[أبو أماني]

المشاركة الأصلية كتبت بواسطة شليل

ناس القهوة إزيكم..
الحاصل شنو ، و"حوض الرمله " إنشاء الله أكرمتوهو
شايفك يا وجيه دحرت العوين ديل كلهن ، عافي منك ، فضل ليك شوية فلول
أخوك اليومين ديل مدروش شديد ، لكن أكان العوين ديل عملوا إعادة تنظيم وإتلموا عليك ألكزني ، بجي أدافر معاك..
هييع ..أنا أخوك يا الكلس

معقولة بس يا شليل يا أخوي ومهما كانت مشغولياتك (المنزلية)! تخليني الله ورقبتي مع الأروبات الآرشانات التلاتة ديل؟ .. أسكت ساي ..(الثنائي ربا وسكينة) ما بقوا بلابل .. جابو ليهن واحدة تالتة .. أأي والله العظيم .. روبس وتحفة حواء ضموا ليهم فيلق ثالث بقيادة الجنرال (سارة) وكمان في الميدان بدلعوها يقولوا ليها (سرورة) .. يا أخي كان شفت سرورة دي تقول أخير أمال .. يا أخي لقت ليك أبو أماني واقف وسط السهلة الله ورقبتو ..ماناس قيقراوي وشبارقة باقي لي عادل عسوم (الخائن) حرش عليهم نسوانهم .. بقوا الشغل ما قع يمشوه ..!! والمصيبة سارة دخلت على أبو أماني بسلاح جديد اسمو .. (بعرتيس أرض جو) جابتو من حي القمائر بأمدرمان من فكي..سوري قصدي مصنع سلاح نووي.. وتعال شوف البقت على أخوك النصايب ديل لمنها في أم أماني كيف ماعارف؟ وفتوني ليها فتة بموية فول .. وقالن ليها الحقي راجلك يا الغبيانة .. كان ما سمعتي كلامنا راجلك بيزوغ منك .. والمسكينة صدقت وسمعت كلامن .. وأدنها ليك برطمانية كبيرة مليانة بعر تيس ناشف.. وفوقها ديباجة من برة مكتوب عليها بالإنجليزي ( Baa'r Tais Assly ) وقالن ليها أديو تلاتة بعرات في اليوم واحده الصباح والضهر والعشا .. مع الوجبات يعني وأقنعيو إنو ده أحسن علاج للرطوبة ووجع الضهر .. وفي الروشتة المرافقة للبرطمان مكتوب :-
How to kill your husband's heart & make him Ghanamaya

أسكت يا شليل يا أخوي كان ما الله وقف جبارتي ساكت وبالصدفة أكتشفت الملعوب ده كان زماني دلوقتي متل عادل عسوم ..جاري تحت كرعين أم أماني..وأسمع ليها في الغزل الرفيع زي إنتن الخير والبركة .. ونحن بلاكن ما بنبقى .. والما بخاف من مرتو ما راجل وأنا غيرك ما حبيت غير الفول بالزيت .. والكلام المايص بتاع ناس (شنكبة عنكبة داك) أخوك مفتح يحمد الله .. بشويش شلت ليك البرطمانية وجري على فكي (جبره) حكيت ليو بالملعوب من طق طق للسلامو وعليكم .. قام بدل لي البعر حق التيس ببعر غنماية (بيجية ماعندها قرون) وقال لي يازول رجعها محلها البرطمانية دي وأعمل روحك ما ناقش حاجة ويجيبوا ليك البعر أبلغ قلبك قوي وشوف البيحصل براك ..كان ما مرتك بقت زي الغنماية وتحت كرعيك ما تديني إيدك .. أها عليك امان الله أسع دي لي إسبوع قع أبلع في البلاوي دي والحق لله لقيت ليك المرأة بقت زي الخاتم في صباعي ..كيف؟ ما عارف والمحيرني لوني فتح وخدودي اتوردت .. من بليع البعر مع الوجبات .. وكمان لقيتو ليك بيفتح الشهية .. أسع دي قاعد إدعى لسارة بالخير والبركة بعد كل صلاة .. شليل .. شليل .. أرسل ليك حبة بعر؟؟ ولا ترجى الكوتة الجاية آخر الشهر؟
[align=center] [/align]