي السودان.
الكحل في العيون، ما أسود ذي البنعرفو داك، لا يعني بالجد لا، حاجة كدا،، أقول ليك هي لبني، أزرق، أسود عليهو حمرة، ما بتوصف مبااااااااااااااااالغة.
بعدين الخدود، بس التقول مجضمينها، حمارتهم الأتقول طماتمايتين ولا شوفتا ؟؟ مش في نوع البرتكان الجواهو أحمر،،، بيقول ليهو أفتكر برتكان أبو دم، بس كدا وتقول لو لمستهم الدم يجيك دافر.
النخرة،،، نتشة كدا،، يعني يا دوبك كدا بارزا من أرضية الوش، وليها لمعة، يعني بس تقدر تقول عليها أنف، ما أظنها لمسا منديل ولا كلينكس، ما ذي ست النخرة دي ما أظن بتجيها زكمة.
في نقطة كدا موقعها بالظبط، الجهة اليسرا في الوش وتحت الأنف (ما ذي دي حرام ينقال ليها نخرة) وفوق الشفة تمام، ذي ما بتقول الفرنجة beauty spot
بنعرف الخشم وبنعرف القدوم وبنعرف الشلاليف، بس الشفاة دي حاجة براها، أها ست الجمال الماشفتا ليهو مثيل، ممكن تتختا كدا عشان الناس تعرف أنو الشفاة كدا ولا بلاش وعليها ما أحمر شفايف، عليها لون مهوقني، بني، شكولاتيي، حاجة كدا ما بيشابها في اللون إلا خصل الشعر المنسدلا على جنبات الوش، ذي شلالات (وين يا فيصل سعد؟؟) نياجارا.
الرقبة، قزازة عصير شنو ولا قزازة شامبانيا بتاعت مين، يا زول دي قارورة من الكريستال وتقول مالينها عصير خوخ (قمرالدين)
قلت أواصل في الفرجة
عاينتا في الشباك، لي تحت؟؟؟؟؟؟؟؟؟؟؟؟؟؟
طلع بترينة عرض بتاعت دكان مستحضرات تجميل وأتاريه الوش كان لي بت جابسين،،
يعني موديل
ويا فرحة ما تمت

الفراغ ما قاتل.. وهو ذي السيف واحد، التعامل معاهو بالمثل.
إن لم تقطعه قطعك، والفراغ إن ما كتلتو كتلك.
ناس أبو ظبي عندهم وصفة تشفي من الفراق بصورة تامة ومع أني صيدلي ود صيدلي ود أخت صيدلي وشيقيق صيدلي وعم صيدلي صحباني صيادلة. ما سمعت بيها.
ومع أني رباطابي وصاحب قرابة بالتيمان وقريب د.(العميد) محمد عثمان عبد الله الشيخ برضو ماسمعت بي الوصفة دي في الطب النبوي ولا الشعبي ولا الأعشاب.
الوصفة بسيطة بشكل.
تلبس أفخم ما في دولاب هدومك، أن كان في الشقة ولا الأوضة ولا حتى العنبر، تراجع تصفيفة شعرك ولو كانت في شعرة بيضاء، أحسن تراجع الحلاق قبل أن تبدا في تناول الوصفة.
المهم دي كلها لإجراءات شكلية.
التوجه نحو قهوة الحبش،،، أول حاجة لازم تلف على أكبر مجموعة حتى تستنضف الوصفة الأنجع. بعد ما خلاص شربتا من القهوة أطنان ومليت خزينة البرازيل المصدر الأساسي للبن وميزانية الدولة الشيقيقة أثيوبيا بالبيرات، ما الدراهم البتتدفع هنا تحول، حتى قبل ما فنجان القهوة يغسلهو لي حساب بنك إتيوبيا الوطني،،، ما الحكاية دعم الإقتصاد الوطني الأتيوبي على حساب الإقتصاد الوطني السوداني الأصلن منهار (الأعور طبزو في عينو قال خربانة خربانة)..........

الوصفة لا تكتمل إلا والتوجه الي الديسكو
هنا لا بقى !! أسمحو ليا أن أهني سودانيننا الهنا على الأكتشاف الرهيب دا لعلاج الكأبة والملل والفراغ والإحباط،،، بس الفاليم أول أيام عزو!! ما كان مشرف بي الطريقة دي.
