[خالد الحاج]

التلغراف الثالث ..
والأخير...

(البغلة في الابريق)

بعمر موقع سودانيات ونسبة لانتمائي "السابق" والمعلن للحزب الشيوعي تجمع عدد منهم وانضموا للموقع .
صار الموقع يساري السمة والطابع وربما المنهج .
رغما عن هذا سعيت مع إخوة أعزاء بذلوا جهودا لا تنكر إلي تحويل الموقع وخاصة منتديات الحوار إلي كيان دمقراطي.
يقبل الآخر. يبذل الحريات .يتساوي فيه الجميع إدارة واعضاء أمام قانون سنوه وارتضوه باستفتاء حر مباشر بمساعدة سستم "الفورم" وينتخبون إدارته .
شروط العضوية تتطلب ثلاثة بنود :
* الاسم الحقيقي ثلاثي "ثم اللقب إن أراد العضو" .
* الموافقة علي قوانين الموقع.
* العنوان .

لا نسأل طالب العضوية عن انتماءه السياسي.
لا نسأله عن دينه أو معتقداته .
ينتمي العضو إلي الموقع ثم نستبين انتماءه يعدها ولا يغير ذلك من وضعه . له ما لبقية العضوية وعليه ما عليهم .
ضم منتدي الحوار عدد متباين من العضوية من مختلف الانتماءات الحزبية .
فيهم البعثي ، الشيوعي، الاسلامي "مؤتمر وطني" ، حزب أمه ، اتحاديون ، جمهوريون ، حق وأغلبية غير مسيسة .

كل هؤلاء كانوا هنا ولا يزالوا .. يتحاورون ، يتسامرون يختلفون كأي مجتمع فيه ما فيه من تجاذب وتنافر .
ما ضاق ماعون سودانيات علي احتواءهم .
حتى قبل أسبوعين ....
وصلني عبر بريدي ايميل من الأخ بدر الدين يطلب عضوية.
تقدم باسمه وعنوانه ووافق علي قوانين الموقع .
تم منحه عضوية .
ما كنت والله أعرفه ولم أقرأ له إلا بعد ما كتب هنا في منتدي الحوار.
فجأة علم الرجل أن السيد محمد حامد جمعة تم فصله من سودانيات وباستفتاء للعضوية .
علم ذلك من أحد المداخلات في بوست له .
افترع بوستا يتسائل فيه عن تفاصيل ما جري لجمعة .
رددت عليه موضحا :
http://sudanyat.org/vb/showthread.php?t=13896

أرسل الرجل لي رسالة داخلية حملها رسالة من العضو القديم في سودانيات علاء الدين
جاء فيها "اعتذار لشخصي عن تفاصل نزاع سابق وطلب لكلمة مرور" .
رددت علي بدر الدين:
هذه هي كلمة مرور عضوية الأخ علاء.
لا حوجة لاعتذاره والأمر بالنسبة لي غير شخصي ولا توجد غبينة .
جاء الرجل وكتب بوست يعتذر فيه لشخصي الضعيف .

فجاة تحركت قرون استشعار الإخوة زملاء الأمس..
تحرشوا بالرجل وفيهم من شتمه . وهو يرد بالحسني.
تحول الأمر إلي "الحيطة القصيرة" ..
ود الحاج جاب الكيزان .
الخال يحارب الشيوعيين بالمتأسلمين .
ثم أقرب الناس يتهمني في بوست بأني "بقيت كوز" !!!

فجأة تلقيت رسالة من عضو من زملائي السابقين هنا نصها :

المشاركة الأصلية كتبت بواسطة *****

عاين ياخالد الحاج
انا بقى عندي رأي ورغم اني وعدتك لكن بالجد مابقدر اوفي وعدي ليك
انت ياخالد مشكلتك مع الشيوعيين عملت ليك ارتباك في حياتك وطريقة تفكيرك وبقيت ماقادر تصحى وتفكر صح وحقيقي انت مخك مافي مكانو وماقاعد تفكر صح ومندفع وبقيت عدو نفسك وعدونا جدا

