[أبو الحُسين]

الغالي جداً سيدي أبو جهينة...
أولاً كل سنة وأنت طيب وألف مبروك لينا الموقع الجديد بثوبه الجديد إنشاء الله يكون قدم خير وسعادة وهناء لينا ولجميع البورداب وزوار الموقع...

بمناسبة قصة التوائم الكَدَسة دي أحكي ليك قصة كان حصلت لينا نحن في الإبتدائية...

زمااااااااااااان كان في موضة بتاعت الشُرُكَّة (جمع شرك) وتاني في موضة بتاعت نسوي العربات ونجري وراهِن وتاني في موضة بتاعت الفرنيبات (جمع فرنيب) وهو نظام شرك لكن مصنوع من مجموعة جريد النخل يُستخدم لقبض الكلاب والصُبار والكدايس!!!

أها قمنا زي ماب يعملو الأولاد أنا وناصر عثمان ولد جيراننا الله يطراهو بالخير عملنا لينا فرنيب وعلي شقاوتنا الولاد يقبضوا في الكلاب والصبار نحن قبضنا لينا كديسة حلاااااااااااااتة كأني اليوم بشوفها بويضة وعويناتها خُدُر حلات الدنيا فوقها... أها الصباح مشينا لقيناها معلقة وطبعاً روحها طويلة ماب تموت بالساهل... قدُر ما ضربْنا فيها كديسة الجن دي أبت تموت .... طبعاً نحن كنا في الإبتدائية صغار والظاهر كنا نضربها على ظهرها وقالوا الكديسة إلا الواحد يضربها فوق راسها حتى تموت...
المهم خليناها بين الميتة والحياة.. ومشينا المدرسة وجو ورانا أولاد حلة الطرف (اللي هم جماعة ناس حميد (أم ضرع) ) قامو قتلوها شر قتلة...

أها لمن نحن مشينا المدرسة ... قمنا حكينا بطولتنا بأننا قبضنا اليوم كديسة... أها الولاد قامو قالو لينا الكديسة القبضتوها دي هي التويمة بت .....................!!!! وهي للآن ما جات وسجمكم الليلي حا يكتلوكم..!!! :

أها يا اخواننا ماكم طالبيني حليفة.. الخوفة الدخلتنا اليوم داك ما لاقتني ولا أظنها تلاقيني تاني... ... التويمة دي علي شقاوتنا اليوم دا إتأخري أمرق أنا من سور المدرسة أعاين علي بيتهم ألقاها ما جات ... بعد شوية يمرق ناصر يعاين يلقاها ما جات... وتطايرت عيوننا وبلغت قلوبنا الحناجر ... وبعد جرس الطابور أمرق أنا ووراي يمرق ناصر ... بس الحمد لله ربك رب الخير يجيب التويمة تجي متفدسي شايلي شنيطتها من لا تِحِت... وساعة وربنا فجاها...

أها شوف زي دا قلت ليك خوفتها لاحدي الآن لمن إتذكر الحادثة ديك وأنا كتلت روح وأنا في رابعة ولة خامسة إبتدائي شعرات جلدي تقوم.... .

لكم ودي كله بلا حدود...

أبو الحســــــــين....