أنا شخصين ما عارف كنت عملتا شنو؟؟؟؟
يا أخي حور وعين
دا شنو دا؟؟؟
وآآآآآآآآآآآآآآآآآآآآآآآآآآآآآآمعتصماه وآآآآآآآآآآآآآآآآآآآآآآآآآآآآعصمتاه
وآآآآآآآآآآآآآآآآآآآآآآآآآآآآآخلود
شافعة ويافعة قدامي كدا، إتذكرت بت الجابسين،،، قلت أمشي أخير أتأكد وأهبش،،
قبل ما أتحرك إختفت، فتشتا وبإحباطي الأول بتاع الفترينا، لميت فيها في المراية الجانبية
لقيت ليك كمان مصيبة غطتني شوفة الشافعة
قلتا في سري
بعاين للشافعة فوق المرايا 000 قام حجبني السحاب
ندهتا أستنجد وأنادي الصحاب
بستفسر هي عيني بقت طشاش ولا دا شعاعن يبهر الألباب
يا ناس!!! دا ضو الشمس ونور القمر وقفو يعاينو بي إعجاب

كتر خيركم يا سودانيين أبو ظبي
أضفتم وصفة ولا كل الوصفات

والله ناس سودانيين أبوظبي
فاتو شيخ التشيكس في الروحانيات
ما تمشو تقروها غلط وتخلطوها بالروحيات


سبحان الله!! الناس إتخلقت من معدن واحد، طريقة وجود واحد الياهو حمل 9 شهور بعدها الولادة، حالات أقل وقليل أكتر.... عشرين صباع ويدين ورجلين إتنين وراس واحد وووو الي آخر ما هو معروف وبرضو معروف أنو مع هذا التشابه في الخلق والولادة والترابط الوراثي. إلا أن هناك إختلاف تام في بصمة الأصبع من شخص الي آخر ودا من الناحية النظرية لأنو عملياً للآن لم تحصر كل بصمات البشر لزوم المقارنة وكذلك بصمة العين التي بدأت الأن تأخذ مساحة في وسط أجهزة السرطة والعاملة في الجوازات والهجرة، برضو البصمة الوراثية DNA نظريا متفردا ولك التيمان من حيوان منوي واحد وبويضتين يجتمعان في هذه البصمة الوراثية، ماهو حيوان منوي واحد من الأبو....
إذن الإختلاف محدود والتشابه أوسع ومعا كدا؟؟؟؟ تلقى الناس مختلفة في حبها للأشياء وكرهها لها.... الأمزجة متباينة، التوجهات متباعدة.......... يعني تلقى فلان مؤمن بالقضية الفلانية ومتشدد في حملها خلافا لذاك وتلك،، تلقى زول بيحب الفنان الفلاني والتاني بيحب غيرو والي ما لانهاية..
كذلك حب الناس مذاهب في النواحي الجمالية، ناس تشوف وسامة الرجل في تفاصيل وشه وعرض أكتافو أو حتى في ريحتو وريحة عرقو وناس تشوف الجمال في المرأة مرتبط بقوامها وإكتناز اردفها وبروز صدرها....... وبرضو حب الناس مذاهب
آها !!!!!!!! أنا بشوف الوسامة في الرجال مربوطة بحضوره، بشخصيته المتكاملة الرجولة وشهامته وعن مقايسي في جمال المرأة كتيرة ومتعددة وتتنوع حسب المكان والزمان...
ودا ظهر ليا أنا ذاتي في أندهاشي بجمال الموظفة الفي المحل الشفتا فيهو الوش الجميل وإتغشيت فيهو وطلع ليا وش منيكان ذي ما سماها العاقل ود أبوعاقلة.....
الزولة دي وقصداً سميتها زولة لأن لونها لون بنات بلدي، شكولاتا لبنها زيادا شوية، لاهو بني ولاهو قمحي، ياهو شيتن لا بتوصف ولا بيتشبه... جسمها باللون دا ليهو لمعة كتروالله بس ترابيزة مهوقني مرشوشا بي ورنيش لماع، تشوف وشك فيها،، مراية بس والغريب الجلد وكأنو ورق سلوفان ملفوف بيهو سلوك كهرباء لونها أزرق ودي هي المفروض العروق البتشيل الدم من القلب ومشحونة بكم من الأوكسجين النقي الجاي من رئتين مدسوسات تحت نهدين ولا جبال شنقول مليانة بالغالي والنفيس من معادن الأرض...
