[خال فاطنة]

المشاركة الأصلية كتبت بواسطة حافظ حسين

خال فاطنة كل سنة و انت طيب و عبرك أزجي التحية لصاحب البوست و السادة المتداخلين .... كدي نجي لكلامك دا بطريقة قيس في الترقيم:
(1) عضو يكتب متحرراً من الثقافة: أن كان كلمة الثقافة دي شاملة و هنا تفتقر للضبط لكن نمشيها و بعديها نسألك فهمك شنو انت للتحرر يا صديق... ما بتتفق معاي أن الانسان وقت يتحرر من شئ ما, هذا الشئ ما بكون شغله الشاغل... يعني حسبك منطق المكلوج دا أن أمة عربية ذات رسالة خالدة اكثر الأمم تحرراً من قضايا الجنس, لانهم أكثر الأمم حديثاً عن الجنس كما قال عنه عبدالرحمن منيف....
(2) فكرة غريبة نقيس النجاح بمدي الانتشار اللحظي أو بعدد الكلكات و الا لكانت جريدة الدار أنجح الجرايد السودانية.... و كل المجلات و الجرائد الفضائحية هي التوب نجاحاً.... بالله حاول تتطور أدواتك أكثر فيما يختص بقصص النجاح دي

(3) الكلام دا ما سليم علي عواهنه يا خال فاطنة .... كتب شنو البتحظر بس لانها فيها إيحاءات جنسية و الا ما كان راهقنا بإحسان عبدالقدوس و غيره, الكتب يا صديقي بتحظر في هذا العالم الذي تسميه عالمنا (الاسلامي), تحظر لانها بتهدد الكهنوت و راكد الثقافة لكن كتابة زي كتابة أم التيمان دي ماشة في الخط زي الترتيب......
(4) برضو كلامك مفكوك ساي و ما كل الكتب الانتشرت انتشرت لانها حظرت و الا كان كتابات نوال السعداوي كانت التوب من حيث المبيعات....

(5) دق كيبورد ساي

يا حافظ إزيك ياخي ...ذكرتني واحد كدى في حلتنا، لمن تقوم عكة في الحلة بيشيل عكازو و بيلكم من طرف...لكن ياخي حباب الدفسي المتل دا...
أول حاجة شكلك قريت مداخلتي بي نضارات صنعت عداساتها في النخيل بتاعتك دي..و ذلك للآتي:
أولاً أنا ما قلت يتحرر من الثقافة! قلت من عُقد الثقافة، و المقصود ب (عًقد) هنا كلما هو ممنوع أو غير مُحبب وفقاً للثقافة، و تحديداً العبارات الجنسية بإعتباراها تابووو....
ثانياً:بعدين التحرر الأنا قاصدو ( عشان ما تنقز ليك في إيقاع ما موجود)، هو التحرر من كون الحديث في الجنس تابووو..و كون الزول يتحدث في حاجة هي تابووو إجتماعي و ثقافي معناها تحرر من العقدة دي (أي عدم التحدث)...
ثالثاً: أنا ما قلت البوستات بتاعت أم التيمان ناجحة لأن مشاهداتها عالية، إطلاقاً دا ما كلامي. أنا قلت بالحرف الواحد (هذا في تقديري سر نجاح بوستاتها على مستوى المشاهدات و الإنفعال بها) النجاح المقصود محدد إن في ياتو بعد، و الكلام دا ما عندو علاقة بجدوى البوستات علمياً أو معرفياً أو ما شابه من تسميات...يعني أنا هنا ما قلت المشاهدات هي المعيار الحاسم لنجاح البوستات....
أما فيما يتعلق بدق كيبورد دي بتفق معاك فيها 100%، ببساطة لأن ما قاعد أدق في نوبة