اقتباس:
المشاركة الأصلية كتبت بواسطة طارق جبريل
النبي فيكم يا الحبان شوفتوا قراية البطان الزمن دة كيفنها..
بالله الواحد امه تقوم صباحي وتجهزلو في الغداء اليشيلو معاهو..
يا همبرغر هاجرينو بين جِبنايتين صُفُر في العيش العلي القحف داك..
يا كمان العيش الممصرن العلي (البزديق) داك يدهنوهوا بــ(الكرافت)..
ولا حبات ألات سجك يشووهن ويغتسوهن في (الكاتشب)
ويزرقوهن في العيش العلي ضنب الكــلـب داك..
ولا الخرابة العفن داك اليقولوا (الهوت دوق)..
وبعد دة يلفوهوا بالألمونيوم فشان يبقى سخن لي وقت الغداء
ويهجروهوا في شنيطي صغووويري كدي ألت الأكل..
ويطلعلوم عصير أليل منقة ولا برتكان ومعاهو القصبايي البيشفطوبا العصير ديك..
ويختلولم تفاحيي يا موزايي يا يوسف افندي يا كمان كوميثرايي..
وبعد دة كلو يختولم زبادي دانيت ومعاهو بسكويت عشان الفسحة القبل الغداء..
ودة كله في شنيطة الجن دي..
حليلنا نحن وحليل قرايتنا..
وحات نضري انا مرة جيت من المدرسة للفطور.. لقيت امي رحمها الله ماها في..
دخلت علي التُكل لقيتلي كوريي فوق النمليي فيها روب..
وفي طبق الكسري لقيتلي فطيرتين كبيت فيهن الروب..
وضرضرتلي فيهن سُكر وشلتهن طويتن وانا ماشي علي المدرسة وألوغد فيهن..
والروب ينقط في القميص ومرة مرة اقشقش في مخاخيتي..
والدنيا برد وجضومي علي العليهن مليانات قشروب وماني قادر اضحك من الشقيق..
وأصلو الروب مع المخاخيت والشقيق وكتين نشف
وحات ود الكرسني جضومي زي اليبسوهن بي جبص..
بقيت حنكي ماني قادر احركو..
وأصلو القميص اللبني داك مع الردا اللزرق بقن منقطات بالروب
و(الشدة) من لاااتحت مكودبي والرجلين مغبرات مع الجلسرين..
اصلي بقيت زي أهل الكهف..
اها ورفقاني برضو الماكلو فاصوليي مكرتبي ولا لوبي عفن..
وتعالوا شوفوا من دخلنا الحصة التالتة دي وامة محمد منفوخي وتتنفس من لاااا تحت..
اصلو الفصل دة بقى علي كفاي الجداد ولا مراح النعاج من العفني..
وأصلها الحصي ألت الدين ديك يمين مافي زول حافظلو سورة..
مع ((البنج)) المالي الفصل دة..
واصلو ان كان لي استاذ الدين تلقاهو ممرق وشو بالشباك ويقري فينا..
دة كلو كوم والشنط ألت القرايي ألت البُطان ديل كوم..
بالله نشتري في الشنط السمحي دي وليها (ترتارين)
وليها يد كدي علي (كماشة) الفحم فيها شيتا كدي تطبزو تجيك ناطي
ووش الشنطة يا تلقى فيهو (ميسي).. يا كمان (فولا)..
والخرابة ملياني جيوب.. شي للكراريس وشي للكتب
وشنيطي صغوووووووووويري فيها الأقلام والألوان والاستيكة..
نان هن اقلام.. شي احمر وشي اخضر وشي ازرق..
والعجب في الاستيكة.. وحات نضري ليها ريحي..
ومرة ليها شكل كورة ومرة ليها شكل حصان... تشهيك المسح..
وتاني يا حليلنا نحن..
بالله خرتايي تخيتها ليك امك من باقي الدموريي ألت اللحفات..
وتسويلك ليها سوستة.. وعَلاقة فشان تختها في كتفك..
واصلهن كراسين مافي غيرن.. مجلدات بالجلاد البني داك..
ومبرقعات بي زيت الزلابية.. وصفحاتن مقدقدات من كترة المسيح..
واصلنا ما شفنالنا ترتار غير ترتار صندوق البرنجي داك
البتختو مع الهوا وتجري وراهو النهار كلو..
وكل يوم تحسب في السنين متين تصل سنة رابعة فشان ترتاح من قلم الرصاص..
وقادر الله تقعد تكتب بي قلم الحبر..والحبر يتسايل في أصابعينك
والله بيسألني مرات الحبر يصل لي كوعك..
