[مكي محمد الحسن]

المشاركة الأصلية كتبت بواسطة محمد الفاتح أبوكنة

الاخوه الأسايطة الأعزاء كل عام وانتم بخير وعيد مبارك عليكم
عزيزي ود البيك لك التحايا والود ونشكرك على تكبير الصورة عشان الغلاط ما يكتر انت عارف انو في ناس قاعدين للغلاط . لكن ياود البيك الصورة بعد كبرتها ماعرفت فيها غير اتنين بس وواحد غلط كمان (الغلاط بدأ) عموما الصورة تبدو تخريج تربية دفعة 1989 واليك بعض من تعرفت عليهم . وقوفا من اليمين في اعلي الصوره عمر الأزرق، اسامه مامون ، عبد الرحمن الأسد ، وفي الوسط جمال محمد مصطفى ( ابودقن) وفي أقصى اليسار فايز ، محمد مختار ، عصام جاويش ، وفي الصف الوسط الثاني من اليمين هو العلم مكي محمد الحسن (وهل يخفى القمر) وأعتقد يمينه سلوى حسن حسين ثم سلوى عثمان سعيد وجميعهم من تربية. أرجو من الأخ مكي أو أسامه مامون ان يكملوا الصورة لأنهم حضور فيها

السلام عليكم يا صعايده
كل سنة وانتم طيبين ..وان شاء الله دائماً عامرين.. وبي صحة وسلامة تامين..
ومن مرض الزهايمر شافين ..اللهم آمين

الاخ ود ابوكنه عيد مبارك ان شاء الله لك وللاسرة
عندي 3 ملاحظات :
أولاً: لاحظ انو الصورة دي لخريجي برالمة 1986 وهي في العام 1990
ثانياً: ذكرت أسماء ناس غير موجودين بالصورة وآخرين صحيحة بس الملاحظ
انه أعراض ( الزهايمر المبكر ) بدأت معاك لانه ببساطة كده لو راجعت صورة
تخرجك حاتلقي معاك الاخت ( سلوي عثمان سعيد ) من المتخرجات وهي من الدفعة
القدامنا بسنة!!
ثالثاً: أرجع البصر كرتين ثم أرجع البصر كرتين ..عليك الله الذكرته ده أنا ؟؟؟

مرجباً بالخ نزار يوسف شقيق أبراهيم يوسف - تجارة وعلي ما اذكر في ذلك الزمان
كنا نقول لهما ثنائي الزمالك نسبة لابراهيم يوسف وشقيقة اسماعيل يوسف لاعبي الزمالك.

مرحباً بالاطلالة الكريمة والمتأخرة للأخ رأفت ميلاد
ويا شقيق أسيوط دي بالتاكيد لو كنت بتزور مصر تكون أديتها طلة ..
أو ما جاورها من القري ..واذا كنت من الأقباط المتدينين بتكون ( حجيت )
الي قرية القوصية وزرت الدير هناك..ده لو ما كان عندك فيها بعض من أقارب أو أصدقاء
وبعدين تعال نصحح ليك ملاحظتك ..ما ود البيك براهوا القاعد يتحاوم بي مداخلات أو بوستات
في سودانيات واليك شخصنا والاخوة شبارقة وكيشو وكباشي والزوول ود.محمد ابراهيم قرض
والقاص عبد العزيز بركة ساكن ..الخ كلهم من هذا الصعيد الجواني..
ودمت بي صحة وعافية يا مريخابي..