[أميرى]

رأفت سلامات...
انا كنت ساكن فى البيت المرقم 5 غرب طلمبة الغالى والموضح فى الصورة...


الديم وطن جميل كنا فى طفولتنا بنستحى نقول نحن من الديم عشان الكلمات الكانت مشاعة الوقت داك بنات الديم صـ...بعاينوا بالشبابيك...والديامة حطب القيامة...
لقينا اللجنة الشعبية ولا منو ماعارف سمى حينا الخرطوم جنوب انبسطنا وسقنا فيها...
مع الديامة نقول ديامة ومع اولاد الراحات واولاد نمرة 2 ونمرة 3 نقول نحن من حى الخرطوم
جنوب...
سنة 88 كانت سنة كارثة على الديم احياء كاملة تساوت مع الارض ...
لسة بتزكر مظاهرة ضخمة للجياع طالعة من الديم وماشة على الخرطوم وفى طريقها
اتوقفت فى مركز الختمية كان فى اربعة شاحنات محملة بمواد الاغاثة عايزين يخزنوها
فى المركز ويتم بيعها بعد داك (انت قايل الكيزان براهم البتاجروا باقوات الشعب؟)
الجماهير نساء واطفال ورجال هجموا على الشاحنات بوحشية وجوع وشالو نصيبهم
حمرة عين وضراع....المشهد دة شفتوا وانا طفل صغير نال يومها بعض الضرب
وكثير من مربى الاغاثة....

ـــــ
على فكرة الديم صار درجة اولى اراضيه بمليارات الجنيهات
أما سكانه الاصليين فتاهوا فى ضواحى ما..
ستلقاهم هناك يملؤن الكلاكلة والاسكان الشعبى والازهرى
والسلمة وعيد حسين.........وكثير من التعب

واصل ياخ