وبعد الشعار والذى منه ..............
( آدم متحمس ... وسعيد .....
اخذ دش بارد ..... ويقف امام المرآة والمشط فى يده ........ يصفر .....
ويغنى بصوت خفيف ... يعلو احيانا .... هو لم يكن يحس بأغانى عثمان حسين ... لكنه اليوم يحس لها بطعم خاص .........يا ربيع الدنيا ... فى عينيا .. يانور قلبى ....والمشط يتحرك داخل شعره فى حركات بهلوانية ...
( الكاميرا فى مكان بعيد ............
والدة آدم ... جالسة وهى تقطع فى بصل وجارتها قاعدة جنبها .....
= هى ياختى ولدك دا ما داير يجى يعرس ؟
- والله ياختى على كيفو ..... فترت من كلامى معاهو ... يا ولد تعال عرس .. بت عمك مستنياك .... مافى فايدة ...
= انتى ما خليتوهو يختار براهو ... عيال الزمن ديل ... يقولو ليك حب .. وما ادراك ما الحب ... تذكرى نحن زمنا ... الراجل ذاتو ما كنا بنشوفو الا فى غرفة النوم ...
- ( تضحكان ) اوهو كان غرفة نوم ؟ ... الله يجازى محنك .. يالتومة ...ما كان برش ... وواطة .... هسة دخلو ليك اوضة وسرير دبل ... وحاجات بالشىء الفلانى ....بس انتى عارفة ... آدم جاهز من كلو ....بس هو الما داير ... وكل ما يجى نزرو يقوم يغشنا لامن يسافر ........... انا ا..
= لكين ياختى انتى دايرة بت اخوك واختك دايراهو لى بتها ... وعمو حالف طلاق .. وعمو التانى ... وهو مسكين يرضى منو ويخلى منو ....
(الكاميرا فى غرفة آدم ..........
بعد ان ربط حزامه وتأكد للمرة الالف من قشرته ... للمراية تانى ... اللون دا مناسب والا لا ... يخلع النظارة ويلبسها للمرة العاشرة .. حتقول عميان ....
وحبة الشيب دا .. بسيطة .. نغطيهو بالصبغة .... اوه لكين هى ما شافتنى امبارح ... ياعمى .. خليها على ربك .... الواحد يتفنجر كدا وبعدين كلو يطلع على مافيش ..... بس انا عندى احساس قوى انو دى ...نجاة دى ..حقتى انا ... انا وبس ... لا زال فى فرحته ... لايحس بما فى الغرفة من اصدقاء ..
واخيرا ينتبه ..وهم يصورونه بالفديو .......... وهو يطاردهم ....
( الكاميرا فى مكان امه .........
= عارفة يا التومة انا قلبى دا فرحان الليلة فرح ......
- ان شاء الله دايما ..........
= وآدم دا دايما فى بالى ... هسه اول امبارح دى سهام بت اختى جات سألت منو ... وبراحة كدا قالت لى فى زول متقدم ليها ... تعمل شنو ... تقبلو والا ..........
(الكاميرا مع آدم وهو يمشى نحو بين ناس نجاة ........
الشارع يرقص معه ..........
يحاول ان يقلد نفسه ..........
كيف سيسلم عليهم فردا فردا ... وعليها هى بالذات .....
كيف سيحادثهم ..... وكيف سيكلمها هى بالذات ............
كيف سيبدأ الموضوع ...........
هو قرر ان يكون كلامه اليوم ..............
خير البر عاجله ...............
ولو قنا بكرة يمكن يجى زول تانى يخطفها .....
الليلة يعنى الليلة .............
طيب هو معقول الزول طوالى من الباب للطاق كدا ..........
المواضيع الزى دى دايرة صبر ولازم هم يعرفوه كويس ........
يابوى انا حأتقدم وبعدين يعرفونى بى راحتهم .............
لا يحس الا ويده فى جرس باب الشقة ؟
الى اللقاء فى الحلقة القادمة
|