[أبو أماني]

المشاركة الأصلية كتبت بواسطة مجدي مسعد حنفي

دي شنو دا ياابواماني ويافتحي
انتو دخلتوا هنا بالغلط ولا شنو الحاصل
انتو قايلين دا بوست جدي التاريخ ماخليتو الحي ولا الميت
غايتو مابغفر ليكم إلاّ ترجعوا البوست لمسارو الصحيح
يعني كل واحد فيكم يشعر شوية شعر من راسو عشان نشوف
منو فيكم اشعر من التاني

والله زول يكتب شعر جمبك يا فاكه منو يا ما ناقش .. وأنا اللتنين بينطبقن على .. أها أستفز ليك أخوك كان يأنس في نفسه الكفاءة مرة في حياتو ويساجل معانا .. دي محاولة شعرية متواضعة أيام الثانوي العالي.. بت إسمها (سيدة) من الأبيّض (عروس الرمال) جات تنفس أختها جارتنا وصارت معرفة جيران وعلاقة حميمة بناس البيت وشفتها .. والنارية إنطلقت في اخوك .. لكين هو جنس شئ يا مجدي .. جمال شنو وشعر شنو وعيون بقر حقت منو .. وقوام شنو؟؟ وخفة دم وأسلوب ظريف في الكلام.. وأخوك خلى الشلة ومرقة النادي كل عصرية.. وبقيت مصاقر ليك البيت على أمل شوفتها .. (أسع المرة دي كان قرت الكلام ده أنا يكون موقفي شنو في هيئة الأمم المتحدة؟).. ياسيدي اللمنتي ليك .. قامت قصة ريد ظريفة بيننا وعشنا أيام حلوة بمباركة العمة ورقابتها الصارمة .. وشعت جذوة الحب العارم .. ونحن في غفلة من الزمن .. جاء اليوم الذي فأجاءتني فيه العمة بأن (سيدة) مسافرة بكرة .. الأبيّــض .. وأخوك مانام اليوم داك .. كتبت .. قصيدة غنائية غناها الهاوي صديقي ( حمدين حامد الطيب) إسمها ..
جـدي الأبيـّــض
س. سفرك ما بنطيقو .. يا الساكن بعيد
ي. يحرق في قلوبنا .. ونيرانو بتزيد ..
د. دايرنك حدانا .. يوم داك يبقى عيد
هـ هان عليك فراقنا ونحن ليك بنريـد
* * *همك في السفر .. وفي قربك هنانا ..
من بعدك وحاتك .. المنام جـافانـا ..
القلوب تهواك .. وللقاءك .. لهفانة..
ونحن ليه بنريدك .. وإنت ليه تنسانا؟
* * *
يا جدى الأبيّض يا الساكن .. بعييد !
ريدك في قلوبنا .. نيرانه .. بتزيد ..
دايرنك حدانا .. يوم داك يبقى عيد ..
هان عليك فراقنا .. ونحن ليك بنريد.
* * *
المقطع الأخير نسيتو .. بس بالبحث يمكن القاه .. أعتذر لتواضع النص الشعري بجانب الدرر التي طرحها الحبيب خلودي .. بس عزائي صدق الكلمات .. ونقل النص بحذافيره دون تعديل. لنا عودة في هذا البوست الرائع ..

ملحوووزة : تكررت أبيات أعلاه يبدو أن الذاكرة خذلتني .. عموما هي بادرة ..تشاووو