سودانيات .. تواصل ومحبة - عرض مشاركة واحدة

طارق الحسن محمد · 22-12-2006, 04:30 AM

اقتباس:

من كان منكم بلا خطيئة....حزب الأمة؟؟
________________________________________
رحلة البحث عن الشين

أنا شوقي بدري أنصاري بالنشئة والتربية نشأنا وكل ما حولنا ينطق بالأنصارية والآن وأنا لست بالشيوعي أقول بملء فمي أن الشيوعيين يعدوا في مجموعة شرفاء السودان لهم حسناتهم وغلطاتهم مثل الآخرين واجهوا كل الوقت ولا يزالوا يواجهون اقسي التحديات . لا يصير الإنسان شيوعيا إلا إذا قرر أن يطلق الراحة والدعة وراحة البال (والترطيب) .
المتوقع من الشيوعي أن يضحي وان يكون متجردا وان يتقبل النقد ويمارس النقد الذاتي
من المؤكد أن كثير من الشيوعيين يشتطون ويحتدون في عداوتهم لان المخاطر والمواجهات التي يواجهونها يوما خاصة في أيام العمل السري تتطلب مقدرة عالية من الانضباط والالتزام والتضحية . وعندما يتقاعس البعض او يغير جلده يكون رد الفعل قويا وأكون كاذبا إذا قلت أنهم لا يمارسون اغتيال الشخصية والتجريم والتجريح ككل قطاعات المجتمع السوداني.

المؤلم جدا أن الجميع مطالبين بمقاطعة ومعادات الشخص المجمد أو المحارب ولكن هذا ليس برنامج الحزب وهدفه في الحياة . فعندما يقررون تطبيق الشريعة الإسلامية لا يفكر الناس إلا في الحد والقطع والجلد والسجن والتعذير .
الشيوعيون والذين هم مدرسة مهمة من مدارس الاشتراكية يدعون إلي العدالة الاجتماعية والوقوف مع حقوق المرأة والقضاء علي الظلم والتفرقة العنصرية والشوفينية ،وكل ما هو جميل ، أوروبا التي تقف الآن أمام أميركا وستكون القوة المخلصة من السيطرة الأميركية تحكمها الأنظمة الاشتراكية . والكلام علي أن الاشتراكية قد انتهت هذا كلام خاطئ فالاشتراكية تكسب وستكسب كل يوم وهاهي لاتين أميركا قد كسرت أغلالها . وصار مونرو دوكترين في حكم المنتهي .
وهذا خط سياسي استراتيجي رسم بعد الحرب العالمية الثانية جعل لاتن اميركا منطقة نفوز امريكي لا ينازعوا عليها.
لقد كثر الهجوم مؤخرا علي الحزب الشيوعي السوداني وممارسة الشيوعيون لاغتيال الشخصية نعم لقد حدثت تجاوزات بخصوص اغتيال الشخصية . ولكن ليس هذا خط سياسي شيوعي يدرس في مدرسة الكادر .
اذا كان الشيوعيون قد مارسو قتل الشخصية فقد مارس حزب الامة قتل البشر .