دي ياها الكانت ورا الفترينة وهي الياها بي أنملها (الحنجي نوصفها بعد شوية) ختت المنيكان يا محمد أبوعاقلة في الفترينة
نواصل في وصف الجمال الما ليهو متيل ولا شبيه
_________________________________

في الطول!! ما دا بقولو عليهو: لاقصيرة محتاجة تلبس كعب عالي ولا طويل تضطر ترخي ركبها عشان تتساوى معاك في الطول، صممت بالمقاس البتناسب مع مستوى النظر العادي خمسة قدم وواحد ونص بوصة، الجسم والقامة دي منصوبا على قامتين ملفوفتين ذي ماسورة الندقية من جوا وللماعارفين الوصف دا، ماسورة البندقية من الداخل ملفوفة على شكل حلزوني، ودا كان الساق فيهو شوية ضمور في النهاية نحو القدم (دا الإحنا نسميهو العرقوب لكن دا ما ممكن يكون إسمو عرقوب) والمنطقة دي ناس علم التشريح قطع شك بيوافقوني، أنها عند البشر العاديين بكون فيها بروز وإنخفاض وعضام خالقا ربوات، لكن عندها دي!! التقول بالمسطرينا الحتة دي إتساوت ولا حقنوها بالمادة البحقنوا بيها الخدود عشان تنتفخ (لو لاحظتوا نانسي عجرم عاملاهو في شفتها العليا وبرضو واحدة مذيعة في واحدة من القنوات العربية دي والزادت بالشروق الجيكس بتاعا والهارموني والبيلي الفيها وزول الناس هيمنوت وندى القلعة منورنها).
منطقة التقول جروها بي كراركا لمن ساوها وبعدها زرعو الماعريض ودا على قول شيخنا البرعي في وصف خف الجمل والأحسن في وصفو لمن بقاهو فات الجمال وكل جَمال العالم، القدم!!!!!!! يا ناس فات القدوم (عندنا بيقولوهو للخشم العندنا برضو بيسمى بوز وهو المفروض يكون فم) كمال وجمال..
مقاس القدم ما بين تمانية وتلاتين وستة وتلاتين، يعني حتة كدا وسبحان الخالق القطعة الصغيرة دي من لحم مكتنز ملفوف في سلوفان مساكاتنو عضيمات ولا عضام الحمام (داك ما هش وبتقرمش ووووووين لي عضام خرافنا، الهلكا المشي من درافور الجريحة لين الخرطوم المريحة،،، شوف بالله مشوار جماعة خليل إبراهيم قطعهو بالعربات وكانو مرهقين والحمد لله جات كدا وسهلت عملية إجهاض حركتهم،،، ما علينا) الحكاية دي حاشرنها في شبط بي سيور، زانق حدي ما تتخيل أنو السيور غرقانا في لحمها، ذي ما أنا غرقان في جمالها وببحلق بكل تركيز وعبدتُ الله جهراً جهراً (ما سرأ يا كابلي) لأن الله سواك.....

ذي ما قلتا لونها شكولاتا بالبن زيادة وشوف الذوق في الإختيار؟؟؟
النعال البي سيور لونو فضي مقصود بي رقي، لأنو لون بيمشي مع لونها ولون المنكير!! المصبوغات بيهو الأظافر. وفي كل ظفر حاجة كدا في النص؛ في الأول ما قدرتا أشوفها ما النظر كان زماااااااان ستة على ستة!! حسي ظنيتو ستين على نص والنضارة بس كعب كبابي الشوب بتاعت ياسين (دي ما بتذكروها إلا ناس جيلي الحلويين.....)
المرحومة سعيدة بدري كانت مشهورة في العايلة بخفت الروح؛ من نوادرها؛ تصنيف الأعمار!!!! عن الستين قالت ديل ناس السؤال؟؟ وين ماشين (لاحظتا الحكاية عندي، سؤالي لأي زول وين ماشي ومن وين جايي؟؟) والسبعين ديل الحلوين، ناس ناسيين وماعارفيين وبرضو سمتهم ناس الإعداد (الروضة)!!! قالت ديل لازم يعاملوهم ذي شفع الروضة، يكون معاهم زول هو الماسكهم يدويهم ويجيبهم!!!!!!...
