[الجيلى أحمد]

نوافذ يا سلام يا نوافذ ،


أدين شخصياً بالكثير لنوافذ التى حتلتُ ولازلت أحتل فيها بالساعات الطويلة مستمتعا بالقراية المخمخيّة بى مزاج تريان و عيون مشدوهة و نهمة ، غايتو إن بقيت ركَّب نظارات ، ترا من عمايل شليل دى ، و الذى لملم لنا الدرر الثمينة و حتحتها و لمعها و أذابها فى كأس واحدة و وفر علينا تعب المساسكة و التفتيش من جاى لا جاك و وثق للكثير الكثير من الجمال المسكوب فى هذا السفر الجميل سودانيات ، شليل ، ياخى شليل دا يشكروهو كيفن هسع ، هو ذاتو ما خلالنا حاجة نضيفها ولا جنبتن نرقد عليها من شدة ماهو زولن سمح و ديسنت و خدوم و ناكر للذات و معطاء ، شليل دا ياخى يمثل وغصبن عنو وعن تواضعو أحد الأعمدة و الركايز الأساسية لكل ماهو سمح و جذاب و لطيف فى البكان دا ، و نحن إذ نفتقده فى نوافذ إنما نطمع فى المزيد منه فى نفاجه الجديد ونفاجاته القادمة بإذن الله و القلب داعيلو و لأمثاله من الشباب الذى يوضع على الجرح فيبرأ ، فيا جراح البلد المنسية ، أبرى ياخى و شيلى من شليلك وضمدى ، قسمت بى الله بتشفى . ونوافذ المفتوحة على الرويحة التعيبانة تراها متاكية ومزلاجها أهو فى اليد السمراء الطيبانة وعوجة تب مافى ، فالأرض تحبل بالحلال و تنجب بالحلال وينبت الجمال ويبتق محل ما ندفق من روحنا السمحة فى السهلة ، و الواطة واطاتنا ، و الصلاة صلاتنا ، نقع و نقوم على منجلَّا تنا ،





شليل يا بنج :
حب شوالات و براك عارف



- إنتو أدوات التنسيق طفشت شقيش
يوماتى شغالة بس يعنى لازم تحرجنا مع شليل


_____________________________________________

كدا كيف ياوليد..

عجبنى كلامك بالحيل, فى زولآ مابتقال فيهو الكلام..