لقد اعتدي علي الأستاذ عبد الله رجب رئيس تحرير وصاحب جريدة الصحافة وهو العصامي الذي علم نفسه, و تعلم الانجليزية بنفسه ومترجم وثيقة حقوق للعربية وخلق مصطلح أهلنا الغبش، ومحمد احمد دافع الضرائب وسمي الأبيض عروس الرمال وعندما لم يرعوي تقرر قتله وهاجمه تيم كامل من أشداء حزب الأمة بقيادة صديقي البناء ياء الدين (ود فاطنة) وتركوه لأنهم حسبوا انه قد مات وذهب (الدين) للسجن بتهمة الشروع ف القتل السبب أن الأستاذ عبد الله رجب أورد اسم الصديق المهدي الصديق أفندي عبد الرحمن المهدي وهذا هو اللقب الرسمي لكل من تخرج من كلية غردون . وزعم أن وصف حفيد المهدي بالأفندي إساءة . صديقي الدين كان من سكان ود نوباوي لا يصلي ولا يمارس أي شعائر دينية ويرتكب كل موبقات الأرض.
في بداية سنة 1963 تعرض العالم المعروف السراج زوج والدة الصادق المهدي لعملية قتل بشعة فلقد قطع إلي قطع صغيرة وهو لا يزال علي قيد الحياة ولقد سمعت من الدين انه يعرف أولاد الأنصار الذين قطعوه وان الشيخ السراج يستحق القتل وأكثر لأنه تطاول علي أهل المهدي.
في سنة 1956 اعترض المحامي شمس الدين عبد الله بدوي علي احد قرارات الهادي المهدي او في الحقيقة لم يبدي رضائه التام فاحل والده العم عبد الله بدوي دمه فهرب المحامي شمس الدين من الجزيرة ابا وعاش منبوذا خائفا طيلة حياته .
احد أبناء الغرب واسمه كلول لم يقبل يد احد أبناء المهدي فسمع والده واحل دمه
لقد أتي حزب الأمة بجموع الأنصار عدة مرات إلي الخرطوم في 1954 الأول من مارس وقتل رجال البوليس وكثير من الأبرياء احدهم ميرغني عثمان صالح لأنه كان لابسا أفرنجي وعندما صرخ أخيه بعد ذبحه ده أنصاري كان الرد إلي جنة الخلد وعندما طالب الوزير ميرغني حمزة من أزهري أن يقدم الصديق المهدي إلي المحاكمة هلع الأزهري وقال له أنت جنيت؟ وقدم آخرين منهم الأمير نقد الله الرجل الشجاع وتقبل الحكم بشجاعة ثم الغي الحكم بعد الاستقلال وصار وزيرا للدفاع ووزيرا للداخلية . الفيتوري الذي لا يزال عائشا كتب قصيدة لم تعجب رجال حزب الامة فبعثوا بأشداء حزب الأمة وكان الفيتوري قد هرب من الجريدة وتدخل السر قدور الأنصاري زميل وصديق الشاعر الفيتوري المعروف
واتصل السر قدور بالفيتوري قائلا الناس ديل حا يكتلوك . تسوي ليك قصيدة سمحة تشكر فيها الأنصار وبعد يومين ننشرت قصيدة في نفس مكان القصيدة الأولي تمجد الأنصار . افيتوري ولسر قدور لا يزلا عائشان .
وكما ذكر الفيتوري في مقابلة تلفزيونية قبل سنتين أن الصادق المهدي قال له أنا لو ما كنت راجل ديمقراطي كنت أرسلت ليك ناس دقوك
الإنقاذ ذاهبة إذا أردنا ديمقراطية يجب علي كل حزب أن يلتفت إلي أخطاءه قبل أخطاء الآخرين

التحية
شوقي

اقتباس:

المتداخلات والمتداخلون .. لكم التحيه
يا بابكر مخير الشايقى غلبك ولا شنو ؟ ما قلتو انصار , يا زول ما تحمبك انا بمسك ليك ايدينوا وانت صارعو . الخليفه عبد الله مش قال شينين ما بنصروا الدين الشكريه والشايقيه , خالد دى كمان شيوعى .
الشيوعيون يغلطون ولكنهم يحاسبوا وبشده . بابكر ذكر ان الزعيم التجانى حاد فى تعامله وهذه حقيقه عشتها انا فلقد واجهت النهير والهرش . ولكن هذا لم يزد الا فى احترامى للزعيم التجانى , فلقد كان حادا حتى عندما كان مدرساً فى مدارس الاحفاد . لكن فى بعض الاحيان يحتاج الامر لحسم . والايدو فى المويه ما ذى الايدو فى النار . ولقد عشت وشاهدت انواع من المسخره والدلع فى شقه الزعيم التجانى فى القاهره بدأت بالمرضى العاديين وطلاب المنحات ودلع وتطاولات الفنان محمد وردى , والزعيم التجانى يتلقى الاساءه والتجرح ويتحمل .
الشيوعيون يراجعون ويعاقبون بغض النظر عن مكانهم ومركزهم . ولكن الصادق لا يراجع ولا يجروء احد ان يفكر فى معاقبته لاى غلط او خطاء , وهنا المشكله .
فى سنه 97 كان الزعيم التجانى يشتكى من ان المصريين قد رفعوا تذكره الباص الى 15 قرش وهو والآخرون يتعلقون فى البصات . ولقد عشت قصه محاكمه وتشدد مع الرجل الجنتل مان دكتور عبد المنعم عثمان الاستشارى الاقتصادى وخريج تشسلوفاكيا لانه اعطى شخص الف جنيه مصرى وأظن لطباعه بعض الاوراق ولم يرجع الشخص الفلوس او يقوم بالمهمه .
عندما كنت اسكن مع الخال محجوب عثمان فى شقه العجوزه الصغيره كان يتواجد معه دائماً بعض المناضلين . واذكر انه ذكر انهم قد اخذوا مقلب بعد رجوعهم من احد الاجتماعات بانهم ركبوا باص سياحى والتذكره كانت 25 قرش .
الخال محجوب عثمان حضر ماشياً وبالجمال والمراكب الى ان بلغ الحدود المصريه . وقام المصريون بارجاعه فرجع ماشياً لوحده وكان عندما يستيقظ فى الصباح يجد آثار الضباع حوله . وعندما انهار من التعب كان يدفع الصقور عنه بعكازه . واغمى عليه فوجده احد الرعاه ودرجه نحو النيل ليشرب . ورجع الى امدرمان ثم عاد الكره مره اخرى .
الزعيم التجانى الطيب بابكر قام بهذه الرحله . وكما كان الخال محجوب عثمان يقول فى ان سروال الانسان يتخضب بالدم لان سرج الجمل يقطع الجلد والعمليه مؤلمه . الزعيم التجانى لم يستطع الركوب وحتى عندما اشاروا لعظام من ماتوا فى الصحراء لم يقدر ان يركب . واخيراً لفوه ببطانيه وربطوهو بجانب الجمل . كل هذا بسبب الانقاذ ورجال الاخوان المسلمين اللذي أتى بهم الصادق . ولقد استقال الدكتور الفاضل عباس حسن من حزب الامه وهو الآن محاضر فى جامعه الامارات والسبب كان تحالف الصادق مع الترابى وسيطرة اسرة الصادق المهدى وبطانته على الحزب وهذه الاستقاله نشرت فى الصحف فى ديسمبر 1988 .
يا بابكر ويا العمده فى حاجه محيرانى . ما هى عقدة الصادق من الترابى ؟ لماذا يهرع كلما فرقع الترابى اصابعه ؟ الماسكو الترابى على الصادق شنو ؟. الصديق رفض زواج الترابى من وصال وقال فيه أكثر مما قال مالك فى الخمر . الترابى نشاء ودرس فى رفاعه . ما مارسه الترابى فى رفاعه وفى حنتوب يخجل اهل سودوم وعموره .
فى موضوع بعنوان الله والوطن والحق نشر فى 96 فى عدة صحف حتى الراى الآخر التى تصدر فى تكساس كنت اقول ان الديمقراطيه لم تتركنا ولكن نحن اللذين تركناها واذا أتتنا فماذا سنفعل بها وقلت فى الخمسينات كان لاعب الكوره التقر يصرخ بسليمان فارس ( السد العالى ) ها ها ها . ولكن السد لم يمرر الكوره للتقر . وبعد نهايه المباراه سأل التقر لماذا ؟ فقال السد بلهجته المصريه ( تعمل بها ايه يا تأر ) .
الآن نبكى على الديمقراطيه اكثر من بكاء شعراء العرب على الاطلال ولكن اذا رجعت الديمقراطيه المسكينه فماذا نعمل بها ولها .
