اهل النمه و القطع الاخدر و الكلام الطاعم
سلام عليكم طبعا انا حاتله هنا بس ما بعرف لنضمكم دا لكن عجبتني الردود دي و قلت المها كلها مع بعض حسب فهمي انا
زاد وجعي العلي وكتين نسيمك هبا
شال برقو وشلع مطرا يقوقي وكبا
الخلاني في نيراني ضقتا الكُربا
فاطر بسمو ناير خدو كلوو محبا
*****************
زاد وجعي العلي في المتل الهلال حاجبّا
الديدبان واليها من العيون حاجبّا
البطرانة خلقة غير روحا مو عاجبّا
مطيرقة خيزران النسمة تتغنجبا
****************
زاد وجعي العلي داوني ضٌقتا الجربا
الديس انبهل كتل القلوب بالضربا
والصدر الطمح توّر نفوسنا وخبا
نظراً ان ضرب ديشاً سلاحو الحربا
*****************
زاد وجعي العلي عيني المنام فارقّا
من الشال كفل بارد حشا اللترقّا
الصدر الطمح شال السمار اترقّا
من دون كير عيونو مسننات طرقّا
ودي التانيه
إن قدمت تمثّل للسحابة الراحلة
بس زادت شعر و شعور و أعين كاحلة
تروي إذا بكت كل الغفار القاحلة
و إن مال الطريف سهماً رماهو فطاحلة
******************
إن تاتت تحكي المزينة الماطرة
وازدت بالضمير و الروايح العاطرة
تسقي إذا بكت كل اليباب و الماطرة
و إن رفعت حاجبا ملكة و خدمها أباطرة
*******************
إن قدلـــت تحـاكــي الصافنــات الخـــيل
وزايدة علي البنات لمعة وطريفها كحيل
مقرن دمعها الفوق جِيْدَها حَاكَـى النيــل
نَبْعُو عيون مَــهَا ومجراهو خداً اسـيــل
*******************
ان ماست تنوح كل الضماير راحلة
تقدل تنتني تمشي وتظنها واحلة
فوح العنبر أم كشحا مساوا وناحلة
أحي من فلانة ست الطريف الكاحلة
*****************
ان ماست تنوح بيها القلوب عشقانـــة
تقدل وتنتنى انفاسها زى ريحـــــــــانة
سهم لحظك طبنجة تكتل بدون جبخانة
ود كانديك كتل الرحمة يا انسـانة
*****************
وان وقفت عديلة وان مشت مبرومة
وان قدلت معجّنة من وسط مقسومة
وان قعدت موهطة واااقساوة القومة
مبرومة حشا وعجوة محس قدومة
****************
موهطة في المشي تنشل قديم متغارز
وزايدة علي البنات مكفولة صدرها بارز
دمعات العيون والدر محال يتفارز
وان نظرت سيوف في معركة بتتبارز
*****************
ان مشت ذى فرع البان المايل
ان نظرت ذى برق القبلى الشايل
خدودا شايلة من شمس الاصائل
نفس اعرف شن بتقول بالموبائل
****************
تمشي علي مهل تعبانة من المرقة
الغيم الرحل بس لي مشيها بيرقا
خلسان النظر ولّ التلفت سرقة
طفاية حريق نجاية من الغرقة
****************
ان حنت تقول مزن الصعيد خببانه
براقا شلع من طرفو زاد هيجانه
ياااابت الكرام كيف الدبارة معانا
في فلانة التي هلكتنا زادت ازانا
ودي واحده تالته
أحّي من وحيحك يا اب رويســــــن لفّ ...
كتلنّك من شـــــلاقتك ومن القليبــ الخفّ ...
مرقـــنّك كنـــــب ســوّن عمايلك دفـــــة ...
قطعنبك بحــــر ... لامــن حِليقك جفّ ...
*****************
واردين فد بحر وبرضو ناكف حالو
كم كبيت دموع والدرب المشيتو مشالو
سويتن سبح لو كان يجودبو وصالو
والعائم اللجج الليلة كاس نشالو
******************
الشوق والوحيح .. ينكتبو للمابينا
أم خصرا رهيف سوت قلوبنا عجينا
مرقت بي وبكيت خلقوها ما من طينا
يا أشتر دبارة أخوك رقص ( مدلينا )
*****************
الشوق البودر .. خلاني ألهث أنوح
كل ما أقول أتوب أرجع أعيد اللوح
أنضم وتنفتل تحت المعاني شروح
فارقت الصحاب باريت ناس ممدوح
*****************
الشوق التَّبُق نيرانو.. جوة الروح
قلت اقَفِّل ابوابو ؟؟. وانوم مطروح
ام لهجاً حلو زادت جروحي جروح
ما بترك هواها ان كان تروح الروح
|