[الفاتح]

المشاركة الأصلية كتبت بواسطة بابكر عباس

شليل سلامات و عوافي
ياسر عرمان يدعو للدولة العلمانية و شليل يعلن علمانيته..
هل يستطيع الذين يدعون الى قيام الدولة العلمانية، إعلان تصورهم لهذه الدولة للمواطن العادي من غير "قتقته"؟
يعني لو في زول من كمير العوضية سألك يا شليل و قال ليك: يا أخينا بعد تفوزوا في الانتخابات، قانون الأحوال الشخصية نواين تعملوا معاهو شنو؟

دابر أقول: الكلام عن الدولة العلمانية مجرد كلام "فاضي و خمج"

إزيك يا بابكر..
ممكن لو سمحت تشرح لي
المنهج الإتبعتو
عشان تصل لنتيجة( إنو الدولة العلمانية مجرد كلام فاضي وخمج ) ؟
بكل أسف يابابكر إتبعت نفس الآلية البيلجأ ليها الإنسان المتخلف ( صاحب عطاء الخطاب الفاضي وخمج)
آلية اليقين الذهني والحسم الفكري
بدون ما تدي المحاور فرصة يطرح/يدافع عن رؤيتو
بل بتظهر لي إنو إنت مافي حوجة عشان تعرف
نتيجة حواري مع الزول بتاع

كمير العوضية سألك يا شليل و قال ليك: يا أخينا بعد تفوزوا في الانتخابات، قانون الأحوال الشخصية نواين تعملوا معاهو شنو؟

وده في حد ذاتو كسل ذهني
أسهم/ ولا يزال يسهم في إنو يكون مواطن ( كمير العوضية )
بيستقي الإجابات الجاهزة دي عبر الثقافة السماعية
إللي ما بتشحذ ذهنو وتخليهو منفتح على كل الإحتمالات.
---
عموماً بقول لمواطن كمير العوضية ( وبتمنى تاني ما أرجع لقانون الأحوال الشخصية ده تاني عشان ما أحوًر موضوع البوست ): بقول ليهو :

إزيك يا الأخو.. ونعلك طيب.. اليوم حابي أناقشك في موضوع مهم جداً بتمنى إنو تستمع ليهو شويه وتديني رايك فيهو.. الموضوع ده ده حول قانون الأحوال الشخصية .. وطبعاً عارف قانون الأحوال الشخصي بيتكلم عن شنو عن الأحوال الشخصية البتدور في المجتمعات الصغيره من عرس ، وطلاق ، ونفقه ،وميراث.. وعارف إنو القانون ده ما نص ديني ثابت ، بل إنو كل مره بيتغير.. يتغير لشنو عشان يلبي أسئلة الناس اليومية وبالتالي هو في حالة تجدد دايمه..
أها يا الأخو .. إنت عارف إنو القوانين دي وضعيه ، وضعوها بشر.. والبشر ديل فيهم الزول الكويس وفيهم الزول الكعب.. الزول الكعب هو الزول البيسن قوانين تقيد من الحريات عشان يحقق بيها حاجات سياسية .. وبيتناسى العداله الموجوده في كل الكتب السماوية..
وده كلام ما صاح.. إنت كوالد ، كأخو مفروض تتطلع على القوانين دي، وتحتكم لضميرك:
هسه بتكون مبسوط إذا كان أشار القانون في تعريفو للعرس بإنو عقد بين راجل ومره وبيحل للطرفين إنو يستمتع بعض ؟
- المشكله وين.. أنا بعرًس عشان شنو
- نعم تعرس عشان تستمتع ، لكن ما لدرجة إنو الماده دي تختزل العرس في شغلة متعه وخلاص .. القصه أكبر من كده ، وين الموده والرحمه وتكوين الأسره؟
- معاي في النقطه دي
- ....
- خليك من ده ، إنت بتكون مبسوط إذا عرست ليك زوله ما دايراك ؟
- لأ
- طيب أها الحاجه دي في قانون الأحوال الشخصية إسمها الولايه ، دي بتجيز إنو أعرس لفلانه الفلانيه بدون ما تكون عارفه الحاصل شنو.. هسي الكلام ده عادل في ذمتك ؟
- لأ
- رايك شنو إذا غيرناها.. على الأقل عشان نضمن إنو الطرفين متفقين ونقلل شويه من نسبة الطلاق..
- كويس
- عارف إنو القانون ده ما بيحدد سن العرس ؟ عارف إنو القانون ده متساهل في قصة الطلاق
وما خاتي حماية للمرأة في حالة الطلاق المتعسًف البدون مبررات ، بل إنو بعد ده كلو ما منصفها في النفقه وما محدد كم
-...
- عارف وعارف وعارف ...
- جيب من الآخر.. برنامجك لي شنو ؟
- أعيد للمرأه إنسانيتها وأعدل في القانون ده البيتعامل معاها كماعون بتاع متعه ، أبطًل زواج الإكراه ، وأكون حريص على إنو الزوجة توقع في القسيمة بكامل رضاها ، أخضع قضايا الطلاق للمحاكم ما لمزاجية الزوج وأضع الشروط القاسية ، أمنع زواج الأطفال ، أحدد النفقه البتكفل للزوجة بني آدميتها ...

ده حوار ناجرو على الهواء مباشره
قد يكون الزول البناقش فيهو بيلوك ليهو في عنكوليبه وسرحان بغنم إبليس وما شغال بي الشغله
وقد ألقى تجاوب منو.. قدرت أغير حاجه الحمد لله.. ما قدرت .. الأجيال اللي بعدي قادره على التغيير..