كلنا قد اخطأنا ومن كان بلا خطيئه فليرمنا بحجر والجميع يحتاجون لغسل لان الجنابه السياسيه تتملك الجميع من اليسار الى اقصى اليمين .
فى اجتماع 15 نوقمبر 1958 خرج عبد الله خليل غاضباً ولم يرجع حتى بعد ان ناداه السيد عبد الرحمن عدة مرات يا عبد الله يا عبد الله وسلمها للعسكر .
شيخ العرب ابو سن كان من اعضاء الحزب الجمهورى الاشتراكى مثل سرور رملى , يوسف العجب , مادبو , الدرديرى نقد , مالك ابراهيم مالك , محمد خير البدوى , مكى عباس , وزين العابدين صالح وآخرين. ثم تفرقوا وصار ابو سن وزيراً فى الديمقراطيه الاولى وكان ابناءه حموده وعبد الله بمثابه اشقائنا وحموده درس معنا فى مدارس الاحفاد وعندما صار ابو سن عضواً برلمانياً فى الديمقراطيه بعد اكتوبر كانت امى تقول له . انت الثلاثين سنه ما تميتها . والشيوعيون كذلك قد اتوا بمصحف وكتبوا عليه بالعمار تاريخ ميلاد واسم قاسم امين وزادوا سنتين لان قاسم امين كان وقتها فى الثامنه والعشرين وقدم المصحف كوثيقه .
وكما ذكر لى شقيقى خليل ابراهيم بدرى بانهم بزعامه ابن عمنا الرباطابى احمد الفكى مالك الذى كان يمثل الطبقه العامله وهو صاحب محل الفول فى شارع العرضه انهم كانوا يأتون ببعض الناس لكى يصوتوا لعبد الخالق عده مرات وعندما توقف ابو حسبو للتدقيق طلب منهم مالك ان يضربوه فهجموا على سيارته فهرب . الترابى أتى بالمحلول الذى يزيل الحبر الذى يصبغ به ابهام الناخب حتى لا يكرر عمليه الانتخاب . ولهذا يقول اهل المؤتمر الشعبى اليوم . أسألوا الترابى عن التزوير . لان رجال الجبهه اعتقلوا فى منزل فى برى وهم يمارسون عمليه غسل الاصابع . مسكينه الديمقراطيه .
ابو حسبو كان شيوعياً فى الاول ولهذا وجد تعنتاً وكثير من الاهانه فى بدايه مايو عندما قدم للمحاكمه بوصفه وزيراً للاستعلامات خاصه بواسطه زين العابدين وابو القاسم . وعندما أتوا بمولانا محمد صالح عبد اللطيف وكيل الوزاره للشهاده . قال ان ابو حسبو برئ لان المسئوليه تقع على عاتق وكيل وزاره وليس الوزير فطرد محمد صالح من الوزاره .
فى سنه 1963 طرد مولانا محمد صالح عبد اللطيف كقاضى جنايات امدرمان لانه رفض ان يحاكم فاروق ابو عيسى واحمد سليمان للمره الثانيه بالرغم من اصرار حكومه عبود .
هذا الموضوع كتبته وكنت اسكن مع محجوب عثمان فى العجوزه واقابل الزعيم التجانى باستمرار وكثير من الشيوعيين لم تتغير المعامله او اجد اى عداوه .
فى سنه 1906 طلب ارتين باشا مفتش التعليم الارمنى من بابكر بدرى ان يكتب تاريخ السودان وبعد ان ملاء سته كراسات ضخمه طلبه الشيخ محمد البدوى واستلم الكراسات وطلب رجوعه بعد حين وعندما رجع مزق الشيخ محمد البدوى الكراسات واحرقها وقال لبابكر بدرى . انت ما بتعرف السودانيين ما عاوزين يعرفوا الحقيقه . الكلام ده كان طلع حيقتلوك . وغضب بابكر بدرى ولكن الشيخ ود البدوى كانت له مكانه عظيمه . وكتاب حياتى لبابكر بدرى لم ينشر كله . فاللجنه التى كونت بزعامه الاستاذ محمد شبيكه والاستاذ عبيد عبد النور وآخرين حذفت الكثير . نحن السودانيون نكره الحقيقه .
نحن اولاد الانصار بنقول الحقيقه كان لينا ولا علينا . وانا القائل
ديمه بنقول الحق حتى اللكان بوجع
ما بهمنا الحاكم ومن كلمه ما بنرجع
والدنا عبد الله البنا يقول
كل من صادقنا اخونا وكل كبير قومه ابونا
________________________________________
يا خالد
يا أخي أنا بقيت لما أفتح البوست بقيت أحاول أتاكد هل أنا سيد البوست ولا إنت
زي ما بيقولوا (قلت ليك اكل لكن ما زي ده) ..
وأنا ما كنت عارفك لابت ليك بي عكاز مضبب
يعني ده كلو مدكنو ولابت.