...مشاكلك مع الشيوعيين خلتك تجيب الكيزان وتمسح بينا الارض قدامهم ...وهم لو جو في ظروف طبيعية انا ماعندي مانع بس انت حقرتنا كلنا وبتحاول ترد اعتبارك عن طريق اهانتنا انا وجيلي وامال وحاتم وشليل وكل اصحابك
ياسيدي اشبع بي سودانيات
انت عندك محاولة لي وضعنا لقمة سائغة للكيزان ونازل مهادنة معاهم وماقادر تسامح عم فتحي ومسحتا بيهو الارض دون مراعاة لي سنو وبصراحة دي واقفة لي حلقي ماعارفة رأفت عايز يعمل معاك شنو لكن انا ماعايزة اتقدم ناحيتك ولا خطوة وحقيقي غسلتا يديني منك
الاكرم لينا جميعا نمشي من هنا زي ابو مشعل وشليل وغيرهم
ومؤسف ماآل اليه حالك
انا حاولت لدواعي كتيرة ابقى لكن بالجد كلامك مع علاء وطبخة انه يجي وبدر الدين يردح لينا ويتمنى انه نحن نمشي دي اكتر مما بنستحق منك ...
يعني انا يخيل لي ياخالد انا ماممكن كان اؤذيك وامشي فور أول رغم انه لي مطلق الحرية لكن انت انقلبتا على الشيوعيين وبقيت تجيب اللكيزان عشان يمسحو بينا الارض
لكن بعد عمايلك دي انا ممكن اعمل اي شي يؤذيك لانك آذيتني وآذيت اصحابي
سودانيات ماشيوعية زي ما انت قلتا وفي الارض متسع وشكلو ح ننسحب بشكل جماعي لو ماحصلت حاجة عوقت بعضنا
بس جد قرفنا من طريقة ادارتك لي ازمتك وتعاملك معانا كااعداء
اقعد فيها انت مع الكيزان وربنا يوفقك وكل زول حر بالكامل في خياراتو
بس انت بعت جيلي وشليل وفيصل وانا وآمال وابومشعل وعم فتحي وجليلي وتانين كتاااااااار
نحن ماح نمشي عشان الكيزان جو ....نحن ماشين لانك انت جبتهم وقاصد تسمح بالحزب الشيوعي الارض في اشخاصنا ومستعملنا كادوات في صراعك
لاصراع ولاغيرو وكل ارض تشرب مويتها
انا ماعايزة معاك علاقة ليوم الدين ياخالد
وشيل باسويردك اديهو لي كوز

قمت بإرسال هذه الرسالة "المؤلمة" لأعضاء مجلس الإدارة ولكل من ورد اسمه فيها ولعدد من الأصدقاء .
كتبت لهم "من باب العلم " .

لم يمر يومان وبدأت المشاكل ...
جلب بوستات "مشاكل" من موقع س.أونلاين ووضعها هنا مع عنواين غريبة :
(1)
ألحقو شوفو جلد بدر الدين اسحق

(2)

ثم بدأ الفعل المباشر ...


لعناية ال (....) ليهو أضان

قامت الزميلة العضو آمال بافتعال اشكال مع العضوة أم التيمان :
كتبت الأخيرة بوست .
تداخلت فيه آمال باسم الحرص علي سودانيات وإن كان الحرص دافعها لأرسلت لأم التيمان تنصحها بلغة طيبة لطيفة في رسالة داخلية و لكنها فضلت المباشرة وكان خطابها عدوانيا ومباشرا وفظا :
البوست به ثلاثة مداخلات :
الأولي :

ام التيمان

يعني وصلنا مرحلة ان نطرح هكذا مواضيع علي عينك يابوستات!!!!

طرحك غير موفق
وخادش في رايي

ارحمينا ياخ

الثانية :

ماطبيعي ابدا ان تحدثينا عن مواضيع مكانها غرف النوم ياخ

هذا خطاب يحمل عداء أكثر من نصح ولا يمكن أن تتوقع ممن وجه له أن يرد ردا طيبا .
تم سحب البوست بمداخلاته الثلاثة .
الطبيعي أن ينتهي الأمر ...
توالت البوستات :

(1)
عيب يا أم التيمان.

(2)
علي الجميع التوقف هنا :
http://sudanyat.org/vb/showthread.php?t=14131
والأخير حمل ما حمل من تهجم ومن محاولات حشد الرأي ضد العضوة أم التيمان .
يحدث هذا بعد أن تدخل الأمين العام لسودانيات وسحبه للبوست المعني .
ولم تكتف السيدة آمال بدعوة الكل للإدلاء برأيهم في قضية في يد الإدارة وهذا وحده ضد الميثاق بل بدأت بالتهديد :

كتبت متداخلا ومذكرا :

رأي عاقل وممتاز .
اعتقادي الخاص أن يتم علاج الموضوع وفق الميثاق .

