بالمناسبة، ردّي دا راح تلاتة مرّات، لتكالب ( العدا ) عليّ قبال أعمل ارسال، فأبدا من أوّل وجديد، المرّة دي كان أبا أعفي ليّ بللاي.
أهن،
يبدو جليّاً انّو الناس دي كانت خالتة جنب البحر بالليل على ضوء القمر
كما أسلف عمّك سيّد عبعزيز: )
بعدها، تجلّى في وصف المحيط المكممل بنغم العود طبعاً، ولو انّو أنا في رايي دا ماوكت غنا
بعدينك مايخمنا ساي، أنفاس الزهر بريء تماماً من حالتو الشكلو جاي بيها وزادا المعاو أو ربما، المعاو هو الوصّلو المرحلة دي..والحقيقة في بطن المصور.
"بالله يا الباسم الوديع خلينا لي وقت السحر"
واضح جدددن انو الدامة استوخرت الوكت أو اتدلعت وادّعت علشان صاحبنا يحنّسا وقد كان طبعن.
"الطقس صحو في جو بديع لا فيه برد لا فيه حر"
صراحتن كدا، الحنك ميّت..لو جادّة مابقعد غايتو أنا..الا بحنك حسّي مصاحب
ومحتمل يكون اتغاضى عن وصفو لاسباب معروفة
"غنيني أنشودة الربيع فصل الربيع ياما سحر
رفرف على الأفق الوسيع واسمع تسابيح النهر
داك البحر اسمع تسابيح النهر"
هنا طبعن هوبة، ملعوبة بحرفنة ومحسوبة وتعجب شديد
وواضح جدّا انّو دامتنا عذبة الصوت زيي تمام كدا
بعدين لفتتو للبحر ودعوتو للرفرفة وسماع التسابيح، تكسر أمنع الحصون في الجو السابق ذكرو، أحسن الاستغلال هنا لدرجة اني كمستمعة بقعد اتبسم براي وكأنّي المعنية: )
توسع الابتسامة مع وصفو لحين وصوله هنا:
"نشوانة .. من خمر الفنون السامية ما نشوة سكر"
مصدقنّك ياخ!
"حلو الحديث حلو التبسم والنظر
حلو طرفك الزانو الحيا وجمع التناعس والحور
أدخل على قلبي السرور ونثر على سمعي الدرر
ونغمك يا حبيبي يسكرني وأُنسى آلام الدهر"
يعني هو زاتو زولة بالمواصفات الشكليّة والروحيّة دي مابتسكّر، أنا خنساء دي كان قعدت معاها بسكر، خليك انت
"غرود عيونو وغنى ليّ .. من الجديد المبتكر
ميل مع صوتو الحنين .. في غاية الحيا والحذر"
الحرفنة الأعلى كما يتضح هنا لينا احنا
واحنا دي نابت عنّنا طبعاً الزولة الحوصا دي "حور"
قال ليك جابت ليها تِغرْوِد كمان
وغنا ورقيص
الحيا معروف، لكن الحذر دا..اعتراف بائن بانّو صاحبنا منّو جفلة.
"وانا من طربو بنطرب نشوان أقول يا للقمر
حبيبي أمل النفس والشئ المنتظر
إنت السعادة بأكملها يا أرقى أنواع البشر
إنت السعادة بأكملها يا ملهم الحب للبشر"
عاليه، عااادي بتقال في لحظات السكر بأنواعه،
ما ضروري أكون عرفتهم كلّهم، حكوا ليّ أهن؟
أما دا:
"أنا مالي ومالي ومال كدا
انا انا انا مالي ومال كدا
يا حبيبي مالي ومال كدا
اللـيل هـدا ونـامو العِـدا
سـاعة الـوصـال ما أسعدها
بنـحب بـعض دي مـؤكدة
عـندّك تـمام ولا مـش كدا؟
(كدا كدا وكدا كداكدا
يا حبيبي مالي ومال كدا)"
فأعلى هرم النشوة ياخ!
ان شاءالله تقع منو ياتارق
فيتلقفك "العدا" شامتين
قول يامين!