[جيجي]

جيجي
حارنات خطاك
حالفات يمين
رسلته شوقك من بعيد
متخفي زي جاسوس كمان
ما خايف الشوق يتكشف
ويدخل كمان زنزانة في عمق الزمان
ويفضل حبيس
مرهون خطاك
وتصبح رهين المحبسين
لاشوق لا حظ
لاتفوت بلاك
لاتلم وديعاتنا الحنان
لايعم شروق
ولاحتى ترجع لى سواك

سجمان......

المطرة جاسوس السحاب..
والنار فضيحتا في الرماد..
خطايا مارست التسكع..
ساساقا منك وجاي ليك..
والباب موارب لزاهو شوقي
لا اتحمحمت لا دقيتو باب..
وما ندهت دخلت توش..
والجلسة كانت عامرة بي
ودعاتك إنتي وحظي فيهن..
كيفن بفوتن وعاد أقبل لليباب..
شرقانة عيني وانبهر جلدي
شعرتو (كلّبت)
كيفن بفوتن أو أشيلن..
أو أجيد في وصفي قولن
والجيد محزز خيزران
وفيهو منضوم الودع
بس خلاس ..
الشروق الكايسو بان..

-----------