[فتحي مسعد حنفي]

بصراحة أنا في حاجة ما قادر أفهما..هل احنا بنناقش حبا في النقاش ولا عشان عندنا راي مخالف عايزين نوصلو وندافع عنو
ناس يقولو النقاب فرض وناس بقولو لأ.. ناس بدافعو وناس بيخالفو..
طيب دا كلو ليه..ياجماعة اتعلمنا ان الخلاف في تعاليم الاسلام لو ما وصلنا فيهو لي نتيجة.مفروض نرجع لكتاب الله وسنة رسوله الكريم..والحلال بين والحرام بين..بس دا ما بيمنع اننا نفكر وعشان نفكر بالذات في ما يخص الملبس والشكل الخارجي للانسان أحسن حاجة نشوف الحجاج بيكونو شكلهم كيف في الحج وبالذات بالنسبة للنساء وما أفتكر رب العالمين حيسمح لي امرأة تجي تحج بي لبس غير السمح بيهو..وربنا لوالنفاب فرض كان أمر النساء يحجو متنقبات.والشي الأنا بعرفو انو ربنا سمح للمرأة بكشف الوجه والكفين وتغطية الباقي..والشايفة روحا جميلة بصورة ملفتة ممكن تغوي الرجال فلا مانع من النقاب خوفا علي نفسها ورفقا بخلق الله..وأنا أتحدي أي زول يجيب لي نص في القرآن بقول المرأة تتنقب وحتي الآيات الحاول البعض التدليل بيها ليست صريحة وحاول البعض تطويعها وتفسيرها بما يوحي بأنها تتحدث عن النقاب..
غايتو يابناتي الدايرة تتنقب ما تخاف من زول والما دايرة تتنقب برضو ما تخاف وما سمعنا بي واحدة من أمهات المسلمين كانت منقبة..وفي رواية عن سيدنا علي بن أبي طالب رضي الله عنه عندما اختلف مع السيدة عائشة رضي الله عنها هددها بقطع رأسها وقال لها رسول الله عليه الصلاة والسلام قال من مات بسيف علي فهو الي النار..فردت عليه السيدة عائشة وهددته بكشف شعرها وقالت له وأيضا قال من رأي شعر الحميراء فهو في النار.لاحظوا انها قالت شعر الحميراء ولم تقل وجه الحميراء..
وكفاية كدا ما تودوناش في داهية