[محسن خالد]

حكاية المركز الثقافي دي يا وجدي إلا كان أعملو في بيتي بتاع شندي، هناك ما بكون عندو دور إلا بمقدار، شفت كيف؟
لندن حدّي معاها قريييب، أيادي معطونة في كتابات ما بقدر عليها غير المكان دا.
يا وجدي أخوك دا لما تحف به الكتب فهذا يعني أنَّه بلا عذابات، الباقي كلّو, هيّن.
لكن وحشني الخلاء ما الخرطوم والأجواء الثقافية. أنا بالأصل لا أعرف الخرطوم ولا أعرف عنها شيئاً، وأخشى زيف أشباه مثقفيها الذين نراهم هؤلاء، وأكاذيبهم وأمراضهم (معظمهم ما فيهم خير للمجتمع دا، ولا لأنفسهم، لأنَّ الأنانية بلغت منهم درجة مهلكة، درجة الإعطاب الكلّي).
شوف، أنانية مع علم حقيقي ما بتلمُّو، أنانية مع فن حقيقي ما بتلمُّو، أنانية مع قدرة حقيقية على الريادة والاكتشاف ما بتلمُّو. لو لقيت الزول أناني، افحص علمه وفنّه جيداً، وستجده مكذوباً أيضاً، أراهنك.
الباطل لا يلد المعرفة الحقيقية، الرائدة، فلا بُدّ من سماحة عقلية هنا تؤثر على الإنسان في إجماله، كي يرى، ويستشرف. والزيف لا يلد الفن الحقيقي، العظيم، الخالد، لأنّ الزائف مشغول بزيفه، ولا يرى أبعد من مكياجه.
فخرطوم شنو ياخي، ووهم شنو؟
وحشتني المرحات يا شاب، والحواشات والنيل والمقابر البعرفها وبحفظها، والناس النضاااف، والصادقييين، والحقيقييين. يمين جلسة بجوار ربابة حسبو دا، تسوى الدنيا وما فيها. جلسة مع عمك دالي، يونسك فيها عن نبي الله الخضر وأسطورته، تلهمك كما لا يلهمك أي شيء آخر.
أقولك قولة؟ دا خلينا نتمو -كلللو- في بوست السينما بتاعك، كان قدرت عليه، وما نزلت بي النوازل.
كن بألف خير، والمحبات وراك وقدامك