اقتباس:
المشاركة الأصلية كتبت بواسطة الرشيد اسماعيل محمود
سلام يا جليل..
خلينا نلجأ للمباشرة.. ونبدا نمسك في عضم الكلام:
كدي أدّينا نماذج لبوستات تمّت مصادرتها عشان الكلام ما يكون مطلوق ولا يستند علي معايير.. وبعدين عميقة دي منو البيحددها.. كدي تعال ياخي نوّرنا وبالمرّة ورينا عايز تقول شنو من الاساس.. أطرح رؤيتك للأمر بشكل واضح ونماذج واستدلالات.. عشان ما نلف وندور في حلقة مفرغة ونضيّع زمن ساي..
أنا كقاريء وعضو بهمّني الإستدلال.. عشان أتأكد من الحاجات بشكل موضوعي..
- جيب لينا نماذج لبوستات عميقة تمّت دسدستها أو مصادرتها.. .؟
- قول للأعضاء.. البوست الفلاني تمّت مصادرته بواسطة الإدارة..
- والبوست العلاني قامت الإدارة بحذفه سااااي كدة بس..
إنت شخصياً عندك عدد اتنين بوست كانن محل شد وجذب.. وهما كالآتي:
بوست النفزاوي:
آي تمّت تحويله في دورة المجلس الفائتة.. وهو بوست إباحي في رأيي لا يختلف عليه اثنان.. بوست في رأيي لا يحمل مضموناً ولا معني..(حسب رؤيتي)..
وشتّان ما بين العمق والإباحية... لو إنت شايف إنو عميق.. انا شايفو اباحي وباهت جدّاً.. وكونك تهيج في الناس وتصنفهم لظلاميين وغير ذلك.. دة ما موضوع بالنسبة لي، ولا يغيّر من حقيقة الأمر شيئا..
غالبيّة الآراء طالبت بحذف البوست.. وسلكت مسلكاً ديمقراطياً في مطالباتها وأنو البوست يخدش حرمة شهر عزيز في معتقدهم.. واللائحة تقرّر إحترام المعتقدات.. والديمقراطيّة هي رأي الأغلبية كما تعلم وأعلم.. طيّب المشكلة وين هنا..؟
ما عندك غير ترضخ لرأي الأغلبية.. ودي ياها الديمقراطية البتنادي بيها..
في حاجة اسمها استبيان يا جليل.. إنت ممكن تطالب بجمعية عموميّة.. وتعمل استبيان للأعضاء عن:
هل توافق علي مواضيع اباحية أم لا توافق...؟
لو التصويت طلع لصالح الموافقة.. بالأغلبية.. شوف لو الادارة ما سمحت بذلك.. الديمقراطية المُفتري عليها دي.. جلابيّة واااسعة.. الموضوع ما كوار يا صحبي.. ولا قوّة راس من الإدارة.. في لوائح منظّمة.. تسري علي الجميع..
البوست التاني خاصتك هو بوست خلف المنبر.. المعلومة العندي يا جليل إنّك إنت من طالبت بحذف البوست تقديراً لأشياء كثيرة، ومطالبتك كانت عن قناعة تامّة.. وبحضور أعضاء هنا.. ولكنك تغالط كل ذلك وتأتي لتقول بعكسه.. وأن الادارة هي التي قامت بمصادرته دون أن تقول انت بذلك.. وفي ذلك اتهام خطير يا صاحب.. انا لا أستبق الحوادث .. ولكن لكل حديث وقته..
أراك توحي للناس بأن الادارة تقوم بالمصادرة ورؤيتها قمعية للأمور.. لكن لكي تثبت حديثك هذا.. يلزمك الاستدلال يا جليل.. بدلا عن توزيع الاتهامات يمنة ويسرة ..
متين يا جليل كتبت عن البي أحمر ديل وفي زول قال ليك لأ نحن ما بنرضي..
