[عكــود]

[align=justify]خالد،

سلام وأشواق ..
مرّة وأم العيال راجعة من السودان وأنا هنا بجهّز في البيت عشان يليق بالمقام، جاني واحد زيارة من ذوي الجلاليب القصيرة والمسواك.
بعد السلام وحق الله بق الله سألني الجايي مع المره منو؟ قلت ليهو جايه براها (الزمن داك ما كان في أولاد)، قال لي ده لا يجوز، لازم تكون برفقة محرم، قلت ليهو، أخوها حيوصّلها مطار الخرطوم وأنا بقابلها في مطار أبوظبي، قال برضو لا يجوز .. وفي الطيّارة؟، قلت ليهو وقفت علي مدّة ال 3 ساعات الفي الطيّاره دي .. يا زول لو حصل لها شي في الطيّارة أو سوّت لها شي، أنا عافي ليها لوجه الله تعالى.
مع العلم هو متزوّج ويعيش في الإمارات عزّابي (زوجته في السودان) ويمشي إجازة في السنة مرّة واحدة. طبعاً سألتو إن كان ذلك يجوز، ردّ علي رد غير مقنع وجهجه الموضوع وما عصرت عليهو أكتر من كده.
قد لا يكون ذلك من صميم موضوع البوست، لكن بالتأكيد بيعكس نمط من التشدّد الما في محلّو .. من أناس كل حوائط بيوتهم من زجاج.
وقد أعجبني رد أحد الشيوخ في برنامج على الهواء كان يتحدّث فيهو عن كبائر الذنوب، واحد إتّصل يسأل عن حكم سماع الغناء، الشيخ ردّ عليهو : دعنا نتجنّب الكبائر أولاً، المتصّل أصرّ عليهو "لكن يا مولانا، لو سمعت لي شريط غناء وأنا في عربيتي فيها حاجة؟" ردّ الشيخ، ياخي فلنترك الغيبة ونسمع الغناء، فلنترك أكل مال الناس ونسمع الغناء، فلنترك شرب الخمر ونسمع الغناء، فلنترك الكذب ونسمع الغناء. فالغناء حتى وإن كان بعض العلماء قد حرّموه، لا يعدو أن يكون من الصغائر.

شيخ مصري من المتشدّدين وهو بيتكلّم عن حرمة الغناء وعدم جوازه، نطّ واحد من الحضور سألو:
"حتى غناء الست أم كلثوم يا شيخنا؟"
مولانا الظاهر كان من النوع البيسمع بالدس والست فنّانتو المفضّلة، ردّ عليهو:
"لا بقى، الغناء ده حاجة، وأم كلثوم دي حاجة تانية خالص"


قلت لي سبيطة الموز وغابة السنط؟
يعلم الله إنت كان يلقوك من شجرة طلح لي أختها،


عكـــود[/align]