[عكــود]

آمال، إشراقة وكل الأحباب هنا،

البوست ده شفتو مجرد نزولو، وكنت متيمّن ما أجيهو وإيدي فاضية، (أعاين ليهو واضحك وأمشي واجيهو راجع . .
راجع)
عندي تسجيل سمح بالحيل لأحد مبدعي كوستي، قلت أنزّلو كـ (فـِقْـدة للبوست) بس النت معصلج شوية اليومين ديل وخذلني.
ما زلت مصر أنزّلو متى ما تيسّر ذلك، وما حأقول التسجيل لمنو (باقي في ناس حايمين هنا بيحرقوا لي مفاجأتي، وما بقول شليقين).
المهم، كوستي ما شفتها شوف العين، لكن شوف القلب والله شفتها . . كل أولاد كوستي أيّام الدراسة كانوا أصدقاء وما زالوا (وكذلك أولاد الأبيّض وما شفتها برضو شوف العين).
أبناء كوستي مميزّين وشطّار (إن بقى كلّهم مِتل العرفتهم)، جادّين، مخلصين وحبّوبين، عاصرت منهم الكثيرين، على سبيل المثال وليس الحصر، بابكر الطيب، فيصل عبد الكريم، عادل بابكر وما زالت حبال الود متّصلة.
ده زايداً على قرايبنا العايشين هناك، وبجيكم ليهم راجع.

واصلوا في البوست الحنيّن ده وبجادعكم مرّة مرّة.

[align=center]اللهم أشف إيمان وعافِها يا كريم يا منّان[/align].