[أبوبكر عباس]

اليوم التاني النهارية عديناها كتشينة في البيت، عندي أخوان و اولاد اخوات و اقرباء كتار في البيت، و كلهم أحرف من جمال حسن سعيد (شبابيك) في الكوتشينة، عبد العزيز زحّ بعيد و طلع ليهو رواية (سرد احداث موت معلن) و قعد جنب الشباك و طلع النظارة (أنا شاكي إنها ما بتاعة نظر)، إعترفتا لبهو بالحرفنة!، لانو لو نزل الكوتشينة معانا، كنا بنرشوا و دا بنزل من البريستيج بتاعوا نتيجة المكاواة بعد الرش.
المغرب مشينا بيت المثقف الكبير حسين صابون، حسين دا صاحب أبوي و عندو مصنع صابون و أبوي كان برسلني ليهو في الإجازة عشان أشتغل معاهو، لكنو كان بملحني و كان بعامل العمال زفت، عشان كدا قصدت أورمو.
عثمان بروا، ولدو و صاحبي، جاب لينا شاي المغرب الما خمج، و عمك بعد شوية جانا عشان يقدني.
قلت ليهو أها يا عم حسين المصنع كيف؟ و إن شاء الله العمال رايقين؟
و قلت ليهو انت يا عم حسين ما تخليهم يعملوا نقابة؟
- ردّ نقابة شنو للأوباش ديل؟
و سلمت المكرفون لعبد العزيز....
و حات الله تاني يوم كنا معزومين عندو، و ضبحوا لينا خروف، و مرتو الأمدرمانية ظبطت لينا أكل كلما أتذكروا هسع، بدعو لعبد العزيز.
و من ديك، عمك صابون بقى يحترمني إحترام شديد