اقتباس:
المشاركة الأصلية كتبت بواسطة نبيل عبد الرحيم
الأخ خالد
أشكرك على رأيك وتحليك لمعنى الشللية وأنت وضعت العلاج أيضا الذى هو بالتتدريج ولكن هذه مسأله وقت كما تفضلت.
لكن إعتقد إن شللية المنتدايات لا تحتاج كل هذا الوقت لأنك السكن والمدرسة أنت مجبر أن تنتظر ,
لكن فى المنتدايات لا أعتقد لأنك لو كتبت موضوع وأخذ منك وقت على حساب أسرتك ووقتك ولم يلتفت له أحد وشعرت بالتجاهل سوف لا تكرر المحاولة مره أخرى خاصة لو إنك عضو جديد , وفى المقابل تجد بوست أخر ليس به موضوع غير الشات والونسه أكيد سوف تندم إنك كتبت
وإذا إعترفنا بوجود شللية هذه خطوة إجابية
والخطوة القادمة هى محاربتها
لك المودة وأشكرك
سلامات يانبيل ..
وجود شللية في المنتديات او غيرها دي موش حاجة نعترف بيها او ننكرها .. ده واقع المفروض نتعامل معاهو وبالتأكيد لايمكن يكون العلاج بان ننكره !! او نقول انو دي ظاهرة سالبة يجب محاربتها لانها اصلا هي ماظاهرة ولاسلوك مكتسب انا اظن انو دي طبيعة في الانسان على الاقل الانسان السوداني .. وانا عن نفسي ماشايف انها حاجة سيئة يجب محاربتها .
النقطة التانية هي كيفية العلاج .. وانا افضل التسمية تكون بدل العلاج تكون كيفية التعايش ... لانو بعتبرها حاجة واقعية اكتر من كونها مرض او شي دخيل .. المهم وخليني ابدأ بي النموزج الانت قلتو بتاع الزول الكتب موضوع جاد وصرف فيهو وقت وجهد عائلته اكثر حوجه له ... الفكرة يانبيل انو الرد او عدم الرد على الموضوع دي حاجة مابيد زول ولايمكن التحكم فيها ... قد يكون الموضوع جميل وهادف وحتى مثير للاهتمام بالنسبة لي لكن ده مابالضرورة يعني اني لازم يكون عندي كلام اقولو فيهو .. وبرضو لاحظ انو المواضيع الجادة البتناقش فكر معين دي الرد عليها صعب جدا لانو لازم يكون بي مستوى الحوار .. عكس البوستات بتاعة الونسة الهي اكيد الرد فيها هيين ومابيتطلب اكتر من جملتين ساخرتين مع وشين تلاتة ضاحكات وده انا بعتبرو السبب الاساسي البخلي بوستات الهظار والونسة اكثر ردودا واهتماما .. معظم الناس بيحكمو على المنتدى بانو ماجاد وانو العضوية جنهم هظار وبيستندو على شعبية بوستات الضحك والهظار والكلام ده غير صحيح وغير عادل حتى في تقييم المنتديات ..
وحتى لو افترضنا انو الناس مابترد على زول الا لو بيعرفوهو انا عن نفسي افضل واظن الاسهل والاكثر صحية انو بدل مانغيير سلوك الناس او ننصب انفسنا قضاة عليهم ونقعد نحاكم سلوكياتهم ونقومها ليهم اظن انو الافضل انو الزول الجديد ده مايكتب بوست لغاية مايتداخل مع الناس في البوستات بتاعة الهظار والبوستات الجادة ويبقى معروف للناس !! ايوة الفكرة شوية غريبة لكن صدقني دي الطريقة الاسرع والانجع واظن دي الطريقة المتبعة في الحياة الواقعية بالنسبة للناس الجدد في اي مكان ... اها في المنتدى حقو الزول الجديد يتداخل مع الناس في بوستات الهظار لاكتساب الصداقات .. ويتداخل في البوستات الجادة لتعريف الناس عن رأيو وعن اسلوبو في النقاش وعن ثقافتو وقدرتو على الكلام ... وبي كده يكون خلال فترة قصيرة حايكون اكتسب صداقات ( شلة ) وكمان عرف الناس عن نفسو وعن مدى قدرتو على ادارة الحوارات وبالتالي لمن يفتح بوست صدقني كل الناس حاتجي تشوفو كاتب شنو .. ناس الهظار حايجو يشوفو لو في فرصة هظار والناس الجادة حاتجي تشوف لو في فرصة نقاش ومغالطة كما هي العادة 