اقتباس:
المشاركة الأصلية كتبت بواسطة مي هاشم
فائقة العزيزة وكل من تداخل
سلام..
أولاً..لست ضد "قطع الغيار" إجمالاً، فهي مثلها مثل أي وسيلة تجميل.تجمييييييل ما غش وتقبيح..
مثلاً العدسات اللاصقة وهي وسيلة تجميل لطيفة جداً(خاصة للعموش الزيي)فهي تعطي بعد جمالي للعين والوجه إن أُحسن استخدامها، وقد تصبح الواحده "زي الكديسة" أو "البعاتي" إن أساءت الاستخدام.والباروكة والرموش وكل وسائل التجميل كذلك، حسب الاستخدام.
أما الصدّور -جمع صدر- والأفخاذ والـمؤخرات الصناعية دي ماااااااا حبيتها،زي الكريمات البتسلخ الجلد وتبرط الواحده، غايتو إلا إذا الواحدة نفسياتها ساءت وحبت تحس إنها جميلة "حسب فهمها" ساعتها ممكن تستخدمها، وده الحاصل في مجتمعنا للأسف، الواحده كان بقى لونها "أزرق"أو حتى أخدر أو أسمر تعتقد انها ما جميلة، حتى إذا وشها بقى أبيض وباقي جسمها بباقي الألوان الذكرناها فوق دي!!!
وبسبب التقليد والجري على "قطع الغيار" البنات كلهن أصبحن نفس الشكل، مافي وش "أزرق" بفضل الكريمات و"غيرها"ومافي شعر "تِفّة"بفضل البواريك وكريمات التمليس، ومافي جسم ما مقسّم بفضل "المقدمات والمؤخرات المطاطية" المتوفرة بجميع المقاسات، ومافي بت ........ بفضل العذرية المتوفرة عند الباعة وبأرخص الأسعار..جنس محن!!
المحيّرني انه الناس عارفة الحاجات دي "خاصة الرجال" وبرضو كايسين السماحة؟؟يعني كلام الخال صحي..كلّو من الرجال.."لالا ما كلو "!!
ده كلو هين ،كمان حبوب السمن والضعفة دي كوم تاني، حدثت الكثير من الحوادث ،أحدها لواحده اعرفها شخصياً توفيت لرحمة الله إثر تناولها حبوب تشحيم، أدخلتها في غيبوبة لم تفق منها، أجاركم الله..لماذا تعرّض الفتاة نفسها للخطر؟؟
خليكم من الخطر الكبير ده، لماذا تتحمل المرأة ألألم في سبيل الجمال؟؟؟
بدأً من شيل الحلاوة، والدخان، وقعدة الحنة، وغايتو...تعب شديد..لمنو؟؟  |
العزيزة مي هاشم
لسنا ضد قطع الغيار بس تخيلي الحكاية بقت مرض وهوس لما البنات إتشابهن والمشكلةهي التقليد الأعمي دون الإنتباه لفكرة ما يناسبك ومالايناسبك..
العذر أن النساء يبحثن عن الجمال لكن بتوازن وحتي الجمال نفسه درجات ونسب فما تراه أنت جميلا وملفتا فسيراه غيرك عاديا جدا بس منو البقنع البنات ديل
النسوان بقولو االرجال هم السبب كل واحد منهم عاوز مرة بيضاء وكلبوظة وشعرها طويل مش معاهن حق يستنسخن المواصفات دي بالمتاح حتي لو كانت آثاره قاتلة ومدمرة للصحة كحبوب التسمين وكريمات التبييض وارد جنوب أفريقيا ونيجيريا الكارثة مش في قطع اغيار التركيب فحبوب التسمين أصبحت تقوم بالمهمة علي أكمل وجه بداءا من الأرداف والمؤخرات والصدور و السيقان وأعلي الذراعين حتي نفخ الوجه بحبوب إسمها زعلان مالك طيب يارجال إنتو زعلانين مالكم مش التعب دة كلو عشانكم حظكم مافي بت بقت شينة ..