طالما اليوم يوم نفش الذكريات والحزن قمت فتشت شنطتى الخاصة جدا- سميتها السحارة- زى سحارة امى حليمة الله يرحمها, قمت افتش لرسالة من استاذ الطاهر كان قد ارسلها لىّ فى نهاية 1999 بعد زيارتى لاسرته فى الاسكندرية..
رسالة ممهورة بحكمته ومعرفته وثقافتة وخطه الجميل والمميز.
فى بحثى طقش قلبى كم حجر..
حجر الحنان من رسالة من امى حليمة- بتنادى ود اهلنا يكتب ليها الرسائل وترسلها لىّ
رسالة منها وانا يادوب بطاقش فى دروب الغربة وكان لىّ 8 شهور
{{ مشتهية ضحكتك يعلم الله وصوتك وغناك يابت كبدى , مشتهياك زى العافية ارتيك كان جنبى يا بت مصرانى, تعطنى شعرى بدهن الكركار وتمسحى لىّ وشى وكرعى اللى ابن المشى.....
عافية منك وراضيانه عليك من قلبى ولى ربى
ربنا يعودك بالسلامة وعافية منك عفويا يزيد فرح ايامك ويقوى عضامك , عفويا يغطيك من كل شىء يجيك, ودعتك آمين الوداعة ونبى الشفاعة من البلا والساعة, وداعة تعدل خطوتك وتقرب رجعتك وتستر غربتك وتم امنيتك............
.....
...
.
من امك حليمة محمد ابو شالية}..
ماقدرت اواصل الرسالة وواصلت بحثى..
يااااااه رسائل وصور
بخاف اقرب منها واقراها..
كلما ابدأ رسالة اختها فى مكانها..
رسائل من اصدقاء وصديقات
ومن حبيبى... معقولة الكلام ده كنا بنكتبوا؟ ولا كانت وهم؟!!
صور لىّ ومابتشبهنى.. ياربى دى منو؟ معقول الزول كان بيقرقر كدى يا آمال؟
سمعت ضحكتك المميزة والمفرحة فى بيتكم وشبيابكم المضروبة بوهية خدرا
وقعدت فى صالونكم وفتحت كتبتك واكلت الملوخية
الدنيا دى غريبة يازولة..
واحساسى بيها اغرب ..
حاولت اطلع من الحالة دى واقرأ لسه..
الرواية البقرأ فيها {السجينة} سجنتنى اكتر فى ظلم الانسان وبقيت خلااااص ماقادرة اقاوم
قريت رسائل وحكايات وشفت عم على قرموط- ربنا يديهو العافية- لمن شفتو فى مشيتى الاخيرة للسودان فى بيتنا فى الديم.. عمن عيونو وطريت جمال انسانو قامتو الفارعة وبنيته القوية وقطعة الواطة اللى اجرناها فى الديم فاضية كانت منو, عشان البنات يتلمن ويلمن امهن..
شفتى كيف يا آمال ناس الديم بيشبهو ناس كوستى؟
....
رسائل من اصحاب الدراسة.. عبدالرحيم حامد واحمد ابراهيم من ليبيا, بيحكوا عن احلامنا وامانينا اللى فطست تحت دبابة
رسائل مفروض تطلع فى كتب تحوى تاريخ الانسانية...
فكرت فى كل ده..
اتجولت معاهم فى كوستى لمن يجوا يزورونى فى بيتنا..
سمعت ضحكتهم وونستهم مع ابوى
وسمعت صوت ابوى بيناقش نقاش زولا فعلا بيقرأ ومطلع..
سمعت صوت الجيران..
وضحكة نوال حسن الشيخ
غنا منى اختى..
شفت سيد الغنم والبوليس الوسيم الكنت بريدو ريدة الله والرسول.. حلو كان يا آمال وصغير, ماعارفة الوداهو العسكرية شنو, جاء من دار حمر وسكن فى كورنة بيتنا وعيونه كانت سمحة وهادىء ومهذب.. ياحليل ايام المراهقة, ماخلونا نعيشها ببساطتها ورومانسيتها,,,
وفرقعت رسالة محمد اسماعيل بالونات روحى...
رسل لىّ نص اقراهو..
نص شفاف بيشبه روحى قبل ما تتورم وتتكدس فيها الاحزان..
حسع خبر استاذ الطاهر ده لقى ليهو فرقة كيف يتوهط فينى؟
ده كلو الجابو شنو؟
ياخ انا حزينة ومفقوعة بالاسى..
بكيت ومانفع
ضحكت وسخرت على القدر مدّ لىّ لسانو...
طيب اعمل شنو؟!!
قلت ارص الكلام ده- احرر روحى منو واقوم اشدّ سرج الامل اللى فضل....
|