المهم الحاجة المرسومة في كل ضفر وبعد ما ختيت نضارتي سمك سنتمتر ونص، عرفتا أنها قلب مرسوم بالبني، حاجة قريبة من لون البشرة، حتى يخيل ليك أنو الظفر مخروم في شكل قلب...
وأنا قلبي من محلو قرب يقع... ما خفتا يكون صابها مكروه ولا أكون طقيتها عين؟؟؟ وعيني عين الرباطاب نااااجعة....
بأدب جم ولغة!!! الإنجليز بيسموها؛ إنجليزي الملكة (queens English)، وبإعتذار المسبوق!!!!
قالت ليا: في حاجة غلط في لبستي دي؟؟؟!!! ما تكون الخلطة دي أزعجتك وأنها خالية تناسق؟؟؟؟؟
يا أخي كلام طلع بخور من مبخر ولا عطر من فتيل شنيل خمسة ولا نسمة من جنة ولا شنو ولا شنو،،،
أنا بقيت أشمشم وأفتش في الهواء عن رزاز أو ذرات من السلسبيل (الكلمة دي عجبتني وعشان كدا زجيتها، أفهموها بقى!!) السايل ومتطاير دا...
جاني الصوت وفحا كدا في قلبي ودا أول مرة أعرف أنو القلب بيسمع،، وبيشوف وبيشم ، رفعتا رأسي أشوف وأتوكد مصدر الصوت!!!!!!
وأسقط في يدي
يا الله، يا الله
حلم
علم

سمعتا الصوت جايي من أعلى وما بعيد ولا قريب لكن في طعمتو ذي صوت بلبل من فوق الشجر بزغزغ ولا ذي صوت حفيف الصفق هزتو نسمة خفيفة لمن تلمس خدك تحس بحرير مجرور في وشك. رفعتا رأسي وهج الشمس لفحني زغلل عيوني ولما الوكت كان مغيرب!! إتسألتا: دي ما الشمس البتجهر في المغرب. طيب دا يكون شنو؟؟
كشافة مختوتا في جوا المحل الفيهو الفترينة؟؟؟
لا!!!!
ما الكشافة نورها أبيض ساطع ودا كان وهج في ضياهو ذي لمعان الدهب، غمتضا وفتحتا، مسحت عيوني، فركتها وإتوكد ليا المصدر....
وش إنسانة، ليها عيون قدر فنجان القهوة، كمية من البياض الناصع في نصو ديوريا لون طين بحر جروف النيل في شواطي توتي المتوسطا النيل الأزرق شمال الخرطوم وعند مقرن النيلين.
فوقا الرشرش كل سبيبة فيهو واقفة ذي الحراب مشهورة...
الله يرحم شاعر أمدرمان الفذ الوصف للرشرش دا وما شافو
انا الولدوني بالتهليل وهلت فوقي غابه رماح
وأخاف أنو عليه رحمة الله الواسعة سبقني في شوفها
ما هو قال برضو بي لسان حالها:
انا الطابيه المقابله النيل وانا العافيه البشد الحيل
وهي كذلك،،،، ممشوقة القد، ممدودة القوام، جسمها ينعم بكل الصحة وتمام العافية
عيونا، محور كلامي!!! إترسم فوق كل واحدة حاجب شكلو هلالي، بس إن إبتديتوا من قمة الأنف تجد إنو غليظ وفي شكل بيضاوي من الطرف الخارجي وكل ما ليهو منسحب بتناسق وإنسياب نازل نحو رأس الخد، أخذت من حافته كل شوائب شعر، ما أشبه بالأرض المحسنة بمجرار كراتربيلر.
العيون عليها غشاوة كأن ما لصقت عليها رقائق صنعت من سائل شفاف ناعم، يمكن أن قول أنها دمعة إتشرت تغطي بياض العين وسوادها!! الهو ما سواد لكن بني مايل للسواد.....
تشوف بسمة في العين، تشوف ترحاب، تشوف الفرحة تقول ليك تعال حباب....

