[أبو أماني]

المشاركة الأصلية كتبت بواسطة نزار حسن علي

الوجيه
صباحك خير وفرح وسرور وكل المعاك والحولك والبحبوك
الجماعة عملوا خروج جماعى ولا شنو عارف ديل عملوا زي شنو زي المغتربين البقول ليك جيت نهائي
ربى
صباحك عسل
اظهرى عشان النكت كترت
تحفه حواء
صباحك عسل
نكته خاصة لك
قالوا واحد زوجتو كل يوم بتعمل ليهو قرع كره القرع يوم قال ليها علي الطلاق تعمل قرع اطلقك قامت كلمت جارته قالت لجارته ما بعرف اعمل اي شئ غير القرع قالت ليها خلاص دلعي القرع ولوني ملاحك ده قامت لونت ملاح القرع ولما جاء من الشغل شاف القرع عرفوا قال ليها ده شنو قالت ليهو ده قريع قال ليها طليقن
ودقي يا مزيكة

طبعا يا ملك الظرف والكياسة .. ما بقدر أجاري خفة دمك ونكاتك الظريفة دي لكين عشان أطلع الجميع من حالة الكساد المارة بالنشاط اليومين ديل بحاول أنجر ليكم مسرحية هزلية من فصل واحد تعالوا معاي للمسرح وعلى الله تعجبكم ..
* * *
المشهد الأول: -

** فلاش باك .. منزل أبو فادي :-
غرفة فادي وهو مع اللاب توب فاتح المنتدى هول سودانيات .. وطبعا فادي داخلة عليو شديد فكرة أنو النيكنيم بتاعي أبو البت وليس أبو فادي .. وحاقد على وصاريها لي إضافة لانو عنده عرق شايقي .. يقوم المقصوف ينادي أمه ويقول ليها تعالي يمه شوفي أبوي كاتب لبنات سودانيات شنو وشوفي هن بيكتبن ليو شنو؟ تجي زولتكم تقرأ مساجلات روبس وتحفة وسارة وطبعا تشوف الصور وكل ما تمشي لقدام العيون تحمر والخدود تنتفخ .. والأصابع تنكمش وتفرد بعصبية واضحة يلاحظها ولدي المتعاطف مع أمه دوما..وعلى طريقة أهله الشايقية يزيد النار إشتعالا ويقول ليها وتصوري يا يمة البنات ديل كلهن في عمر (توتة) اختي يعني في العشرينات كده .. وأنا شفت تحفة حواء مرة جاءت زارته في المكتب وأنا كت هناك .. وبخبث شايقي متوارث.. والله سمحة يمه جنس سماحة صدقيني يمه لو شفتيها.. تعذري أبوي طوووالي ويزأر أسدا هصورا داخل بيتي .. (أعذره؟ قال أعذره قال ..) يعذره يايابا البلاء اليخمو .. العجوز الشائب الما بخجل .. وتلتفت لفادي بنظرة تقدح شررا أسمع هنا ياولد أسمع كلامي ده كيوييييس..ما عافية منك كان ما حجرت على أبوك ده .. الراجل مخه طق .. بقي يساكك في البنات الفي سن بناته وأصغر ... مخيييييييير اللللللللله علي أنا .. الليلة عاد خليه يجي.. أكان ماوريته النجوم عز الضهر ... أماني تطرق في رهبة وخوف وتوتا (فاطمة) تحنس في أمها يمه عليك الله ما تتكلمي معاه إتي عارفه أبوي قلبه طييب وبوسامته دي النسوان بيتحنكشن فيه براهن والله تلاقيه أسع دي قاعد يجامل فيهن ساكت وما بقصد .. والله والله يا يمة أبوي ده ما بيحب مرأة في الدنيا غيرك .. وتزأر (عشمانة) حباو بورص .. خليه الليلة الليجي داخل هنا .. كان ما لزمته مواعينو !! وإبن الكلب .. فادي جالس على حافة الكرسي يتابع (شلعوها الخوالدة) واضعا على وجهه قناعا من الهم والجدية وهو في قرارة نفسه مبسوط 24قيراط ويتحرق شوقا للمشهد التالي .. ولسان حاله يقول في همس .. عشان تاني يقول أبو أماني وأنا قاعد!! ....
[align=center]ســـــــــــــــــتــــــــــــار [/align]

المشهد الأخير:-
أبو أماني أخر اليوم داخل البيت من باب الحوش البراني .. يدندن بأغنية من الزمن الجميل .. .. تراررررا را .. هلكني ملكني .. وجننني ..أهواك يا ملاك ..هواك ملكني .. وصوت أجش من هناك .. الجن بيتداوى ..كعب الإندراوة ...وجوم ..! تعقبه موسيقي تصويرية تمثل مقدمة ملحمة أكتوبر لود الأمين .. ثم تنطفي الأنوار وتسلط على المشهد كشافة عاكسة تعكس الظلال على خلفية المسرح..وفي الحائط يحكي الظل صورة لعمكم أبو أماني .. واقع على الأرض رافعا يديه وعملاق واقف على دماغه شاهرا يده لأعلى بمفراكة من نوع أبو كديس جاتني هدية من الحاج الله يسامحه .. وأصوات من قاع خلفية المسرح لأولادي الحلوين الله يديهم العافية وهم يناشدون امهم ويستعطفوها على طريقة العرب في الشجب والإدانة ويقولون لها .. يمه حرام عليك .. خلاس ما قال ما بيدخل النيت تاني .. خلااااس يمه .. عليك الله خليه .. غايتو كتر خير توتة بتي الصغيرة سمعت في اللحظات الحرجة ديك صوت عالي لبكائها الصادق وهي تمسك يد أمها بقوة .. وطبعا أنا ماسكت ليها .. هييييع .. أنا أبوك .. (آ فادي !..).. بعد رفعوني اولادي من الواطا .. مسكت ليكم الورقة والقلم وحررت خطاب شديد اللهجة .. لأبوها .. وقلت ليه بالحرف الواحد .. لو دي طريقة بتك في الحياة الزوجية ياعمي .. صدقني بتكتل ليها زول ...!!!! ..
[align=center]((ختام ))[/align]