الله يجازيكم كلكم (قولوا آمين)
مصرين تخلوني أسقط في إمتحاناتي موش كده ؟؟
قدر ما مسكت روحي الفترة الفاتت دي و أنا بتابع البوست و محسن يسرح و يمرح فيهو .. يجي صديقي الإسفيري شهاب كرار (من باماكو/ مالي كمان !!) و يطيح بآخر قدرة على المقاومة .. غايتو بحملكم مسئولية سقوطي المدوي لو ما روقتوا اللعب و تقلتوا دم البوست المسخن ده شوية !!
ألف مرحب بيك يا شهاب كرار و إقامة طيبة في المكان لسمح ده .. قول آمين
كويس يا محسن ..
للأسف ما حأفضى ليك قبال شهر كده .. فهاك الكبسولات دي :
- التفكير السحري البتشيل و تقتبسه عني ده ما شكر و لا إستغراب بل نقد لطريقتك القايمة على المشابهة الإنتقائية اللي كانت أساس التفكير السحري/البدائي قديما .. كويس
- تعرف ذكرتني بقصيدة إدجار آلان بو Eureka اللي كتبها قبال موته (بالجد أنا خايف عليك حاسس بنغمة رحيل و وداع في كتابتك و عارف بصيرتك التنبؤية بالموت كويس) .. إدجار قال إنو شاف الكون كله حقيقة لا مجازا و حاول يوصف المعلومات الشافها في تجربته الرؤيوية دي في قصيدة النثر دي .. حقيقي القصيدة أدهشت علماء اليوم لأن فيها تفاصيل فلكية إكتشفت حديثا مثل وجود المجرات و توسع الكون(الحقيقة اللي نكرها إينشتين لما ديمتري وراهو إنو معادلاتو في النسبية بتتضمنها ، لحدي ما أضاف الثابت الشهير ليها علشان يزوغ من النتيجة دي ، لحدي ما جا هابل و إكتشف التوسع ده تجريبيا ليعود إينشتين بكل جلالة قدره و يعترف بخطئه في التعديل) و وصف لأشكال بعض المجرات القريبة !! .. لكن بسبب إن (كل ما إتسعت الرؤية ضاقت العبارة) جاء الإطار الإتكلم فيهو عن رؤاه دي قاصر بحدود الفهم النيوتوني لعصره فبرغم بعض تفاصيل إدجار الصحيحة غلط شديد في تربيطها مع بعض .. الشيء ده بيوري إن الإستبصار الصوفي رغم شفافيته الفائقة في إستنكاه بعض الحقائق إلا أن حدود الإنسان المتلقي (لغته/مفاهيمه/معارفه/قناعاته) بتلون تجربته المتسامية المكثفة بألوان هذا العالم تماما متى ما حاول نقلها للآخرين .. الكلام ده بقوله كعذر ليك لأني بتنبأ إنك حتتراجع عن البتعمل فيهو ده Sooner or later لأنك مخلص للمعرفة و ما متعصب لذاتك و لأني مغيوظ من الإيحاء المتكرر بأن المشكله مافي نظرياتك دي و إنما في قصور فهم /تحصيل القاعدين ينقدوك ديل !!
- كررت كتير مغالطة منطقية بيلجأ ليها التكوينيين Creationists ضد العلم عموما .. و هي ببساطة إن الجهل بشيء ما بيقوم دليل على صحة إدعاءاتهم !! .. يعني قول مثلا إن قضية الـ Capital & small ماعندها تفسير حاليا .. هل ده بيعني إن رؤاك حولها هي الصحيحة بالضرورة؟؟ هل نقصان المعرفة العلمية في أي مجال ما بيقدح في العلم كمنهج أو في المعروف منه بالضرورة؟؟ .. عارف إنك ماقاصد بالضبط إنك ترفض العلم و منهجه لكن مجمل كلامك بيوحي بكده بشدة !!
