بركة الجيتى يا آمال
قلتى لىّ كنتى الاقرب؟
كدى بس النقعد فى الواطة واتوهط للكتابة
الذاكرة الايام دى مخموجة برحلتنا من كوستى وللديم
تفتكرى يا آمال دى جات صدفة انو من دون كل الدنيا نسكن فى الديم؟
رغم انو شغلى زمانئيذ كان فى الاذاعة فى ام درمان
تابعى التسلسل فى رحلة العجائب دى
بناسها وشجونى والشوق المنفجر فينى حسع دى!!
غايتو مقاومة الشوق ده الاّ باسترجاع الذاكرة وتتنهنهى بعدها وتستغفرى ربك وتنومى مغمورة بالرائحة التى تحبين.. او هكذا افعل
-----
على سيرة الرشيد على عمر
زرتهم فى بيتهم فى واحدة من زياراتى لكوستى
هو نفسو , الضحك والحكاوى والبداهة والنكتة السريعة
ضحكنا وحكينا لمن ناس الامن بعد الانقلاب بى اقلّ من اسبوع يجوا يداهموا بيوتنا- حلوة ياخ افلام الآكشن دى- المهم بيتنا وبيت ناس الرشيد ضمن الخمسة بيوت اللى اتفتشت
منهم بيت ناس عبدالمنعم الضابط الادارى- اموت واعرف اخبارو, بتتذكريهو؟ غايتو لو السودان ده فيهو عشرة زيو- الروؤية الواضحة واحترام الذات واللطافة والتواضع و...
قلت للرشيد عندى كلها نص ساعة معاكم عشان اتم المشاوير التانية واتذود بالاهل ومحنتهم قبل ما ارجع فيينا.. واتذكرناك يا آمال- يا ايتها الاقرب ولمن طلعت من بيتهم كانت تمانية مساء..
أها اتم باقى الحكاية المرة الجاية....
-------
السنة الجاية لو ربنا سهلّ الامور حا اعرض كتابى- الجزء الاول من {أنثى الانهار} فى كوستى والاعداد لدى على قدم وساق فما تفوتى القصة دى.. ياربى حايكون شكلها كيف وكل الاصحاب والصحبات والحبائب مافى؟