[بابكر مخير]

وإحنا صغار!! ودي ديمة لمن أقولها بشعر أنه هناك إستغراب ممكن أو فعلاً يعتري أبنائي وبناتي وحفيداتي وأحفادي وتسألهم. متين ممكن يكون كان صغير وإحنا مما إتولدنا شايفنه كبير(عمرا).
المهم هي حقيقة كنا صغار ووكتها البنعرفه عن المنجمين هو ما جاء في المقولة؛ كذب المنجمون ولو صدقوا..
المنجمون هم شكلين، واحد الملمين بعلم الفلك والنجوم وقراءة مجاريها وهم البيتكلموا عن الشهور والفصول السنوية ونوع تاني هم المقصودين في المقولة وديل البيقولوا ليك حيحصل شنهو متين وهم ديل الكضابين لأنهم بيتكلموا عن أمور هي من المغيبات.
أها زمنا طبعا كانت الأُمية أشمل مما هي عليه حسي وفكرة تصديق المنجمين البيتكلموا عن حاجات حتحصل في المستقبل كان لها تأثير أقوى، يعني يقولوا ليك؛ الشيخ فرح قال ......... وأنه نوسترادموس قال حيحصل كدآ وكدآ وإن كان لي حسي برضهو في شخصيات ذي دي وحكاية وسائل التواصل الاجتماعي أدتهم فرصة ظهور أوسع، يعني في سيدة عربية كتير يظهروها في الميديا وتقول أنه في يوم شنهو داك حيحصل إنقلاب في وين ما عارف وكدا يعني.
دا الكان زمان وكبرنا ووسعت معرفتنا ووتوسعت المسميات وتشكلت حسب الظروف فكلمة منجمون تشاركها الناس البتشتغل في المناجم، ذي بتاعين جبل شنهو داك في دارفور ومناجم الدهب بتاعت آل دقلو والمنجمون الذي يعملوا دون ترخيص ويتهربوا من دفع الضرائب "السيكورتا" وديل الفي السودان معروف بقولة سوكرتا وهم في ما تعرف هل هو الشمال الشرقي للسودان ولا الجنوب الشرقي للشقيقة مصر.
ما مؤرخن يقولوا أنه تابعة للسودان وحكومة الأمل بورتسودان ما مدينا أيتها أمل نصدق المؤرخين ديل.
طبعا كان ممكن حكاية منجمين السوكرتا يستمروا ويطلعوا ليهم قرشين تلاتة والشحنات بتاعت الصخور تستمر لي شركة ديب ميتالز وينغوشو.
لكن حصلت الضرابة ووقف المنجمون بتاعين المناجم عن تنجيمهم وبقا علينا نستنا منجمين الفلك يشوفوا لين من أين سيشرق أمل (حقيقي) للسودان ونشوف منجمين الحيرة يقولوا لينا متين تنتهي الحرب ومتين حيزول البرهان وحميدتي والكيزان من الحكم في السودان