[رأفت ميلاد]

المشاركة الأصلية كتبت بواسطة حسين عبدالجليل
الاخت سماح :
القادمون من تخوم الموت من الغربيين يؤكد معظمهم بأن أهم درس تلقوه في رحلتهم نحو الضفة الأخري هو أهمية العمل الصالح .

و ماالدين حسب بضاعتنا التي ردت الينا الا إيمان بالله و عمل صالح .
شكرا علي طلتك البهية .
تحياتي .

سلامات يا فردة
عندى مزاج مناكفة كده .. زمااان فوتها ليك لامن قلت:

المشاركة الأصلية كتبت بواسطة حسين عبدالجليل
أكثر مالفت انتباهي في قصص ال NDE المسجلة في الكتب التي ذكرتها سابقا هو أن معظمها قد حدث لاناس غربيين مسيحيين – و الركن الاساسي في الدين المسيحي هو الايمان بعقيدة الخلاص . قصص أؤلائك الناجين من الموت تكاد تخلو تماما من أي سؤال عن ألايمان بتلك العقيدة- ولكن كل قصصهم تقريبا تتحدث عن مبدأ المحاسبة علي كل صغيرة و كبيرة و علي أهمية العمل الصالح .

الكلام ده ما كده ياخ .. الأهتموا بالظاهرة وتابعوها فى الغرب .. نحن ما عندنا ناس بتابعوا الحاجات دى .. يا كفروهم .. يا أتهموهم بالجنون أو وصفوهم ناس فارغة

بجدية أكثر .. نحن ما عندنا متابعة كاملة لـ(الحياة) .. ولا نستفيد بـ(جدية) بحوادث سابقة .. فقصة (الكوما) عندنا الوفاة .. حتى فى أفضل المستشفيات .. فلا نلجأ لآجهزة الموت السريرى العالية التقنية .. فقط (فالحين) فى تكفير الخواجات .. عندما يطالبوا بشرعية رفع الأجهزة ..

نتوكأ بـ(الإيمان) بقتل موتانا .. ولا أدرى كم الأحياء دفنا .. أذكر حادثة من كثير .. عن إمرة فى (الحاج يوسف) لدغتها عقرب .. وغابت عن الوعى وصار نبضها شبه متوقف .. حضر (المؤمنون) وقاموا بالواجب حتى غسلها وتكفينها .. حضرت (ممرضة) جارة لهم للعزاء .. بعد العزاء أبو دمعتين ونهنهة داك .. سألت (المرحومة مالا .. أمبارح لاقيتا نصيحة عند الجزار) ونوعية الكلام ده .. لامن قالوا ليها قرصتا عقرب .. أتنفضت زى المجنونة وقالت العقرب ما بتكتل زول .. قامت وراسا ألف سيف إلا تكشف على المرحومة .. تصدى ليها (المؤمنون) .. ولا يجوز كشف الكفن .. ويمكن رجعوا لى قصة سيدنا سليمان بتاعة مخير ديك لكن المرة عكليتة وهجمت على الكفن .. غايتوا بأم أضانا بس دفنتا فى صدر المرحومة .. وكوركت (فى نبض ضعيف .. أدونى شنطتى) .. طبزت ليك المرحومة حقنة البتنشط القلب ديك .. وحاتك الحجة بعد نص ساعة كانت قاعدة مع الناس ..

الحصل .. البكا بقا عزايم .. والدموع بقت قهقهات .. لا فى زول سألا من الـ(NDE).. ولا لوموا (المؤمنين) .. فالقصة ما نصارا ومسلمين .. الموضوع (أوسع) من كده

أوسع دى حأجننا جن .. ملطوشة من ود جبرا

تعرف فى سويسرا .. يتم الدفن فى اليوم الثالث .. فسألت عن الدواعى الطبية لذلك .. قالوا فى الوقت الحالى لا توجد أسباب مقنعة .. فالعلم أصبح يحدد الوفاة بدقة .. ولكنها أصبحت عادة مقننة منذ أكثر من 200 عام .. حيث تم دفن أحدهم .. وصدفة سمع شخص كان يمر صدفة بالمقابر .. طرق يأتى من قبر حديث .. فأستنجد بالناس ونبشوا القبر .. وفتحوا (الصندوق) وجدوا المرحوم حى .. وصارت قانون .. غايتوا نحن فى ود اللحد ده يردموهوا تراب .. كان حى يقطعوا نفسو

معليش للتخريمة وليس (الفتلة) يا بلدينا