- أنا مع حسبو في كون أن الدين عموما لا يمكن إثباته و لا نفيه !! .. إنما هي علامات و إشارات (آيات) من يتدبرها للهداية يهديه الله إن شاء .. و ماتزعل يا شهاب .. ماعندي شك في إخلاصك للحقيقة و لكن من تجربتي بقول إن البيبدأ من الشك في الأشياء و المتناقضات التي يراها حيكون دربه أساسا مختلف من البيبدأ من التساؤلات المحايدة حول وجوده و مصيرة و حول تجربته الوجودية/الإنسانية و حول الكون الذي يعيش فيه .. يعني كل الصراع البيمر بي بين المؤمنين و الملحدين بشوفه صراع حول التراث الفكري للإنسانية و تقييمه و ليس حول السؤال الوجودي العميق لفكرة الحقيقة و المصير (نوع السؤال ده أساسا لا يصلح سوى بين المرء و ذاته مادمت لست نبيا) .. و يابابكر أيوه ممكن تكون في حاجات صحيحه و لا يمكن إثباتها و لا نفيها بتاتا بدون الوقوع في التناقض ، دي واحده من أعظم النتائج المنطقية المكتشفة القرن الماضي بفضل كيرت جودل صديق آينشتين الحميم (دي مسألة مثبته بالمنطق الرياضي عديل كده) و من شاء إيضاحا أكبر حول هذا الأمر فليراجع مداخلتي هنا ..
http://www.sudaneseonline.com/cgi-bi...93715810&rn=93
- أخيرا يا محسن علشان ما يكون كلامي مجرد إنشاء ساي هاك النقد التفصيلي البسيط ده .. أولا : علوم اللغويات أثبتت بنائا على دراسات مكثفة للتغير اللغوي أن أي لغة لا يمكن تتبعها وراء حاجز 10 ألف سنة قبل الميلاد لأن كل مفرداتها و قواعدها ستكون قد تغيرت تماما حينها .. لذا تجد أن العوائل اللغوية الحالية تعود لجذر واحد يقدر بنفس هذه المدة .. قارن ده مع فهمك لأنو آدم عليه السلام كان عايش قبال 50 ألف سنة زمن الهجرة الأولى لنا كبشر مكتملي البشرية و اللغة و الفنون .. حتلقى إن ربطك بين أسماء المدن و معاني الكلمات الحالية و مقارناتك بين العربي و الإنجليزي ما بتلفق كلو كلو !! .. كويس حتقول لي (إثباتاتك) دي لفقت كيف؟؟ .. ده موضوع ثانيا
، ثانيا : الفكر السحري الإنتقائي بيتجاهل الواقع و تعقيداته و بيقوم بإختيار إنتقائي لعلاقات يتوهم فيها السببية و نجاحه العملي بيعتمد على إختيارته دي زاتها ، مثلا شوف كلمة زي Topology القمت حللتها إنت بإنتقائية تناسب نظريتك لو رجعنا لأصلها اللغوي حنلقاها إغريقية مكونه من Topos و تعني المكان/المنطقة و Logos اللي من معانيها التعقل و كده بيلفق مع موضوع الدراسة اللي هو تعقل العلاقات المكانية رياضيا !! .. يلا من وين بيتاح ليك إنك تشرحها Dissect زي ماعاوز كسر رقبه علشان تربطها بتوريت؟؟ .. دي حاجة و الحاجة التانية الأهم هي إنك مفروض تجيب مثال representative member من كل عائلة لغوية معروفة اليوم و تقارن الكلمات/المفاهيم فيها كلها علشان تثبت لينا إن المقاطع اللي إنت بتتكلم عنها دي فعلا عندها نظام له تاريخ حقيقي و مثير يعود لقصة خلق أولي .. لأن إعتماد لغتين بس بالإضافة للغة الدينكا حيخليك تقع في فخ العينات الناقصة الإنتقدته إنت زاتك بشكل خاطيء و كأنك ما ماعارف إن القواعد الإحصائية الصارمة في تحديد حجم العينة بيخلي النتائج المبنية عليها أدق من الإحصاء الكامل لكل الـ Population !! (ماتطالبني بأدلة حاليا، فقط بعض الثقة فيما أكتب على عجل الآن) .. طبعا أنا لو كنت فاضي كنت فتشت ليك الأمثلة البتنسف جغمستك دي في اللغات التانية
.. ثالثا : رمز الصليب المعقوف، منو القال ليك إن دلالته الأولى تاريخيا هي الصلب و الموت (كنيسة آدم) ؟؟ تاريخيا فيهو كلام كتير جدا أعفيني منو حاليا و راجع الكتاب ده أون لاين شوف الزول ده ساكيهو كيف و اشبع من صوره الرائعة و أمثلته و حتلقى إن الهنود عرفوا الصليب المدور لليمين و الشمال و إن دلالته عندهم هي الفأل الحسن و إن شعوب تانية أقدم كان عندها رمز للشمس !! .. المهم إن نوع الحفر التاريخي الأركيولوجي المعلل زي ما بيعمل الزول ده هو أكثر تعويلا قطعا من تهويماتك الإسطورية !!
