[ناصر يوسف]

بالضبط زي الطفل لما والديهو ينفصلوا ... بيكون مشتت ما بين الأب والأم .. ونفس الكلام ده سبق وقلته للأخت العزيزه/ حنينه وللأخ العزيز خالد الحاج نسأل الله له الرحمة والمغفرة ..
العضو الوااااااااااااحد ده والهوَ أنا ( معليش حأتكلم عن نفسي بس عشان ما ينط لي زول في حلقي ويقول لي جامعنا ومتكلم بإسمنا ليه)...
إتخيلوا معاي زول دخل إلي عالم الأسافير دي مؤخراً .. في وقت كان فاقد فيهو لمصداقية الناس ومعني الصداقة الحقَّة ... وحتي لهفة القراية لمنتوج الآخرين كان الواحد منو خَواء...
فجأة يدخل منبر زي سودانيات الذي أحترمه بكل مكنوناتي ...
فجأة يحصل إنشطار للمنبر لأتنين ... ويبقي العضو الهو أنا مزازي بين الإتنين في شان يتواصل مع أهل صنعهم ليه المنبر الأول ( سودانيات الأم)...
يحاول يتحد مع الفكرة .. فكرة تشتيتالذهن ما بين هنا وهناك .. ولما خلااااااااص يقول يمكن قدر علي التآلف ده ... يقوم تاااااااااني يحصل إنشطار تاني ويجي الإنشطار التالت ....
تخيلوا معاي فقط ... العضو ده حيعمل شنو ؟؟؟
مش حيمشي ويعمل ليه منبر تاني براه علي قول الولد الرباطابي الـــ ( مأفون) ده
لأ بالعكس ... بل ممكن يعمل شوية هدنة ما بينو وما بين دخول المنابر دي كلها ... ربما يقدر يتحامل علي نفسو ويتوقف نهائياً ... لكن ده ما بيتو الأصلي ... كيفن يقيف ويفوتو ؟؟ حيمشي وين يعني غير إنو يعود ليه ...
بس ... شئ مُحزن بالجد جد .. شئ محزن ومُؤلم حقيقي ..

ويبقي السؤال ..
لمتين تقيف فصول الإنشطار ؟؟؟
معليش لو دوشتكم بما أُحس وأشعر حقيقةً وربما قد خاني التعبير في بعض ما ذهبت إليه ... لأجل أن أعبر عن ما يجيش بداخل عضو فقد بوصلة التواصل مع الآخرين والآخرين ديل هم أهله ( من لحم ودم كيبورده)
شكراً لحسن قراءتكم جميعاً وأعتذر مرة أخري لبثي هذه المواجع الخاصَه جداً هنا عبر العام