كويس يا قيقا إنّك جيت مقلّع
اتفضّل ياخ، وحباب مشهادك
بمناسبة توم وجيري، ذكّرتني مجلّة صباح، أخوك كان وما زال مرضان بيها.
مدام فنجاط، وعجيب الربّاط، شغل مبالغة، ياخي الرسامين الكانوا برسموها، "مصطفى" أفتكر؟ وعمر عبد الرازق (صححوني لو لخبطت) ياخي ديل أحسن ناس عملوا شغل بتاع أطفال، الناس ديل وين هسّع؟
عمنا شراحبيل وعمك تنقو في الصبيان دي براها حكاية، وزماان جُلجُل في مجلة المريود. كلها هلكت، إنا لله وإنا إليه راجعون.
لما زارني عبد الله الطاهر في الإمارات وديتو مجلّة ماجد، وقابلنا عمّك حسن البرسم خلفان وفهمان في مجلّة ماجد، حسن السوداني، زي ما أي زول في الخليج بلصقوا في اسمه السوداني.
ياخي الرسامين بتوع أعمال الأطفال ديل، والله مفروض يلموهم لينا كدا في برنامج تلفزيوني من خمسمائة حلقة نعرفهم ونشكرهم، ديل أحق ناس بالكلام، ومفروض يكرموهم لامن يكمل التكريم.
عن نفسي أنا معجب بالناس ديل لدرجة لا تتخيلها، وأشعر بالامتنان تجاههم بالذي لا يحصى ولا يعد.
شكراً على هذه السيرة العطرة
بعدين دوس أبنص عشان تحصلنا بسراعك
--------
يعني هسّع ناس بيض زي أمين حسن عمر، وحسن مكي، وغازي، الناس ديل قدموا للبشرية شنو غير الأذى؟ لامن تاااني يقدوا رأسنا في التلفزيونات. بعدين ناس النيل الأشتر ديل، ما بفتروا من الغناء دا!
إنتو يا أسامة أحمد المصطفى ما بتفتروا من الغناء دا كلو كلو! هل الغناء دا هو الفن الوحيد الفي الدنيا؟
بالله عليك يا أسامة اعمل فينا معروف وانتج ليك سلسلة من الحلقات للناس الرسموا للأطفال ديل، خلينا نشوفهم للزمن والزمان!
غناء، غناء، غناء.. إلى ما لا نهاية.
عوضية كُر علينا، نايرة جعبات، سمية دفار، طلّعتوا زيتنا عديل.
|