البوست ما وصل صفحه 100 ، وماجد ما لكزني لحدي هسي ، لكن بجي ناطًي بعد ده.
يابنج محاولاتك لإلصاق فرية معاداة لحزب الشيوعي السوداني للدين ضعيفة للآتي ذكره
1- محاولتك لقراية ما تحت السطور تقراً متبوعه بالحاجه البتقراها.. كان الأفضل يا ماجد بدل ما
تحمًر الحاجه الإستعصت عليك كان تقول أنا رايي إنها كده وكده..أها أساعدك شوية يابنج.. بعض الحاجات الإتوقفت فيها على ما أذكر ( الأديان الإفريقية ، الدجل والخرافة ، التطرف ، والهوس الديني ) وبعيدا عن سياق الحاجه الوردت فيها..
الأديان الإفريقية : على سبيل المثال لا الحصر الإسلام ، المسيحية ، الوثنية ، ، إلخ
الدجل والخرافة والشعوذة : الزار ، الكجور ، قراية الغيب/ الودع ، إلخ
أ- ورد ذكر الأديان الإفريقية متبوعاً بإحترام الحزب الشيوعي السوداني لتلك الأديان الإفريقية
ب : وردت الخرافة والدجل والشعوذة كمثبطًات تعطًل وظيفة النقد العقلي للبني آدم ، والحزب الشيوعي أولاها مساحة من عندو و بيعمل على معالجتها.
ج : التطرف : تشكيل عالم صغير في مخيلتي بيخصني أنا ده بس ، مافيهو مكان للتاني..
د : وإذا لبس التطرف ده لباس ايدولوجي ديني ، بيتعاظم كرهو للتاني لدرجة إنو يهدرو من محيطو العايش فيهو
2/ لدكتور عبد الله الكتير من المواقف النقدية للحزب الشيوعي ، البتفق وبختلف فيهو مع بعض جزئياتو.. إلا إنو المقتبسات التم تداولها هنا ، بتخص شوقي ، والقضاء بت في أمرو قبل كم وكمين سنه وبرأ الحزب الشيوعي منو
3/ الواقع البيعمل فيهو الحزب الشيوعي السوداني بيختلف عن واقع روسيا وعن واقع دول كتيره.. تركيبة الزول السوداني أشبه ما تكون قريبه للتصوف.. فهل يعقل يابنج ، إنو حزب ليهو أكتر من نصف قرن وقدم شهداء كتار في سبيل الحرية والديمقراطية يطرح برنامج يعادي فيهو الدين ؟
الحزب الشيوعي ماعندو مشكلة مع السماء يابنج ، مشكلتو مع الزول القاعد في الأرض ده البيكتل ويعذب ويغتصب ويسجن ويسرق وبيعادي السماء لأنو غرقان لقفاهو بالمحرمات ، شفت كيف الحزب الشيوعي ده صديق السماء كيف
4/ مداخلتك الأخيره دي رخيصة شديد يا ماجد.. ما لقيت ليك وثايق تدعم بيها فرضية بوستك ده.. مشيت موقع ( اللادينيون) جبت ليك موضوع ما عندو علاقة بالبوست بتاعك.. هسي عليك دينك الحزب الشيوعي السوداني علاقتو شنو بمداخلتك الأخيره دي ؟