كانت لابسة الينفورم بتاع المحل، بنطلون لونه أسود، ما بقول فصل على مقاسها لأنو لو جبت أخير الخياطيين وأمهر الترزية ما أظنهم يخلقوا التوليفة المتناسقة بين الجسم بكل تفاصيلو؛ خصر (يقال ليهو وسط) والغريب ما بتوسط الجسم فهو أقرب الي منطقة النهود البارزات كقمم الهملايا وبصلابة جبال رأس الخيمة حيث يوجد أصلب أنواع السريميك،،
المهم في الحكاية المنطقة دي من الجسم؟ دبلة الخطوبة في يد بنية صغيرونية، حنونة ورقيقة، نحيفة بس ما ضعيفة، أصابعينها قدر مصاصة التمر، في عمر الزهور فاتت العشرين وما وصلت الواحد وعشرين!؟ واسعة عليهو، ناهيك خاتم سليمان ولا إكليل الشوك الوضعهو في رأس المسيح، عيسى بن مريم، عليهم السلام.
الشئ دا يشكل منطقة تلاقي،، أنا شخصيا شبهتها بمضيق جبل طارق، فهي منطقة تلاقي سلسلة جبال بين شواطئ المغرب العربي ورأس إفريقيا (تستحق هذه الدولة أو المملكة ويصح التعبير أن تكون هي عنوان الجمال، فمليكها قمة في الوسامة ورجالها حسنيي المظهر أما نسائها، فهن يتقاسمن الجمال مناصفة من قوم أبرها) وبين سلسلة جبال إسبانيا (الأندلس) هذه البقعة من الأرض التي أجد كل عذر لطارق بن زياد والداخل أن قاتلوا وحاربو وقتلوا من أجلها، فهي قطعة من الروض، نزلت لتغري البشر بمحاسن الجنة وليعملوا ويعبدو ليظفروا بها في حياتهم القادمة..... هذه البقعة من الأرض التي تجمع غير هاتيين السلسلتين من الجبال، تجمع بين عملاقيين، المحيط والبحر المتوسط... يسحر هذا التلاحم والتجامع والخلط!! لب الجان قبل الإنسان... هاكذا كان الشئ دا.
واقف على ركيزتين، كأنها الكرة الأرضية، إستدارة وتمحور، خلطة ما بين كرة القدم في الإستدارة وكرة الرقبي في البروز عند القطبين وشكل القوس عند المداريين....
كأن الإسم قصدت به هي! فهو حقاً ترادف لي أرداف ترادفت جنبا الي جنب، تلاصقت وتلاحمت لتكون عنوان وجودتها حين صممت كأنها خصصية لهذا الغرض ،،، ما أهو الرولزرويس متخصصة محركات طيرات كانت إيربص ولا بوينغ ولا حتى الأنتينوف....
جمع كل هذا داخل البنطلون والذي أثار حيرتي من الأول.
هل فصل ومن فصله
لكني أكاد أن أجزم أنها ولدت وهي ترديه
كل ما زاد عمرها، يمتط ليتناسب والحجم
وكل ما كبر جزء من جسمها شد على بعضه ليسع الكبر دا..
ولكم لاحقا
على ماذا تعتمد هذه المؤسسة المتكاملة من سلاسل جبال وتلاحم مياه مياه محيطات وبحار
فالعماد هو الأساس وهو الإعتماد يشكل نوع الأثاث..
سنتطرق الي القوائم التي هي أقوى من عماد المعبد الذي هدمه شمسون

عن القوائم والأساس
وعن السكن الفيهو الراحة ومفروش بأرقى الأثاث
نبتدي بقولة، جعان وبحام، بتذكر،،، الضلع والخروف المشوي والفراخ المسحب
لكن قاليك: خير اللحم ما جاور العظم
لكن هنا!!! العضم يلقوهو وين؟؟؟
ما هو الشئ ملموم في البنطلون ، إن هبت نسمة تشوفو يتهزا !!!
بس قالب الجيلي ((المرحوم أبو الصادق؛ شاعر أمدرمان المرحوم عبد الله، حكى لمن كان مضيف في سودانير، قدم وجبة لراجل (دفعة كدا) وكان الحلو جلي، عاين للراجل وهو بالملعقة بيأكل الجلي، وقال: إتا تتهز والجلي يتهز جننتو الملعقة جن....))
