[فتحي مسعد حنفي]

المشاركة الأصلية كتبت بواسطة خالد الصائغ

وافر الود و خالص التقدير عزيزي فتحي

ما في أي غرابة هنا يا فتحي

الأقباط سودانيين أصليين زيهم زي باقي السودانيين

تعرف ياخالد كلامي دا لما قلتو كنت عندي أسباب كانت علي غريبة الوقت داك..
أنا جيت القاهرة عشان بعد ما رجعت السودان بي أولادي لقيت العيال ما قدرو يتحملو الأوضاع الصعبة في السودان الزمن داك.فاضطريت أرسلم القاهرة عشان الدراسة ولحقتهم بعد تلاتة شهور..
طبعا عملت زي السودانيين وقعدت أفتش في السودانيين عشان أعمل معاهم علاقات لصعوبة العلاقات مع المصريين لي زول معجون بي موية وتراب السودان..
المهم سكنت في مصر الجديدة ولقيت فيها بعض العوائل القبطية ..واحد عندو مكتبة وواحد عندو سوبر ماركت وواحد عندو محل دراي كلين..الجماعة ديل رحبو بي بي صورة غريبة جدا أنا ذاتي استغربت ليها وبعد ما بقت العرفة صداقة دخلنا في الونسة عن السودان ولقيتهم كلهم مستنيين متين الأوضاع تتغير عشان يرجعو بلدم السودان مع انو أقباط السودان كلهم من صعيد مصر يعني قاعدين في بلدهم.
أها بعد مدة اتعرفت بسودانيين أولاد بلد ولاحظت ان كلهم بدون فرز بفكرو في الهجرة لي أمريكا وأوروبا عشان ياخدو جنسية البلاد ديك والأقباط أكبر أمانيهم الرجوع للسودان حتي لو عاشو في مستوي أقل.والقبطي رأفت دا مثال حي عشان أنا ما لاقيت سوداني بحب السودان زيو ولا محافظ علي تقاليد وطباع السودانيين زيو...تفتكر ما لي حق أستغرب ياخالد..وبالمناسبة ما الأقباط بس.كل الأجانب العاشو في السودان بما فيهم الخواجات حبهم واخلاصم للسودان أكتر من سياد البلد ذاتم..أنا نزلت مرة في أثينا في فتدق صاحبو يوناني من الكانو عايشين في السودان الراجل دا كان بيحلف ما يشيل الحساب الا بعد شكل ودا ما كان كشكرة لكن بصدق وعفوية سودانية أصيلة مع انو كان بتكلم عربي مكسر زي أغاريق السودان..وكدي شوف الهنود العايشين في السودان وقول لي رأيك شنو في انتماؤم..