آسيا كيف حالك
الموضوع دا انا اتكلمت فيهو كتير والبدايه كانت في سودانيز اونلاين لما الدكتور احمد القرشي كتب في بوست الحزن في الاغنيه السودانيه ان الاغنيتين مسجلات في الاذاعه السودانيه باسم مسعد حنفي لكن هو مقتنع انهم من كلمات ابو صلاح وقتها انا كنت ماعضو في المنتدى لكن وبمساعدة الصديق العزيز الموصلي حصلت على العضويه ورديت على الدكتور ونشرت الجزء الخاص من مذكرات الوالد الخاص بالموضوع دا وهنا في سودانيات انا فتحت بوست في نفس الموضوع وكتبت فيهو عدّة نقاط بتحسم الموقف وطلبت من اي زول عايز بتكلم في الموضوع دا في الاول يرد ويفند الكلام بتاعي ولكن بصوره علميه ومنطقيه بعيدا عن التعصب والمهاترات ومااظن وقتها في زول قدر يكذب كلامي او الكلام الموجود في المذكرات
بس الغريب اني كنت في السودان قبل سنتين وقابلت بدوي ابو صلاح في اتحاد الفنانين بالصدفه وهناك اكتشفت المصيبه الكبرى من خلال سؤال سالتو ليهو وهو انت بتعرف ان الاغنيتين ديل كرومه لما غناهم في حفلات الاعراس غناهم على اساس انهم من كلمات ابو صلاح مش مسعد حنفي لانو اصلا مابيعرف مسعد حنفي وهنا كانت المفاجاه والكلام دا دار قدام شهود وقتها جاوب بدوي لا مابعرف وطبعا لو قال اي عارف تبقى المشكله انتهت لان المنطق بيقول لو صح الكلام كيف ابو صلاح يدي مسعد جنفي اغنيتين يقوي بيهم ديوانو ( للعلم مسعد حنفي ماعندو ديوان) والاغاني دي في الاصل كل العاصمه المثلثه بتعرف انهم من كلمات ابو صلاح انا وقتها اكتفيت بالسؤال لاني اكتشف ان الزول الواقف قدامي زول جاهل ومافي داعي اني اضيع وقتي معاهو
وموضوع ان القصايد موجوده عندو بخط ابو صلاح ماغريبه وانا رديت قبل كدا على النقطه دي وقلت ابو صلاح قدم الاغنيتين لكرومه على اساس انهم من نظمه يعني ماممكن يديهو القصايد بخط مسعد حنفي ومن الطبيعي يكون محتفظ بنسخه بخطه وممكن تكون هي ذاتا النسخه القدما لكرومه وزي مافتحي قال ليك الكلام دا كلو دار زمان قبل تسجيل الاغنيتن في الاذاعه في حياة ابو صلاح وابدا ماحصل انو رد على الوالد وكذب كلامو مع ان الناس عارفه انهم من كلماتو حسب ماهو وارد في المذكرات
موضوع الديوان انا قلت قبل كدا الوالد ماعندو ديوان لكن ليهو عدّة قصايد نشرت في كتاب امير الاغاني السودانيه ومن ضمنهم الاغنيتين وللعلم الجمع الكتاب واشرف على طبعه هو الوالد والكتاب هو السبب الرئيسي لمعرفة الوالد بابو صلاح والكتاب طلع واغنية وجه القمر سافر في اوج عظمتا وكل الناس عارفه انها لابو صلاح هي والناعسات عيونن نور جبينن هلّ يعني مافي رجاله اكتر من كدا يعني مسعد حنفي يتحدى ابو صلاح وينشر الاغاني ضمن قصايدو والناس كلها عارفه انهم كلمات منو وكمان لما الناس ماتقتنع بالكلام دا يقوم بنشر اعلان في جريدة ملتقى النهرين ويتحدى فيهو اي زول يدعي ملكيته للاغاني وطبعا قاصد ابو صلاح وابو صلاح مايرد وتاني يتحداهو لما كتب القصه كلها في مجلة هنا امدرمان بطلب من المبارك ويتم ارسال نسخه من المجله لابو صلاح عشان لو عندو اعتراض يعترض قبل التسجيل ويسكت ابو صلاح مره تانيه وبعد دا يجي ناس بس لمجرد حبهم لابو صلاح يالفوا قصص ماليها اي سند منطقي ويحاولوا بشتى الطرق يغيروا التاريخ ظلما وعدوانا .
بالمناسبه كل القصص الاتقالت والحتتقال وتتعاد كل يوم مردود عليها بموضوع الاغاني اتغنت باسم ابو صلاح قبل نزول الكتاب في السوق وبمعرفة ابو صلاح
ودلوقت لو في اي زول داير يدخل ويتناقش في الموضوع دا من الاعضاء الاشتركوا قريب احسن يمشوا يقروا البوست القديم براحه وبعدين يكتبوا الدايرنو وانا حاضر للرد على اي كلام بس ياريت الكلام يكون منطقي هادي وياسلام كمان لو في زول عندو دليل يثبت ان الاغاني دي كلمات ابو صلاح والله العظيم انا مستعد اسافر السودان وامشي الاذاعه واطلب تغيير اسم الوالد باسم ابو صلاح ويادار مادخلك شر.
ان شاءالله اكون اوفيت الموضوع حقو ولو عندك اي سؤال او استفسار انا حاضر انتي تامري .
|