[حجة امنة]

المشاركة الأصلية كتبت بواسطة حافظ حسين

عندنا ست في الحلة خلقة الله كضااااااااااابة و ناس الحلة بسموها (يسرية)..تيمناً بالمذيعة يسرية محمد الحسن ... أها مع الكضب جنت و بقت تتكلم كتر ... مرة مشيت الحلة لاقيتها ليك في الشارع لابسة نظارات شمس أها قلت ليها:
شنو يا بت عمر النظارات دي ... بقيتي تحبي من ورانا و لا شنو؟
قالت لا و الله يا ولدي أنا ما عملت عملية في سنار...
سلامتك يا خي
الموضوع مفروض ينتهي لحد هنا... لكن أصلاً انا عندي زمن كتير ما عارف أعمل بيه شنو ... و قلت مالو ما نتونس بس سألتها ليك:
أها كيف كانت العملية إنشاء الله تكوني ما هضربتي يا بت عمر و فتيتي ناسك القدام؟
بت عمر: لا و الله يا ود حسين أنا أول ما وصلت المستشفي بس ماسكة الذكر (إن نخاف من ربنا يوماً عبوساً قمطريراً)... و الله قمتريراً دي ما نطقتها صح لكن ما متذكر النطق كان كيف...
أنا: تمام و الله يعني ما في اي هضربة؟
بت عمر: ما في لكن النقول ليك... أول ما الحكيم جاء... و أنا خلاص لبسوني و حضروني للعملية.... أها أول ما جاء خاشي قرا الأورنيك طوالي وقف علي طولوا و قال للحكماء الصغار المعاه:
أمنة بت عمر بت سلطان داجو؟
دايريني أعمل عملية لبت سلطان داجو بدون كيته؟!!!
يلا أمشوا هسي جيبوا سلاح الجيش (ما بتعرف سلاح الموسيقي)
أها بلبسي حق العملية داك طلعوني و النوبة تدق و شي صفافير ... عظمة عاد ما بعدها عظمة
سيروني تلاتة شيطان (شيطان دي من شوط)...و أنا ماشي قدامهم... طبعاً قلدت مشي الضباط و الكف الموازية للوجه تحية...
بعديها دخلوني العملية و الحمد لله هسي بشوف

القصة دي يا محمد حكتها لي بت عمر دي و نحن واقفين في الشمس قرابة النص ساعة...

دي لاحقه واحده حبوبتنا *** الله يرحما , مرة جات لي حبوبتي حاجة امنة الله يرحمنا كلنا
حبوبة *** : هيي يا امنة أختي ما سمعتي الحصل؟
حاجة امنة : أهاااا
حبوبة *** : قالو اليومين ديل في بعاتيه حايمة في الحلة !
حاجة امنة : سجم امك , خلاس أرجعي بيتك قوبال ما الواطة تمغرب و تلاقيك البعاتيه تنجمك .
أساسا حبوبة *** كانت معروووفة بالجبن
اها أثناء ما هم بيتكلمو سمعتم عمتنا مكشكشه كدا إسمها **** , قامت جرت سريع لبست ليها توب أسود و نكشت شعرا و إتلبدت لي حبوبة *** في لفة بيتم , جنب بيت بيبيعو فيو الفحم و اساسا في إشاعة إنو مسكون .
جات حبوبة*** ماشه و تتلفت قامت **** فجاءة طلعت ليها من ورا حيطة الجالوص المهردمة و قالت ليها : اوووووو(صوت مخيف)
حبوبة ***: وووب علي,الليلة عاد يا البدوي,يا منجد العيان,سجمي يا سيدي الحسن
**** قالت جرت لانها خافت من الجماعة الندهتم ديل ما يسختوها
اها حبوبة *** بدل ما تجري بيتم جات راجعه تاااني لي حاجة امنة !
حاجة امنة : بسم الله مالك ؟! لاقتك البعاتيه ؟
حبوبة *** : أريتا يا بت امي كان لاقتني , لاقاني شيتاً مافرزتو , راجل أسود
طوييييييل قدر ما رفعت راسي ما حصلت راسو , و الساعة ال لطشني أم كف , لمن وشي بقى بي ضهري , و قام إستعدلو لي بي كف تاني , و لمن ندهت شيوخي و الأولية الصالحين طار يا بت امي في السما !!
النهاية