فكان ردها :

ياخالد هذه سودانيات
يجب ان يلعب الاعضاء دورهم في تصحيح المسار
ونتمني فعلا ان لانضطر ان نلجا للميثاق
وين دورنا !!!


شنو قولنا في الحاصل

والموضوع لا يزال في يد الإدارة تبحثه أضافت :

سلام يامي يافنانة
اتفق معك مامن سبب لاغلاق البوست
وشغل الترضيات دا مابنفع
وحكاية سحبوا حقي يلا اسحبو حقهم دي ماشغالة
خليك ورا حقك في المطالبة بفتح البوست
والاستمرار فيه


ولا للترضيات

المشاركة الأصلية كتبت بواسطة AMAL
معاك يارافت
لا لقفل بوست مثل شعبي
الادارة تعاملت باسلوب الترضيات



يجب فتح البوست فورا

بعد كل ذلك تقول آمال :

المشاركة الأصلية كتبت بواسطة AMAL

نور سودانيات

بنعرف معاركنا
وبنختار البعاركنا
وكل ماتضيق
بتوسع مداركنا

دا هوادة مني




دي رسالة كل زول لازم يعرف معركتو الحقيقية وين

وذلك في البوست بعنوان (بنعرف معاركنا) .
أين كانت المعركة الحقيقية وأنت تفتعلين إشكال مع أنسانة وتتمادين في تهجمك عليها حتى ترضخ ؟؟؟

أين الوطن هنا ؟؟
أين كشف التزوير وفضح الكيزان ؟؟!!


ثم جاء نبيل ...
تقدم بشكوي عبر بريد سودانيات ضد الأخ أبوعاقلة نتيجة شجار في بوست .
وجهته أني لست الجهة المعنية وعليه توجيه خطابه للسيد الأمين العام في رسالة داخلية .
قام الرجل فعلا برفع شكواه ولم يرضه قرار الأمين العام فرفع استئناف لا يزال ينظر .
ثم ان الرجل لم ينتظر قرار الإدارة . أنزل بوست باسم شكوي ليضاف لرصيد بوستات المشاكل في تحد واضح للإدارة .

ولم يكتف بذلك ..
جلب بوست إشكال من س.أونلاين.
كاتبه ليس عضوا .
والشخص المعني ليس عضوا .
ويحمل اتهام من أشخاص ضد شخص وجميعهم تضمهم دولة واحدة .
البوست بعنوان :عفوا د بابكر مصطفى إسماعيل رئيس ما يسمى مجلس الجاليات فى بريطانيا أنت الذى مطالب بإعتذار

http://sudanyat.org/vb/showthread.php?t=14216


اعترف فيه بكل برائة بالتنسيق مع آمال :

المشاركة الأصلية كتبت بواسطة نبيل عبد الرحيم

رغم إحترامى للأراء التى طالبت بقفل البوست
لكن إعتقد أنه منبر حر وأنا مسؤل عما أكتب
ولو هذا الموضوع لا يهم البعض هنا سودانيات كما قالت الأخت فهذا تناقض
وأنا أتكلم عن مجالنا هنا فى بريطانيا والأحداث الأخيرة التى صاحبت إحتفال الكيزان
يعنى يهمنى ويهم جاليتنا .
ويكمل بوست أمال
ممكن أتفق أن بابكر ليس عضو هنا فلن يدافع عن نفسة .

أخيرا ..
**من أراد الانسحاب من سودانيات فليفعل بهدوء وسلام .
التواجد هنا ليس اجباريا أبدا .


**رسالة لكيزان السايبر بعلم الوصول .. عبر ممثلهم في سودانيات السيد بدر الدين :

سودانيات وطن "سايبيري" يزعم أنه :
ديمقراطي.
لا يمارس الاقصاء.
يقبل الرأي والرأي الآخر دون حجر .
لا يوجد لدينا بيوت أشباح .
ننتخب قادتنا انتخاب حر مباشر.
نتساوي أمام قوانينه ...

أردتم المشاركة ؟
ألف مرحب بيكم . تعالوا نتفاكر . استغلوا سذاجتنا وانشروا ما تحملونه من فكر..
بالكلمة الطيبة لا بالسباب .
بالقلم ... لا بالسلاح .
القلم الذي علم به المولي الانسان ما لم يعلم .
لكم ما لنا ... وعليكم ما علينا ...
تعلموا منا النموذج الذي نبشر به الآخرين.

والسلام.