يديك العافية يابلة ياخ والله تسلم....
نعم رحم الله شيخ العاشقين عبدالله محمد خير رحمة واسعة واسكنه فسيح جناته.... له قصائد جميله جدا وأنا من أشد المعجبين بكتاباته...
أهديك قصيدة اللمبة وهي تحكي عن أن هنالك فتاه جميلة بريفي الدبة تقريبا أرادت ان تشتري لمبة "فانوس" وأخذت تحكي مع "صاحب المحل" فكانت هذه الكلمات:
دايرى اللمبة شن بتسوى بيهو النور مادام انتي كلك نور
ولا ده السبب جايانا بيهو تزور.
يديك اللمبة لكن قالوا بقاقة وبقاقة
ياريت اللمبة لو بتحس وتشعر بالأيادى الناعمة لما تمس
كان لابتبق ولابتمل حتى لو شريطا كمل وجازا يبس
تضوى ليكى فرحانه وتعزف ليكى ألحانها
وكان اللمبة قالت بق .... تبقى اللمبة دايرى الدق
كسرها و(فجخا) وانت ليك الحق وأوعه عليها ما تشفق
عشان ماتحرقك خليها تتحرق
وكان بقت كمان اللمبة معذورة كيف بتضوى ليكى وعينا مكسورة
يمكن حاسدى يمكن شالتا الغيرة ويمكن خايفة فى نورك يضيع نورا
يانـــورة
وقليبى حكايتو بس خليها مستورة وسيبى اللمبة كل ماتبق وهاك غيرا
وبلدا فيها إنتى إن شا الله بى خيرا عشان كده كم قلوب تابعاكى مجبورة
وله الكثير من الكتابات الجميلة....
عاد يـا قلبـي كيـف تعمـل.. ماضـيـك اللـكـان أجـمــل
سعادتك فيهو مـاش تكمـل.. ودقـــاتــــك بـتـتــعــطــل
تـقـبــل والله مــــا تـقـبــل.. مجبور ترضي باللحصـل
تخطيـطـك تـراهـو فـشـل.. ومـا دلـيـت دلــوك نـشـل
كفاك زمن شربـت عسـل.. هــاك اتـجـرع الحنـضـل
ظنـيـتـك كـبــرت عــقــل.. وفــوق نـيـرانـو تتمـلـمـل
أخيـرلـك صـلـى وإتنـفـل... أوعـــك تــانــى تـتـطـفـل
ماضيـك بالأمـانـي حـفـل... أفراح فـى لعـوب وحفـل
غـاب نجـم السـعـود أفــل.. جديـا كـان ولـوف وجفـل
فـي دنـيـاك مـافـي عــدل.. شقـاوتـك مــا بــي تتـبـدل
بي فوقك جـا ماشـي قـدل.. ديسـو اللـي كتيـفـو هــدل
يمـيـل ويمـيـل ويسـتـعـدل.. وعينيهـو المـلانـي جــدل
تـقـبــل والله مــــا تـقـبــل.. مجبور ترضى باللحصل
وأيضا...
ترانى حلفت بى الله
وتانى بقول وحات الله
وكت السمحة فى هيباته تتجلى
تشيل خطوات فى ايقاع
حلات ايديها فى التله
تودى صديرا قداما
تسيبو سبيبا يندلى
تخلى الداره فوق نيرانا تتغلى
طبيعى غزير
لا باروكة لو سله
كانو حرير
و كاسيه السواد حله
كل الشافو بارد الحشى وصلا
واصبح فوق سعير
اشواقوا يتملى
قليبا لى مشغول
ديمه يا خله
هو اصلو عليل
وشوفته زادت العله
اقولو خلاص تخليها
يقول لى نان هى بتتخلى
اقولو كفاك تبل الشوق
هو شوق الجن بيتبلا
تعال يا بدر عاين بدرنا الهلا
وعقلك يكون ثابت
مايكون ولى
نورو جهرنا
نورك يابدر ضلا
ما هماه شوقنا ان زاد وان قلا
عشان عارف السميحين
زيو فى قله
كل ما قلنا ينزل ليك يتعلى
بتسعد دارنا
كان اداها يوم طله
ينور بيتنا
الجيران
والحله
|