[فتحي مسعد حنفي]

هو الصيف وصل ياجماعة؟قالوا دايما مع فواصل الفصول بتكون في زوابع وخاستا احنا في شهر أمشير بالقبطي..
موضوع ناصر دا زي مواضيعي أنا وزعلاتي البتوصل لي اعتزال ثم رجوع عن الاعتزال زي محمد مرسي
أسمعوا كلامي وخلو ناصر في حالو عشان الابتعاد عن سودانيات شيئ من المستحيلات ودا ما عشان سودانيات أروع منتدي سوداني علي أسافير السجم دي لكن عشان علاقات الناس فيها بقت علاقات عائلية وما أظن في زول ممكن بي سبب زعلة يشطب عائلتو من حياتو حتي لو شالتو الهاشمية في بداية الزعلة..
تخيلو أنا لما أمشي السودان بجيني المطار أحمد محمد زين وهو البسفرني وفي خلال قعادي في السودان لا يمكن يمر يوم ما نتقابل فيهو وهو الصباح لامن يكون ماشي الشغل بيعدي علي ونمشي سوا بغض النظر أنا قاعد وين,في بحري ولا أمدرمان ولا الرياض أو المعمورة.. ولامن أمشي ليهو في المعمل بقابل د.الوليد وشوية شوية ناس سودانيات يبتدو يتوافدو.يعني باختصار سودانيات أصبحت هي عائلتي الحقيقية النستني أصحابي وأهلي..
كدي خليكم من ناصر البقت سودانيات محور حياتو تفتكروا في زول بقدر يعمل بطل ويقاطع سودانيات وبالذات لامن يكون زي ناصر أحد الأعمدة الرئيسية لسودانيات..
كلمة أخيرة ليك ياعزيز: ياخ انت مشكور نشرت الرسالة ووصلت الأمانة وحقو ما تفترع أي حاجة جانبية مع أي زول تاني والعايز تقول ليهو حاجة رسلا ليهو في الخاص عشان ما نطلع عن هدف البوست الحقيقي ونقعد نطيب في خاطر زول..