[طارق صديق كانديك]

المشاركة الأصلية كتبت بواسطة عبداللطيف النقر

اقتباس:
المشاركة الأصلية كتبت بواسطة طارق صديق كانديك
رغم ان كل المؤشرات تقود الى حقيقة انفصال الجنوب غير أن ذاك في اعتقادي لا يخدم الجنوب ولا الشمال .. بقدر ما أن يؤجج الصراعات وينحو بنا الى المزيد من اراقة الدم والمال والوقت .. !!

اتمنى ( سمسم ) يكون أصم وما يسمع يارب ... !!

اشتر

كل سنة وانت والسودان بخير .. !!

نكشة :

ال ( عاين جاي ) لعبداللطيف في محلها والله

تحياتي



ازييك يا طارق وكل عام وانتا بخير

قلتا لى عاين جاى عجبتك -- تعرف كان فى رد عن مداخلتك فى موضوع حافظ حسين -- عن الضحية و كلامه فى نبينا ابراهيم عليه السلام -- كنت عايز ارد عليك لكن الصباح لقيت الموضوع مافى --

كلامك يا طارق دائما موزون وزنة ماتخر الموية -- مافى زول يقدر يمسك عليك كلمة -- عصاية فى الحلة وعصاية فى النقارة -- لاحظت ان اى موضوع بتبداه بالمسايرة مهما كان السبب الذى قد يدفع احمقا مثلى للملاقطة -- ثم بعد ذلك تدخل فى صلب الموضوع موضحا بعض عيوبه وتنتهى بالمهادنة ثم بالتى هى احسن --

الظاهر عليك محامى -- وديل طبعا أحرف ناس فى السودان -- بخاف منهم عديل الله لا شبكنى فيهم -- قبل كم سنه محامى كرهنى السودان وكرهنى القضاء ذاتو وعشان ما أطول عليك ---

عندى عمارة مؤجرة بالكامل لتاجر فى السوق العربى ( فيلا وشقتين ) التاجر ملياردير وعندو أظن 6 عمائر كلها مؤجرة بالغالى وسكن عندى انا المغفل بى تراب القروش --قدر ما حاولت اطلعو غلبنى -- تصدق المحامى بتاعى يوم النطق بالحكم بغيب عن الجلسة -- بى قدرة قادر عملا صلح مع تحميلى اتعاب التقاضى واداهم 6 شهور انذار بالاخلاء -- كسرو البيت كلو فى ال6 شهور -- خسارتى فى اصلاحه وصلت 70 مليون وقت المليون مليون -- من ضمنها 7 مليون ضرائب لانهم اشتكونى للضرائب وقدمو عقد ايجارهم معى فى اقرارهم الضريبى --شفتا المضرة كيف ؟

عشان كده عافى ليك ما برد ليك تانى الا السلام --

كل عام وانت بخير ياعبداللطيف ..

يا أخي في الأسافير والذي خلق السماء بلا عمد .. ماعندي معاك قصد يدعوك لتعتقد اني ممكن أكون زي ماقال أبو عركي .. ( تاريك كامن لي بي شيتن كتر ) .. هي الرؤى المتباينة ووجهات النظر .. ليس إلا ... !!

أجد انك أحيانا .. يلازمك الشطط في خصومتك فتفجر الحروف من غضبك تفجيرا .. ومن هنا يبدأ مسلسل التداعي ربما بعبارة لا تلقى لها بالا .. أصبت كثيرين بما يسؤهم .. وتفسير ذلك .. أقول .. ان بعض مداخلاتك .. فيها الكثير من التجني على الاثنيات العرقية في السودان والحديث عنها بمثل ما تكتب مؤجج للصراع ولا يخدم أحد .. كنت أرغب في تناول مداخلتك .. لكني أيضا آثرت أن أكتفى بملاحظة أشتر ( غير الشتراء ) .. !!

أعلم يا أخي انني لا أحمل غير المودة لك وللناس أجمعين .. وغاية أمنياتي أن نتناول شأننا بقليل من السمو على جراحاتنا التي ما انفكت تزيد بعدنا بعدا .. !!

نكشة :

ذكرتني استاذي الجميل مرشد الدين محمد يوسف .. كان حجة في القانون له محبتي أينما وجد .. جاءه أحد موكليه يوم النطق بالحكم فقال :

يا استاذ الليلة النطق بالحكم بالله عايز حكم قوى خلاص .. !!

ولما كانت الساعة السادسة صباحا ( صحاه من النوم عشان يقول ليهو كده ) : غضب استاذي مرشد الدين وقال :

والله يافلان .. حكم قوي ده ما بعرفوا .. انا بعرف .. لقمة قوية .. عرقي قوي .. بنية قوية .. بس حكم قوي ده ما ادونا ليهو ... الله يصبح الواطة ونشوفو ليك .. !!!

اتمنى أن تكون ( مقاطعتك ) مزاح ليس إلا اذ السلام فقط لا يكفي ..

تحياتي