{6}
رقصت الزيتونة
انفدعت فيها الاغانى وتهلل وجهها بمدائح الروح
غنى الفنان وتلك الصبية ام صوتا عجن,
قلبت الزيتونة مواجع الحلة الوراء واحلامهم فى نتائج مديدة الحلبة اللى اتكومت بجشع وراء
وراء وراء,,
وترترت لقدام ولوراء
واحمدو التقول ياكلها...
سليمانة يعلق مبسوطا, وووب علينا الما قرينا, يازول ماتخت الرحمن فى قلبك, ماكلها ساعات وبعدين الله يستر.
ام جعل تلكزو فى نص الحفلة, انت وكت عارف كدى مالك ماتتذكر الجرتق, والله مايقربها كان ماجرتقناها.
ساعة قطع الرحط نبلت حواية وانفنست فى وسط الدارة – انت قايل روحك بتتهنأ, تحسبو لعب, تدخل وتمرق على كيفك,
عاد بتقدر تفوتنا ووين, يانا قاعدين, عرسك وتميتو, بتجى, كلهم بيابونا لمن يعرسوا, يومين تلاتة ولا سنتين تلاتة بيجونا صادين, اها ترانا بنوصلكم السماء وعروسك خليها تنزلك الواطة.
صنت الحفلة, وجرت حواية البنبر وقعدت منتظرة قطع الرحط
الزيتونة كانت جوة بلبسوا فيها, لكن ام جعل مابتقصر, رصتوا ليها كلو
حسع ده وكتوا يا ام جعل؟
خلوها تتنور, حواية دى انا واطية جمرتها.
الزيتونة الكانت بتضوى زى الرتينة انطفت
لمعتها راحت
ووقفت زى عود الكهرباء الوحيد فى الحلة, احمدو مدّ يدو وجرّ الرحط, لفّ بيهو فى يدو وسط الزغاريد ورماهو لبعيد,
الرحط وقع فى يد حواية..
وكانت قصة, الكجور بدأت وفعائلها سرت من لحظة الرحط..
انتهت الحفلة
انتهت الصبحية والجرتق تانى يوم,
الزيتونة مطفية, احمدو يحلف بالطلاق ما بتشاركها تانى مرة فى حياتو, خاصة وانو تاب وزار بين الرسول علية السلام
اربعين يوم واحمدو يطلع يصبح على النسوان المنتظرات,
اربعين يوم والزيتونة تقطر روحها من الالم وهى قاعدة فى حفرة الدخان,
السعلوة تصرّ عليها تقعد اكتر
الزيتونة تعبانة ولكنها صابرة على الجمر القاعدة فيهو
كل يومين والسكة بتفتح والجرح مابتداويهو الاّ النار, يابت دى نار بشافها وطلحها
دندنت بصوت غائر فى بئر..
وازور بيت الخياطة...
يوم الاربعين كانت البليلة تغلى
ريحة الكجيك ملت الحلة, الليل انتصف,
صرخة مكبوتة اتخنقت قبلها,
زمجرة احمدو صحت الحلة الوراء والقدام
كانت الساعة تلاتة صباحا, وام جعل تتفتح عين وتغمض التانية, الصباح رباح واحمدو بيجيهن بالبشارة على المنديل اللى غزلتو الزيتونة... يوم داك تحت الشجرة...
وياطير ياطاير...
من بعيد فوق الغمام
من ربوعى احمل الشوق ياحمام...
اجنحة الحمام ولعت نار..
النار..
النار قامت..
النار كانت بتحرق فى الزيتونة, باقى جركانة الجاز كبتها فى جسمها المطلح بالوجع وروحها المشوفة بدخان نهايتها..
اتحرقت, ماتت الزيتونة, سمعت حياة امها تصرخ ووب علىّ من شبابك يازينة البنات..
وقفت حياة ترجف زى اخر لهبة فى روح الزيتونة..
وكان موكب الحزن المهيب..
كانت الزيتونة الحكاية الاليمة اللى كبرت بيها حياة وشالت جرحها جواها ومشت الدرب براها الله ورقبتها, ماخلاص البتحن عليها فاتت وماتت محروقة.. ماتت الزيتونة..
وصحت حياة لاحزان قادمة...
.........
.....
...
.
سعيد ولدتو حواية فى الشهر التاسع لغياب الزيتونة... قال راديو الحلة المتحرك....
ويتبع.....
|