دي هي المنطقة؟؟؟ التحت الشئ داك الذكرناهو في السطور الفاتت.
وبيسموهو الورك.
في قطع دجاج الكنتاكي يا هو الورك المحبب ليا من كل الأجزاء التانية. لأنو تشكيلة جامعة من لحم الأبيض ولحم شبعان دم لمن لونو ماشي للبني أو الأحمر القاني وحتى عضمتو هشة بتتقرمش،،، الما ضاقو بوصيهو يضوقو وأكيد بدعو ليا، بعدها....
دا القليل اليسير من ملامحها وشكلها وتوليفة الجسم وتناسقها، توزيعها ولملمتها...
آهاااااااااا؟!؟!؟!
مشيت أتطاول وانا القصير في الصبر والضعيف أمام مقاومة الفضول، لكن ما بخفي سر.
قصدي وهمي
جرجرة في الكلام وفتح مشروع ولفة ووئام.
سألتها بإنجليزي هو فهم عربي وكلمات عربية ترجمتها وبستنى الرد عشان أعيدو تاني للعربي وأفهمو؛ قلتا وقبال ما أقول، دخلتا في حيرة؟؟؟
ياتو الأصح وشنو في الأول وشنو بعدو؟؟؟ هو بينقال؟: "هيوير آر يوو فروم" where are you from ولا؟ "فرووم هيوير آر يو" from where are you. شقلبتها وقلبتها.
المهم رميتها عسى تكون صاح ومقبولا وشيتن طالع من عاقل وبي عقل، لكن هو وينو؟ عقلي وأمامي هذه اللوحة التي لم ولن يتجراء فنان، إنسان ود تسعة أن يدعي قدرة حتى تصويرها وييييييين يا الفرجوني، تقول ليا "الرسم صورتك ما عرف رسمك" هو ظاتو في قدرا لي كدي؟؟؟
السؤال كان: إتي من وين
إبتسمت وكشفت عن فصوص لولي، ذكرتني "وعضت على العنابي بالبردِ" مرصوصة بنظام، مصفوفة بإحترام، مافي واحدة متقدمة على التانية، متلاصقات كتف بكتف وهن، من دوريين.
الدور الأسفل مافيهو، لا فجوة ولا فضا والعلوي تتوسطو فجة بالكاد يبرز منها طرف لسان أحمر في لونو، مقارب لي الروج الموضوع على الشفاه وديلا؟؟ العليا تشابه قطع عرضي لي قناة السويس الفي أطرافها تلال، في طرف الجانب المصري تل وعلى الناحية الإسرائيلية تل كان عليهو حائط بارليف. قناتي الموصلة بين حسي وقلبي وقناة السويس، لكل واحدة نوع مياه تسيل بين ضفيهما ، عندي اللتي، لا لون له لا تلوين، عصير عنب مخمر دون رائحة خمر لكن بريحة مسك وحق قناة السويس؟ مالح بلون أزرق،.
إلا أن التشابه يضاف اليه في أنو الإتنين شواطيهم مبللة، رطبة ويفرق بيناتهم من القناة تشتم رائحة البحر و دي زولتي، عبق العنبر ورائحة الطيب...
شفاه لونها لون العقيق اليمني ومن يدري ربما كان فيها هي نفسها من روح بلقيس أو من خضرة أرضها، سبأ.
تلك اللألئ!! غرست وثبتت على أرضية يغلب عليها لون البنفسج وهو يميل للإخضرار بشدة ولكن هنا لا ضرر في الوشم ولا ضرار، بل زيادة في الجمال جمال، خاصية تميز بها أهل دار صباح (أهلنا في الغرب، يقولونها لكك ما هو شرقا وأتي من الشرق و"الشرق أتى والغرب أتى والأم سليلية آمهرآ"، قوم أكسوم، تقراي، أمهرا أو قوراقي!! من أصحاب البشرة السمراء منهم وتلك البيضاء!؟!؟ لون حليب طازج محلوب من بقرة طاهرة يعبدها الهندوس ويقدسها الدينكا ويمجدها القرآن في سورة لها بإسمها وذكرت في يوسف بن يعقوب ونذكر قصته مع إمرأة العزيز.
