ياناصر إزيّك وأنت في منفاك الإختياري ؟؟
قلت لي زعلان منّي ؟؟
أوكي ..
تلفوني عندك ..وبيناتنا اتصالات ورسائل ..وما قاعد أقفل خط في وشّك ..
بتحب تكتب مباشرة قدّام النّاس ..لأنو الشي المارضّاك مكتوب قدّامهم ؟؟
طيب ليه إزدواجية المعايير ياخي ؟؟
دي موش ياها نفس (الإتصالات) الأباها طيبان ؟؟؟
حرامُ ُ علينا حلال عليكم ؟؟
شوف يا ناصر يا صديقي ..
في البوست دا أنا ماخاتّي أي اعتبار لعلاقة شخصيّة( بدون وش أخدر يتكشّم ) بيني وبين فرد من النّاس ..
كل زول بيكتب كلام ..أو يتنقل عنّو كلام يجي يوضّح موقفو بي رقبتو .. دا رأيي .. وأنا ما شايل عكّاز علي عضو هنا عشان يتعامل مع رأيي دا كأمر ..
فكرة القسوة علي الطرف التالت ..وحكاية كضّاب ..وتفسيراتك دي فهم يخصّك لوحدك ..قادر تلقط فكرتي كاملة من غير تأويل حبابك ..داير شرح بشرح ليك ..داير تفهم الفهمتو وتمارس ضغط عاطفي وتحرد المنتدي دا برضو شي يخصّك وحدك ..لا شريك لك ..
المنتدي دا ماهو بيتي عشان أتحسّس من مروقك منّو ..ولا هو كمان ضُل قاعد أجي أتّكي فيهو لامن الدنيا تسخّن ..قاعد اتعامل معاهو - في الفترة الأخيرة - زيّو وزي أي محطّة في الخلا ..مويتها مُرّة دا - إذا بقت في موية من أصلو- .. بجيهو مضطر ..فوحاتك بعد أقفلو ما قاعد أتذكر منو القاعد فيهو ومنو الهجّ ..
الكلام الفوق دا عشان تسقطني من جملة التراكمات الإتسببّت في خروجك من المنتدي ..مع تمنياتي لك بدوام التوفيق ..
ثم :
د/زين ال مططططططططططططططلقاً ( وديل 14 طا طير زي حقّاتك ) ما ح يجي يكتب في (مسألة حسّاسة )زي دي .. ما تنسي إنو هو ذاتو د/زين الذي تابع التقريظ الذي انهال عليه علي حساب زملائه الذين قاموا بالواجب وزيادة .. ولم يفتح الله عليه بتصحيح يضع الأمور في نصابها ويرجع الفضل لأهله ..وبسبب ما نقل عنه تعدّدت الإساءات لزملاء مهنته .. وهو قاعد يتفرّج .. قبل أن يقرر أن ينقل عبرك ما نقل مؤخراً .. بعدما خربت مالطا ..
ألم نطلب منه التوضيح والتصحيح منذ أن قمت أنت بكتابة البوست الأول والذي أشار لفضله وسحَب البساط عن زملائه ؟؟
موش كان ممكن يعفينا من اللياقة دي ..؟؟
موش كان عفاكم علي الأقل من معلّقات الإعتذار الكتيرة الرشّيتوها بي جاي وبي غادي في منتدي البركل ؟؟
شوف يا ناصر :
د/زين الذي طلب - منّي بكل أدب - رقم تلفوني .. رددت عليه - بكل أدب برضو - وقلت تلفونات نهي .. فما تطلّعني قليل أدب ساكت يا ناصر ..سمح ؟؟
بالمناسبة حكاية ناس سودانيات أهل ..لا تمنع - إن صحّت - إنو نقول للغلطان ..غلطان..
ولكن مامعروف نقول شنو للبيحرد البيت ..
__
سلام لناصر يوسف في ( سرنديب ) ..