مِقشِط و محنفِل {ترويح التائه}
يا أخي ديل عِبارتين عجيبتين ساحِرتين
وطالما الواحِد بقى ما عارِف (يحنفِل) متين فبِاللهِ تأملوا معي طعامة مقشِط ومحنفِل ديل
وشوفوا طلاوتِن وحلاوتِن في اللِسان
وعلى النقيض تماماً:
يفلِس .. مفلِس / يقرِش .. مقرِش
فيها إيحاءات ما كويسة عديل كِدا وبعدين هن ذاتِن فيهِن جرس مزعج
فيا سلام علي مقشِط ومحنفِل، الاتنين بِدنك إحساس دافئ وحميم
وبعدين شنو
ما بتحِس مع (محنفِل) بي عظمة ولا مع (مقشِط) بي إحراج
دمهن خفيف جِنس خِفة
موش
بس وحات الله مقشِط دي على حلاته وطلاوته
في الأمر الواقع "وأعني الجيب و جيب" شِينه شنه مُرة..
مِن الله خلقني بريد ضُل الضِحى
المعنى لا حنفلةً تفوِت بي
ولا قشيطةً تجرِسني مِتل الجِرس دي
داير اقترِح عليكم صندوق إسفيري (وأخص الأُمة المُتحِدة: بيتنا "كيتن في الولد جلجلة النسى يكتب لينا حاجاتو الطاعمة البتفرحنا") كل دولة وناسا
وأنا (وماني متعوز، أي يا اخي مالك) شخشياً –بتبرع سخي- بتولى ليكم موضوع السعودية، بِاللهِ ما ينط واحد ويقول لي أنا عندي حساب يا (السيد مقشِط)
بسويهو الحِساب ما مُشكِلة تب (المُشكِلة أِنكم ما توافقوا على اِقتراحي)
المهم
النفر 100 ريال شهرياً (بس) (والعايز يخلي الحكومة والأولاد يشتركوا ما في مانع - زيادة الخير)
ويتم تحويلها على حسابي رقم ".................... قريباً بعد موافقتكم"
وشنو الصرفة الأولى لي و التانية لحِكومتي الموقرة والأولاد نشوف الموضوع دا في الدورة الجديدة {إن بقتن في دورة جديدة} - هي نان بقترح مجاناً كدي
وعلى بقية البلدان تنظيم أمرها {ما خصاني علا بدور حق براعة الاِقتِراح}
ويلا بالصلاة على النبي دايرين تثنية و تحويل على طول
ــــــــــــ
أوقع وأحول لي أول 100 ريال (واحد يلحقنا بصورة 100 ريال سعودي)
الأثنين 4/1/2010م
التعديل الأخير تم بواسطة بله محمد الفاضل ; 30-07-2011 الساعة 07:49 PM.
|