(5)
أتصلتُ بالمهندس المسئول وطلبت منه الحاق وليم بالعمل معهم فاستجاب مشكورا...
عند قدومي في الصباح استقبلني وليم هاشا باشا ولكأني به يريد أشعار بقية العمال (وجلهم من أهلنا النوبة) بأنه أكثر قربا منهم الى صاحب المنزل...
واذا بميري تناديني من بعيد ...
فذهبت في اتجاه (راكوبتهم)...
كانت ميري في قمة أناقتها وهي تتزيا بفستان مخطط بالأحمر والابيض (سيجنال 2)
-عمو عادل أنا عملت ليك شاي عليك الله تعال واشربو
-مابطال لكن ماكان في داعي للتعب ياميري
-تعب شنو ياخي والله انت تستاهل كل خير
جلستُ على (العنقريب) ارتشف الشاي وجلست ميري تتصفح جريدة الخرطوم التي نسيتها لديهم بالأمس.
-بتحبي تقري الجرايد ياميري؟
-والله بحبها جدا لمن ألقاها خاصة جريدة الخرطوم دي
-أكتر حاجة بتحبيها في الجريدة شنو؟
-بحب الصفحة الأخيرة البكتبو فيها الخواطر.
-تاني هواياتك شنو؟
-بحب الأذاعة جدا ودايما باستمع لي اذاعة أمدرمان
انتبهت الى أن ميري تمتلك خامة صوتية جميلة
وهي فوق ذاك صاحبة لغة عربية جيدة وتتميز باجادتها لمخارج الحروف
-لو لقيت ليكي فرصة وظيفة في الأذاعة أو التلفزيون عندك مانع؟
-والله دة مانع دة؟...قالتها وهي تضحك
جعلت من أمر توظيف ميري في الأذاعة أو التلفزيون أحد أهداف أجازتي ...
بحمد الله أثمرت اتصالاتي بالأصحاب لتنضم ميري الى اذاعة أمدرمان من بعد أن أخذت منها موثقا بعدم انقطاعها عن الدراسة المسائية ...
وانتقلت ميري بأسرتها ليصبحوا من سكان أمدرمان
(انتهت)
التعديل الأخير تم بواسطة عادل عسوم ; 17-08-2009 الساعة 07:55 AM.
|