عليك الله جيب لينا نماذج.. عشان الكلام ما يكون نفخ ساي.. وقول لينا البوست الفلاني عن الحريات.. تمّ منعه.. البوست العلاني عن الديمقراطية.. تمّ منعه.. وهكذا.. وما تخمّنا بالكلام الكُبار الحماسي دة.. الطب اتطوّر يا صحبي.. بقي الكلام يلزمو دلايل وأسانيد.. لكن والله كلام كلام ساي كدة ما اظن زول يقتنع بيهو..
كلامك عن المصادرة والدسدسة دة من غير استدلال بعناوين بوستات تمّت مصادرتها ودسدستها.. بيبقي إتهام للإدارة من غير دلائل.. عشان كدة وحاتك يا قريبي أنا بيهمّني الإستدلال الدامغ.
في انتظارك..
بجيك تالت.
تحيّاتي مُرفقة..
ملحوظة:
مصادرة بوست.. تعني حذف البوست بشكل غير لائحي.. أمّا كلُّ ما قالت به اللائحة.. لا يُسمّي مصادرة.. لأنّ المصادرة هي التغوّل بغير حق(وتُقرأ لائحة)..
|
شوف يارشيد ..
أنت ليس وصياً ولا نبياً ..
انا لم أكتب (الروض العاطر) الذي تعتبره إباحياً، كتبة النفزاوي وهو شيخ دين معروف ، كتبة رجل دين في قرون سلفه، و يعتبره اباحياً السلفيون الجدد مثالك (يا رشيد) ونحن هنا لنكشف عنكم، بوست النفزاوي تمت مصادرته بالفعل و قرار تحويله للمكتبة ( مصادرة ملتويه) وفيها جبن إن أردت. هذه واحده. الثانية من أنتم يا رشيد حتى تعتقدون أن تصنيفكم للكتاب انه (اباحي) هو يقيني وقاطع و (إلهي) يعطيكم حق (مصادرته)، انت وغيرك من السلفيين الجدد المغلفين بـ (الليبرالية) تتهمون رجل دين كالنفزاوي بالإباحية وتصادرون كتبه وتبررون لذلك، أليس في المصادرة أياً كانت مبرراتها وأد للديمقراطية والحرية – أم أن لك تفصيلة تخصك لمفهوم الديمقراطية والحرية – هذه واحده –
ثانياً : أين هو (بوست) خلف المنبر ، إذا لم تتم مصادرته.
انتظرني – يا رشيد (لأدلق) لك هنا المداولات التي تمت بصدده بيني وبين إدارة المنتدي والرسائل المتبادله بيننا – وانت تعرف ذلك جيداً- وكيف إن الإدارة (دلست) عليه وصادرته ... عشان تاني ما تجي تقول نفخ ساي – وعبارات زي ما تخمنا بالكلام الكبار ...
انا ح انزل هنا – المراسلات التي تمت بيني بين الإدارة – عشان الناس كلها تطلع على العقلية السلفية المحتالة التي تدير المنبر – شفت كيف يارشيد .. وسأذهب معك إلى أقصلا حد ممكن في هذا الحوار.
لكن قبل كدا تعال وقول رأيك – ليه تزوغ جاي وجاي. أنت ما عندك رأي واضح في وضوع الحريات و في الذين يستخدمون ( سودانيات بيتنا) فزاعة لإخافة الآخرين، ليه ما عايز تقول رأيك بوضوح. قولو. وأنا بجيب ليك المراسلات فوراً. حتى لو قلت رايك بورك كيف يتم الإحتيال على الأعضاء بعبارات مثل ( حولناه للمكتبه) و ( حولناه لمنتدى الإداره) ودي كلها اساليب اجترحها السلفيون الجدد لتمرير مصادراتهم وجعل المنبر نادي لسفاسف الأمور و ولدي نجح وبتي عيانه، و اللمة وين الليله، إنتو يا رشيد عايزين تهدموا المنتدى بوعي أو بدون وعي. تصادروا الحريات بدعوى الاباحية والبيت بيتنا، ولو اتفقت معك على اباحية النفزاوي فهو رجل دين وفقيه وقاضي شرعي (إذاً) يا رشيد من هم الاباحيون، ثم سأعود مجدداً.