ومن مسيح المخاخيت مع الحبر تسويلك شنب ضُومة ضُومة..
وأصلك كل يوم تجي ماشي جنب سنة خامسة وسادسة..
وتشتهي متين تصلن فشان يشترولك علبة الهندسة..
وتقعد تسوي في الورود بالبرجل وتشيل تقطعن من الكرسي
وتمشي علي بت الجيران ترميهو ليها في طريقها..
وهي تسكت تتبسم.. وانت تشيلك الهاشميي وتضاحك برااااااك
اها يا الحبان بعد دة كله الشافع يسولوا الفطور..
شي كرواسة وشي كيك وشي عصير..
ويلبسوهوا هدماتا سمحات ومعاهن كرفتة..
ويسوقوهوا بالعربيي لاااعند المدرسة
ووكتين تشوفو نازل وجاري الشنطة أم ترتارات ديك
والشنيطي ألت الأكل في الايد.. والكرفتة تتطابر من هني لااااهني
تحلف تقول مدير بنك
دحين باقيلكم قرايتنا مو ياها القرايي ام دق مع البُطان ديل
|
شوف ناس جدك كدكي كانو عايشين كيف ؟
اقتباس:
جدك مابياكل شبس *** جدك اكل طفولتو هرود
جدك كان زمان قرقاشو *** قرقاش كسرى ومرة تمود
جدك عاش زمان الدوكى *** ليها مفجفج الواقود
جدك جيلو كد الدوم *** زمن الدوم حلو ومريود
جدك ماهو ناكر انو *** قروى وفوق برش مولود
جدك ملتزم بالبيئة *** من زمن القرش مقدود
جدك زول بليلة لوبى *** عندو ورودها احلى ورود
جدك بالعراقى البلدى *** فى السيل بى شبكتو يخود
جيبك انت مليان بلى *** وجيب جدك سعف معقود
جدك بالو وارثو وراثى *** من حبل الغسيل ممدود
جدك ماهو زيك لا لا *** فى العيد ماضرب بارود
جدك كان يقلب الهوبه *** لما ( العَز ) تجيبلو عتود
جدك عيدو يدفن شركو *** فى الكبريتى شايل الدود
جدك فى البحر عكران *** جنو وحاتك انت بَرود
جدك قضى ايام سمحى *** فى طَلقيت وخيل وكعود
جدك كتفو حيلو اتهد *** من شيل الصفايح ام عود
جدك كان يكب الرمله *** وكت يبقى الصفيح مقدود
جدك ياما فتل اشميق *** وداوى جروحو بالهبُّود
جدك كان زمن مدرستو *** الخرتاى ليها ِلكُود
جدك قام جنا تربال *** كافح وكم بذل مجهود
جدك صارع الطورى *** ومنجلو فى الحصاد مشهود
جدك بالملح والشطة *** زولاً قضى زمنو صمود
جدك من (قصب) طنبورو *** لا سلكاى لافى جلود
جدك فى جوامع الحلى *** ما زاعوهو يوم مفقود
جدك كان يطوطح الباب *** زمن مابتلقى باب مسدود
جدك زمنو كلو يزازى *** حمارتو جريدى كانت كود
جدك ما دخل فى روضة *** كان زول خلوة جبدة بلود
جدك يجرى شايل النبلة *** عرقان من عمود لى عمود
جدك ما اشترى اللعبات *** وما خسّرلو فيه نقود
جدك ما قعد زول خملة *** شان مصنع عليهو يجود
جدك كان بيصنع لورى *** من الطين حصان وقَعُود
جدك من بلاستيك عمرو *** ما شاف فى صغرتو قرود
جدك اهلو كانو ا على الله *** وكل مرض وليهو حدود
جدك زمنو تطعيم مافى ** * علاجو لبن من الكدكود
جدك امانى شم قرض *** من المِجمِيج زمن مورود
جدك فى زمانو الماضى *** لافى تمرجى لافى حسود
جدك باقى كاتلو الحن *** ويحن كل ما يشوفلو ِفِصُود
جدك من صغير تبَّ *** بى صلة الرحم مشدود
جدك شعرو كلو القالو *** من اجل المحنة تسود
جدك غايتو عدَّ ايامو *** بى فضل الغنى المحمود
جدك بينى بينك زمنو *** ماضى وولّى مابيعود!!
جدك لسه فيهو رويحى *** وان كان العمر محدود
الخشم ان عِدِم طحّانو *** انت عليهو ماك مشحود
منك كل ما يرجوهو *** بكرة تحقق المقصود
|