..
http://www.sacred-texts.com/sym/mosy/index.htm
أها الهنود عرفوا الإتنين .. اليمين و الشمال !!
- الكلام طبعا كتير و لكن بس حأختم بتعليقات بسيطة ..
اقتباس:
إقتباس:
وفي معادلة البرت إنشتاين التي أنزلتُها سابقاً، المتعلّقة بحساب الطاقة من خلال كتلة الجسم وسرعته .. فتربيع السرعة هنا
محسن خالد
|
أبدا آينشتين ما قال حيحسب الطاقة من كتلة الجسم و سرعته !! .. كدي راجع كلامي حول النقطة دي هنا
http://www.sudaneseonline.com/cgi-bi...93518391&rn=47
.. و خلاصته إن الـ c ده هنا ثابت و ليس شيئا (ضوء مثلا) و السرعة بتؤثر في الكتلة و الطاقة معا و هما معا صفات Attributes للشيء Matter or Fields و ليسا مما تصح فيهما علاقة تساوي تفهم كتحول من أحدهما للآخر كما هو الفهم السائد لهذه المعادلة العلمية !!
اقتباس:
إقتباس
لأسأل عَن ما هو علم التفاضل والتكامل!؟ علماؤه إلى اليوم يختلفون أيهم كان أوَّلاً، التفاضل أم التكامل؟ فلو أنَّهم أدركوا ماهيّة التفاضل والتكامل، وجذوره التي نبع منها، لما أشقتهم الإجابة. وهو العلم من الرياضيات الذي يستوعب كافّة علومها الفرعية المتحدّرة عن عملية الخلق، كما سأفصّل مستقبلاً. ولَتَيَسَّرَ لهم إدراكُ أنَّ التفاضل كان سابقاً على التكامل
وعلم التفاضل والتكامل، هو العلم الجامع لعلوم الرياضيات كلّها من ناحية أنَّه المُعَمِّم لها عبر (الغاية) Limit
محسن خالد
|
طبعا كلامك ده غريب جدا .. فمن هم العلماء المختلفين ديل؟؟ التفاضل و التكامل عاملين زي اليمين و الشمال .. مافي معنى لسؤال أيهما كان أولا !! لأنهما ببساطة عمليتين عكسيتين لبعضهما .. و قطعا ما بيستوعبوا علوم الرياضيات كلها (ممكن نظرية الزمر مثلا لأنها بتأسس لكل الرياضيات) و الغاية دي شايفك خلعت عليها هالة ميتافيزيقية بس علشان إسمها موحي بالغموض و لكن رياضيا لا يوجد مكان لما تقوله حولها !!
اقتباس:
إقتباس
ومفردة Finite معناها محدود ومتناهٍ، بينما مفردة Infinitive فمعناها "مطلق"، وهو تعبير مجازي يدل على الكثرة فقط. فعالم الدقائق محدود وليس مطلقاً، ولا مطلق إلا الله، مثلما بيّنت هذا بخصوص (لا نهائي) المجازية في الرياضيات.
محسن خالد
|
يا النبي نوح !! .. كدي أول حاجه لازم أقول إن أي مفهوم بنقصد بيه تمجيد الله حيخلينا نهاية المطاف نقلل من جلالته بالضرورة لأنه مفهوم إنساني محدود بفهمنا .. فاللانهاية في الرياضيات الحديثة ليس مجازا على الإطلاق بل روضها العالم الرياضي العظيم كونتور تماما أواخر القرن العشرين و أصبحنا نعرف لانهائيات أصغر و أكبر من لانهائيات !! .. فهل هناك ماهو أكبر من الله عز و جل مادمت ساويته بلانهاية ما ؟؟ (تعالى الله عن ذلك علوا كبيرا) .. لقد ساهم التحديد الرياضي الدقيق لللانهاية هذا في ثورات المنطق الرياضي اللي بيجهلها الأغلبية رغم كونها أمتع و أصعب و أجمل من النسبية و ميكانيكا الكم و التطور معا !!! .. كفاية تماما إنها ورتنا إن الكل ليس أكبر من جزئه أحيانا !!
كالعادة كلامي مجزأ و مقطع و مبتسر .. و لزيادة الطين بله حاسس بالذنب للزمن الراح من غير قراية .. فدحين لما أفضى بعد شهر و تكون رؤيتك شارفت على الإنتهاء برجع ليك بنقد تفصيلي شامل بدل من الهبشات الخفيفة دي .. الكلام كلو في راسي لكن الفضا و تتبع المصادر ترف لا أملكه حاليا ..
فتك بعافية