بسمك اللهم
سلامات يا ناس
اسامات مشكور علي مواصلة جوابات ست الدار بس يا ريت بعد تنتهي من بقية الأجزاء تنزل النص كامل في مكان واحد لسهولة متابعته .
ست الدار بداية كاتبتها كانت العام 1981 ، وحسب معرفتي اول مرة قرأها حميد في جامعة الخرطوم العام 1982/ 1983 ، وشارك في امسية شعرية هو و الأستاذ قدال والأستاذة نجاة بنادى أمبدة الحارة الرابعة العام 1984 ( الجمعية الخيرية لأبناء الحجير والمقل ) وأظن النادى لديهم تسجيل بذلك . شخصيا أنا سمعت شان الشوق بت سرنا ترقص ولم اسمع الشول إلا هنا ...! هنالك مجموعة من أصدقاء حميد الذين لديهم معظم كتابات حميد في تلك الفترة يمكن الرجوع للنصوص الموجودة لديهم نحو محمد عبد الرحمن شقل ، سليمان الجمرى . أخونا اسامة حمزة ممكن يساعد في الحتة دى . أما بخصوص انتاج النص مرة أخرى أخونا اسامة حمزة من أكثر الناس معرفة وتوثيق لهذه الفترة ومعه أمثال الأستاذ عوض الماحي والأستاذ وراق المجذوب ...الخ ونص ست الدار أعيد نشره بجريدة المشاهد في الفترة من 13 مايو 2006 وحتي السابع والعشرين من ذات الشهر
يا أسامة حمزة النص بجريدة المشاهد صور بت الجنفاوية
اسامة معاوية شوف المحل دا
الشيء فلم .. مسلسل الشيء شنو ..؟!
عدسة حميد تحير
دنيا هطيطي
وصبرا سجرى
ناس باشين في البذخ الكم
وناس دايشين في العصر الحجرى
الناس في الفيها
قمار بي جيهة وطار بي جيهة
والطنبارى مجيهة جيهة !
والنسوان
غاطسات لاضنيها
ومره يدعن ومره نديهة
البيت غنمو القوى يوم داك
الرفض الطاعة البقى ينكرفن
وكل راس ساعة تخش صينية
وراء صينية وراء صينية
أول كفوا الخواجات ومعاهو الباشا
الترجامة
وناس أغراب
بعدو العمدة وصمد الساقى
ديش المجلس والمشروع
عقب الطلبة
وباقي الناس حتى الشفع والحروم
ستة خرفن
وفي فد يوم ...؟!
ضبلانين ينشافوا فتارى
وزى الخيل وكت نقارة
تارى مروة الزول ماب تكمل
سرنجماته تمل تنضارى
بت ود برنو
حلنقابية علي بت بارة
حليلو
يا من سحرك يا نقارة
خدم الباشا ملوك الدارة
الدهشان حدر طاقيتو
شان خواجي أداهو سجارة
ود الخير ودّر يوميتو
النخفور عافصلو حمارة
فاطني مخمخمى
علب البيرة
قالت بيها حلات شُرَارة
خواجات والحلى سكارة
لي حفيت التمر العاول
باب حوش سيدى
فتح خمارة
وبت فرحين
وشوق شدتلها ست جرارة
ود الفنجرى فوق راس بصو
وصاقع بصوا
الكجر اترصوا
الهموبتية النصرانية
تشب وتقرصو !
جعفر يرطن والخواجي
داق الكف والباشا يبشر
وعمى طريم زى عادتو مكشر
المحجوب اومالو مأشر
كفت الكمرا
وراح متعذر
عصب الحال في البال
اتدوزن
ضر يا باشا نسايمك هبن
ويا خواجة زمانك لبن
شيخنا محمد قالب حسو
طه مكفكف وحازم نصو
وموسى الفطقة مودر شبطو
وفطة عكفة مع الخواجة
الخواجة يقوم
هو يصفق
ساعة يقعد
عكفة يصفق
يرطن يسكت
طق طق
الخواجي طلع يتسير !
عكفة وراهو
براهو يصفق
قام العمدة
وشيهو أتغير حمر فيهو
عيونو وطير
صفق عكفة
العمدة أتحير
إنت مصلفق ..
ضحكوا الناس
راح ناط ومصفق
عكفة الحال
الأمو تشفق؟
ود معيوق وأب نالة
انغلطوا
في أقوى الجان
ولا الإنسان
أقوى الجان
لا أقوى الإنسان
وقاموا انشمطوا؟!
وحاج عثمان ينقندف
وكان أول يوم في عمر الزاوية
إنو تقيل دون آذان وإنو الناس
ما صلوا جماعة
الناس في الفيها
ستة خرفن وتيس انصفن
ستة خرفن وعيش مردوم
شختها بختها بت كلتوم
تسكت تخبز طول اليوم
لامن حرقت الكفّاى
قنبت المسكينة تدعي
الله يصرف الخواجات
لا في الليل السقا
يشولت
واطات الله دى
ست رشاها
مافي غنوة
ما غناها
مافي مدحة ما سواها
حمارو صبح لحق أمات طه
كفرن وسبّ الأمريكان
ستة خرفن
وتيس انصفن
بوشا مرق الجوة مدفن
جنس بدع
زولك دا يحير
يمزع توب فوق توب
ويغير
توب الفلهمة
تلقى يجرجر
توب الدين شفاف وقصير
عند الجد كان أدا
ينقنق
وكت الفارقة
يشيل
ويبعزق
صدقة كرامة
شهامة احسان
الله حي والعبد حنين
اذكرت كلامك لي
انو في ناس لاعبين بالدين
وناس لاعبابة
الأمريكان
الله يصرف الصرفي كان
ماخلوني
نشدتك منك كيفن حالك والخرطوم
معز أحمد عبد القادر