[سارة]

انا بعد قلت ما بدخل البوست دا دا لكن الكلام حارقنى واحد قريبن لينا وفاكيها فى روحو شديد

وهو ليهو شلاضيم علا القرش يا قول حبوبتى ( القرش معلى مقامو ) المهم مشى عرس

صاحبو فى الخرطوم الشجرة وشاف ليهو واحدة عليك امان الله تضوى زى الرتينة والشعر

لافاهو كعكة زى وقاية الزير المهم اتشعلق واصر والح الليلة ما ينوم الا البنت دى تصبح

خطيبته قدر ما شالوهو وختوهو اتيمن واتنضر المهم اخواته قالن ليه سمح وامه متوفيه الرحمة

وسادتها المهم مشوا الاخوات تانى يوم لاهل البت واتكلموا بقصد التعارف ووعدوا بالزيارة

بعد تلاتة ايام المفروض هو يمشى يشوفهم ويسلم عليهم بس صاحبو العريس لانه بيعرف

بت حلتهم وعارف التقليد والصناعى وكل قطع الغيار قال ليهو تعال اتغدى معاى انا اصلى

مسافر شهر العسل وبيت البت قريب مننا وافق قريبى المشوطن ومشى لصاحبه قبل مواعيد

الزيارة المزعومة وفى نص النهار ساق العريس قريبى وقال ليهو تعال معاى مشوار

يقوم العريس يودى اخينا لبيت البت السمحة ويدقوا الباب تفتح الباب واحدة ليها كيعان زى

كيعانى ديل وشعيراتها مصرورات من شافت صاحبنا قفلت الباب وجرت جوة .يجى اخوها

اتفضلوا اتفضلو قام العريس قال ليهو لا شكرا بس حبيت اقول ليكم صاحبى بجيكم فى الميعاد

وطبعا قريبى زى الاطرش فى الزفة...احلى حاجة انه ما اتعرف على الخطيبة .... رجعوا بيت

العريس ولما العريس شرح ليهو الحكاية قرررررررررررررررررب يموت من الصدمة

وجانا فى البيت حلف واقسم قال لى والله يا سارة الكعكة الكانت لافاها بى وراء شهيد الله شفتها

قدر زرارة القميص وتاب التوبة يا حبوبة

قال قطع غيار قال اللهم لا تمحننا لا تبلينا