[أشتر]

المشاركة الأصلية كتبت بواسطة Sahar

وأشارة ايضاًان الزميل صاحب المداخلة الثانية قد افاد يوماً ما، في احد البوستات باني من الجندريات..
نحتفل هذه الايام باليوم العالمي للمرأة... من الشخصيات النسوية التي تثير إعجابي الكابتن طيار ايرين ايرلهارت... اول امرأة تعبر الاطلنطي بطائرة... وكتبت لها النجاة من ذاك المثلث، برمودا...

والله يا سحر .. ماف شي طافي أوتوميزراتي .. وفي نفس الوقت باقية لينا فيتامين سي داك ذاتو .. ما هي إلا هذه البت السمراء كتراب بلادي .. والسبب شنو عارفة ...
إنها تكب ما تحس به من القلب مباشرتن وعبر قنواتها الحسية بدون الرجوع إلى مخيخها المعصّب دا (معصب يعني تطغي عليه العصبية في أغلب ردود الأفعال النشطة ودا شي طبيعي وحال ما يستفحل بنشوف ليها مصحة)
ودا عشان هي زولة آكتيڤ جدا بالمناسبة ...
طيب لو قلت ليك انا بهرش منك بتصدقي ...
ياخ انتي جادة أكتر من اللازم من صورتك دي (واحنا) مخرمجاتية مدغمساتية وساعاتية ساي .. وتفجخنا بين الفينة والأخرى جحافل الألم ... لذا تلقينا طواااااالي مِهودين وطالبي لجوء متي ما لقينا بشر تتاوي ... وشغالين على وزن أضرب الهم بالفرح لكن طواااالي يطرحنا أرضا قلة حيلة وعدم وسيلة ...
النقوم اعرفك أكتر باسكابشني دا ... زول سوداني الجنسية .. فاكة منو جدا .. وبعد دا قال مهندس شوارع ... ولى يوم الليلة دربو ما مرق ... اها زي مغستو دي لاقتك في فِجّة ؟؟؟ وانا العبد لله الضعيف أشتر .. ما فاكه مني لكن بِفِكها فيكم ... والرجاء من السادة المسافرين تحسس أفئدتهم جيدا لأن هنالك فئة قد تهوي إليهم في أي لحظة ...
الكلام دا ما بكون وقع ليك لكن أهو غايتو ... سميها شفتك وابتهجت وين بالله انتا ...
انحنا الزمن شقانا ياخ .... ونحمدو ونشكر فضلو على الشقا دا

عايني جاي يا سحر يا بت أمي ...
آسفين على الشمشرة
جندرية يعني شنو ؟؟؟ والقالا ليك منو ؟؟؟ وهل هو تحرر المرأة من هيمنة الرجل .. أم تحرر الرجل من نقتها الكتيرة جراء العمل في شتى المجالات …
غايتو انا ما بعرف إلا مهرجان الجنادرية بالمملكة العربية السعودية وباقي المهرجانات كلها حواء ... حواء اذا مرقت .. واذا دخلت .. واذا استكانت وقال ثم ماذا .. نص المجتمع وكل الدنيا ...