لكن هذه؟
عزيزة هي ولا يبدو عليها من طباع تلك، وإن كان فيها روح وحلاوة يوسف.

وواصلت حديثي معها!!! ما عنها،،،،
سألتني بأدب وبصوت خااااااااافت، إدسا وسط صوت نفسي الطالع ونازل، ذي المرجيحة؛
الأيام دي عندكم رمضان، هي قالت وللأمانة "رمدان".
رديت بي صوت متحشرج، ما الحبال الصوتية نشفانا من شدة العطش والعقل البيدي التعليمات للسان، صايبو خمول من النقص في النكوتين. قلتا ليها:
آآآآي، عرفتي كيف؟؟؟
قالت: في المنطقة الساكنا فيها، كتييرين من شعوب شرق آسيا ويكادو يكون كلهم مسلمين. وأضافت أنهم كمسيحيين عندهم برضو أيام صيام وعددها أكتر من أيام صيامنا.
قلتا ليها ما ممكن، لأنو إحنا غير رمضان عندنا البيصومو إتنين وخميس وصيامكم يما،
ياهو عدم أكل الشئ الفيهو الروح،،،، روحو غادي،،،
إحنا صيامنا،،، من قبل الشمس تظهر عيان بيان لييييييييين تغيب من العيون،،،
يعني صومن ما بالقي الشمس.
قالت: بيقولو الصيام بصح الجسم،،،،
سكتا
وقلتا: اللهم إني صايم،،،
قلتا ليها كمان:
كدي يا بت الناس، ما أجرح صيامي ساكت، بجيك راجع في العيد
أشيل عيديتي

الشهر الكريم مرا بالنسبة لي ناس رجيم قاسي، لي ناس أيام روحانيات سمحة، لي ناس مستين عيدو عشان يعيدو، لي ناس مسلسلات وتلفزيون، لي ناس؟؟ إجازة ليهم بتسيبو فيه من العمل......
وبالنسبة ليهم كلهم؟؟؟ يبقو مستنين وينتظروهو حداشر شهر ويرجع وترجع ليهم حاجاتهم دي مرة تانية،،، وهاكذا "دواليه" (كلمة عجبتني و"زجيت" بيها)...............
أنا
وفي الشارع ولعتا ليا سجارة، بخيتا في الهوا وسرحتا معاها، لقيت روحي قدام قهوة دلفت داخل وطلبتا قهوة إسبرسو،، ما قدامي يوم طويل،،،
السوق بعد صلاة العيد،، ميزة الصلاة مع أهلي الأنصار أنهم بيصلو متأخر شوية ولي كل البفتوهم صلاة العيد،، معاهم متسع للجميع،،، (قالها شيخ بابكر بدري لأحد الشيوعيين الفصلوا من هيئة التدريس في مدرسة حكومية وتم إستيعابه في مدارس الأحفاد وكان أستاذ عظيم، شاعر ومعلم متمكن)
مشيت إشتريت باقة ورد، بعد صلاة العيد وكانت الدكاكين فتحت،،،،
السمحة التقول من الحور،،،، واقفة في وسط الدكان وما إنبهت لي دخولي،،
حيتها لمن بي بسمة لاقيتها..
قالت ليا بي غير ترحاب بتاع ناس كان بيناتهم حوار،،، كان آي هلب يو ( )، الباقة بتاعت الورد الفي يدي؟ ذبلت من هول الصدمة، لكني برضو لا زعلت ولا حردتا،،،
صاحب الحاجة أرعن............... إتغلبتا على صفاتي البتروح ليا دايمن الشي الجميل،،،
وقلتا ليها بي حرج وأنا مدسي ورا باقة الورد،،
"دا أنا"
لطيفة يا أخي هي،، ذوق،، رقي،،، عطف وحنان يا ناس،،،
قالت: آآآآآآآآآآآآآآآآوه ما عرفتك،، فقدتا وزن وعملتا ليك دقن،،،
قلتا: الصيام سيح الشحم ونشف الموية الفي الجسم،، ما قلتا ليك صيامنا وييييييييييييييييين لي صيامكم وبعدين الدقن دي لزوم الشو،،، ذي عندنا بيسمو الدقن بعد الإنقاص،، دعوني أعيش،،،،
لمن قلتا الإنقاص،،، إتحيرت وقال ليا،، يعني بنقصو ليكم الإعانة،،،،،،،
ضحكة وقلتا ليها: ديل وربنا يعزك، حكام مليون ميل مربع بنتمي ليهو....
