[فتحي مسعد حنفي]

المشاركة الأصلية كتبت بواسطة رأفت ميلاد

يا عبد اللطيف كلامك ده كلو على العين والراس .. وفعلاً وصفك لا ناقص ولا مرتش .. لكن فى حاجات تانية ما كنا جايبين ليها خبر .. زى أولاد الجنوبيين الكانوا ساكنين فى العمارات تحت الشييد .. هل كنا بنحس بحقهم بالحياة من لعب أطفال ومدارس وعلاج ؟ .. لم نكن نسخر منهم نعم .. ولكن الشعور ب مصيرهم (الطبيعى) هكذا ضرب من العنصرية التى لا نحس بها من (تربيتنا) ..

تعرف فى فترة عودتى من السعودية وأنت كنت خارج الحلة .. كان فى عشوائى ضخم بينا وبين المنشية .. أستمتعنا بيه شديد فى توفير المزاج .. وسكنا فيه سكنة وعملنا أصحاب وصحبات لكن يوم ما خطر فى بالى .. ليه الناس ديل مصيرم أن يسكنوا هنا .. وليه أسمهم (النازحين) هم فقط .. ونص البلد دناقلة وشوايقة وجعليين وفور وووو .. وكلهم جايين من (البلد) .. ليه ديل ما نازحين والناس جاضة منهم ..

منطق دى كراع ودى رجل .. عنصرية ما بعدها عنصرية .. أمكن ناس يا (عب) أصدق علينا

صدقت يارأفت وان كان في صدقك ما يوصلنا لكثير من علامات الاستفهام..
ليه ما دام الدنقلاوي والمحسي والنوبي والفوراوي كلهم نازحين وبرضو بيرطنو..ليه الجنوبي يعامل بدونية مستفزةبالطبع ليس كلهم ولكن الغالبية العظمي ..فأنا درسوا معاي أولاد بوث ديو تشارلس ووندر وكان برضوو معانا بينيديك لاعب الكاثوليك المعروف وكانو يعيشون في مستوي أعلي من مستوانا..لماذا هل لسهولة المواصلات للنازحين من الشمال وامكانية رجوعهم ان لم يعجبهم الحال أم لأن الغالبية غير متعلمة ولا تتوفر لهم فرص عمل الا ما يحتاج الي القوة الجسمانية فقط ألست معي في ان الاستعمار قد ساهم الي حد بعيد في هذه الفرقة خلاصة القول ان الانفصال له مبرراته بعكس الوحدة التي نجد ان مبرراتها تصب في صالح الشمال.
زمان حسن بشير نصر اشتري قاذفات لهب وكان يخطط لحرق الجنوب عن بكرة أبيه لولا رحمة الله وقيام ثورة أكتوبر..
جدنا طلعت فريد كان يتفاخر عندما يحكي عن بطولاته في الجنوب وكيف قاموا بحرق حلة جنوبية كاملة لم يخرج منها ولا جدادة.. أليس هؤلاء هم الجنوبيين الذبن نتحسر الآن علي احتمال انفصالهم..
فلينظر الآن كل منا بصدق ويبحث داخل نفسه ان كانت لهذه الوحدة فوائد لأبناء الجنوب..