[أسعد]

المشاركة الأصلية كتبت بواسطة عبدالمنعم الطيب حسن

حبيبنا يا وجدي الاسعد، كل الود يصحبي
..
اسعد ايما سعادة بالمكتوب هنا وبهذا البوست المختلف،
..
مالك جريدة الوفاق اسمه محمد طه محمد احمد. بس ما مشيت بعيد
فالرجل يُقال انه مع الجمهويين، في شقة طارق الحسن محمد الحسن، جاء
صحفي كان بالوفاق كبا لنا الشمارات وسالني ان كنت جمهوري، قلت له لا وطارق ضحك
..
ازمة الديمقراطية والراسمالية الليبرالية على النسق الامريكي الاوروبي ماهي مآلاتها
وكيف يكون شكل العالم مع نهاية الفكرة دي،،
وماهي نظرية الحكم والاقتصاد الجديدة ومتى تسيطر؟
..
افكر في الرجوع لواوسي باسرع وكت ممكن لانو شايف دروب الرحعة كل يوم بتضيق،
عاوزين رايك في مستقبل السودان، والسودانين المغتربين القدامى والجدد والنازحين واللاجئين وفيصل والخرطوم وبورسودان
اذا في بداية الحرب في بوست لك انا ذكرت انا الحرب حا تنتهي قريبا انت قلت لي لا الامارات وازراييل مش حا يسكتو والحرب حا تستمر سنوات..
وطلع كلامك صاح، اهها القصة دي حدها وين ومتين والمستقبل شنو للبلد والنيس..
..
اعتذار متاخر ليك وللزميل العزيز الجيلي احمد
حول كلامي الحاد حول الفنان محمود عبدالعزيز،، الكلام دا طول شديد محمود كان حي، وانا زاتي كنت صغيير..
ياخ اكتشفت انو الزول دا مكنة، وكاهن..
ورحعت سمعت كل اغانيهو،
واكتر شريط اغاني حقيبة ظللت اسمعه لشهور طويلة
...
حاول ان تدلى برايك حول تساؤلاتي وخفف في اللغة، وبسط.. زي ماعارف
نحن ثقافة مصرية..

اوووو حبيب منعم ياخ
محبة وشوق ياخ

ايوة صاح اسمو محمد طه محمد احمد.
بالله كان جمهوري؟ غريبة أنا كنت قايله كوز لكن بروح ماركسية

بخصوص عشمك الجميل عن اني زول فاهم الحاصل فوالله بشكرك عليهو
لكن هو عشم ما في محلو😁
أنا زول بس ينظر لسقف بيته ويتوهم أشياء ويجي يورجغ بيها هنا.
بخصوص حرب السودان الصراحة كانت صدفة ساااي
أنا زاتي انخلعت لكن لقيت تاريخ البوست سبق الحرب بي يومين🤣
الشغلة دي "حظ الوحيدين" يا قول محمود درويش
حيث لا توجد زوجة او حبيبة تشوش عليك استقبال رسايل الحاصل🤣

بخصوص سوالك عن مالات وضع العالم وجوطة الديمقراطيين والنخبويين فدي نبوءتي الوحيدة عن نهاية النظام العالمي الحالي وبداية عصر جديد.
وبناء على الأحداث الحالية توقعاتي انو السمباتة اسياد الواطة بعد ما يغضوا غرضهم في طرمبة بخلق زعزعة في الشرق الأوسط وجعل واطيها عاليها في حرب ايران، ح يقوموا السمباتة يسلموا طرمبة للديمقراطيين ويقولوا ليهم ليكم اللحم والعضم ادوهو لي كلابكم… وساعتها ح نشوف طرمبة في الرج ولكن بلاد العم سام ح تدخل في حروب اهلية بين الديمقراطيين والجمهوريين ولان سياسة العم سام (الخير يخص والشر يعم) فساعتها الحرب دي تنتشر في كل العالم وساعتها ح تنهار كل مقومات النظام العالمي الحالي التي كانت تقوم على مبدا بسيط وهو العوامل الطبيعية لصناعة التكتلات البشرية (العشيرة، القبيلة، اللغة، الاديان، الدول والأيدولوجيا) وح تتغير العوامل دي لي ثلاثة فقط (إنسان طبيعي، خول ومكنة).

البشر الطبيعين ح يعملوا تكتلات بشرية خاصة بهم والخولات عندهم تكتلات خاصة بهم والـ Machines ديل ح يكون عندهم تكتلات خاصة بهم ومن هنا ح تكون في صراعات جديدة.
والحكاية دي اعتقد ح تبدا في سنة 2030


بالمناسبة عدم فهمك لكلامي مش معناهو ان بتكلم بعمق وكدة، انت ما فهمتني لاني زول ساقط تعبير وما بعرف انشاء كلو كلو


بخصوص اعتذارك عن الحوت
مع الحوت ان تأتي متاخرا ممكن تكون احسن من الجوا بدري


لكن مبسوط منك في رشك للرشيد (وجه شرير وابتسامة شريرة خاااااسة خاااااسة للرشيد) بصوت خديجة امريكا😁