خلاص، رجعت الدماء للعروق وإنفرجت أسارير وشي وقدمتا باقة الورد،،،،
يا الله
فرحة في وشها، بس فرحة أمي لمن الواحد يرجع من سفرن طويل،،، حاجة كدا عندها طعم الصدق وأقول ليك،، لا بس فرحة طفل برضع وقدمو ليهو البزازة ولا فرحة الزهر لمن يلمح ليهو فراشة جايا تلقحو،،،
قالت: دي ليا،،،،،،،،،،،،،،، أُأُأُأُوه سانك يوووووووووووووو
نان لي مينو؟؟؟؟؟؟؟؟؟؟؟ ردي بس حق زولن، أغبش ولو زول جاب ليا حاجة،،، كف بختفها
قلتا ليها: وعدتك برجع ليك بعد رمضان وبجيب ليك العيدية
ووعد المؤمن دين
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
إتونسنا، كلمة، إتنين
وجات طاريت الكورة
أنا بشجع تشيلسي
دروقبا، لاعب كورة في تشيلسي
قامت قالت ليا:
عيديتي ليك!!!!!!!!!
أمشي أدخل النت وشوفنا، إحنا بنات قارتك
وبلد الأفيال المنها دروقبتك،
بس ما تمشي تلوح رقبتك ..............
قالوا:
كل يبكي ليلاه..
والناس تتصارع والمبارة النهائية والحكم منحاز ومصر والجزائر، وأنا؟؟
كان همي الأول والأخير..
الفيل الأفريقي....
ما السمحة قلنا من هناك...
إنتهزتها فرصة وقلتا ربك يا بابكر سهل ليك أمر كنتا ناسيهو من زمن،،
إتذكرتا السمحة وقلتا يلا نضرب ليها تلفون.. إشتريت كرت بقيمة خمسين درهم، يعني يكفي حق مكالمة لفترة 20 دقيقة بالكمال والتمام مع الطرف الشمالي من الكرة الأرضية..
إستعدلتا في القعدة وعمرتا رأس تفاحتين للشيشة (علامتهو تفاحة واحدة خضرا وتفاحة حمراء) وولعتا الفحم..
في لحظة فكرت في جمع الأمور على المنوال دآ وكيف قدرت الخالق وافقت ما بين الجمرة والتفاحة الخضرآ، لقيت أنه الجمر بيبقى ذي قالب التلج مقارنة بحرقة الشوق البيا لسماع صوتها وأنه التفاحة الخضراء المرسومة في الصندوق!! ذابلة بالنسبة لي إخضرار وجناتها..
إسترخيت وأنا أرتجف رهبة من كيفية بداية الحديث بعد الغيبة المفروضة دي، يديني عرقانة وقلبي التقول دق النوبة في ساحة حمد النيل..
متشوش ولكن بلذة، مترقب ولكن بتفاؤل..
وأنا في حالتي دي والتلفون لساتهو في يدي أسمع صوت "يس yes"...
هو أنا تاريني ضربتا الرقم ولا أدري...
قلبي فحآ، لساني تلعثم، أطرافي تجمدت....
آ آ آ آ،
وأحاول إقتلاع الحروف من دأخل أحشائي وأستغيث بالكلمات أن تخرج لتنجدني ولا زالت ال؟!
آ آ آ آ، تتلاحق وفجاءة..
أسمع صوت التلفون توووووووووووووووووووووووووت
قررت بعدها مراجعة الطبيب النفساني عشان يلحقني بحباية فاليم، تهديني وأنوم بعدها، على أن أعاود المحاولة مرة أخرى باكر..

إضافة::
إتصلت باكر لكن أترايهو كان الرد عليا أمس ما هي..
كانت زميلتها في الغربة وقالت ليا أنها سابت البلد وخلاص نهائي سافرت بلدها "للفيلة"

[youtube]https://www.youtube.com/watch?v=Cr24SF7-XwU[/youtube]