لمعلوميتك ومعلومية الجميع في فرق ين كيان الانصار وحزب الامة
حزب الامة يضم كل شيئ إنتهاذيين ونفعيين وأصوليين وسياسين كما يضم شرفاء واهل النقاء والوطنية.
وفي كثير من الاحيان كان قادته من غير الانصار. فعبد الله خليل اول رئيس وزراء لحزب الامة لم يكن انصاريا
ويرجع اصله الي دراوة في جنوب مصر ومحمد صالح الشنقيطي يرجع أصله الي مورتانية وهو رئيس أول جمعية تشريعية ورئيس البرلمانات الاولي
بوث ديو كان نويراويا من مركز فنقاق غرب النوير.
محمد علي شوقي الذي سميت عليه كان من المواليد.
والمحجوب بالرغم من ان جزوره انصارية لم يك انصاريا وكثيرون .

كما كتبت في الجرائد وفي المنتديات وكما قال ابن العم دكتور سلمان بدري رحمة الله عليه عند زواج ابنته
لدكتور علي قاسم مخير شقيق دكتور بابكر مخير وسأل المأذون عن الصداق ومؤخر الصداق وكان رد سلمان بدري ويوسف بدري مافي مؤخر صداق نحن أنصار وعندما أبدي البعض استخفافه كان رده الانصارية (Life stile) والانصاري ثلاثة ميمات متجرد ومقدام ومعطاء وكنت أنا شوقي بدري اقول متواضع
فلهذا يا خالد الحاج تأكد من أن دكتور بابكر عندما كان يخدم الضيوف في الفاشر كان علي درب والده البروفسير إبراهيم قاسم مخير الذي يقف علي ضيوفه ويخدم ويتعامل مع الجميع كأنهم خيرا منه علما ومكانة ويشهد منزلهم شارع الجمهورية رقم عشرة الذي كان يؤمه الغاشي والماشي
ولقد رفض البروفسير إبراهيم قاسم ويوسف بدري الانضمام لحزب الامة وحتى عندما أخذوهم لمقابلة السيد عبد الرحمن بوصفهم اول حملة الشهادات العليا وأولاد أنصار وجد إبراهيم قاسم هو يعقوب جراب الرأي والامير مخير امير البادية امير الزيادية . ولهذا قلت عندما مات الدكتور قاسم مخير شقيق بابكر الذي تأثرت به في حياتي :
قاسم اهلك ابدا ما كلتو وللدنيا قالوا عدي
ما قرتهم ولا همتهم اخدوها زراعة دقندي
كان رست ادو وان عارت ما بيقولولها حاو
السمسم الصافي اللاشربو عنتد ولا خالطو الجوجاو
ود مدينة الفي اللمة والحفلة كانت براها رتينة
ابراهيم قاسم الامير خيرك وعلمك ما للكبير وصغير

(زراعة دندي= زراعة مؤقتة بدون امتلاك الارض)
(العنتد =حشرة تشرب السمسم)
الجوجاو = الأوباش)

هذه كانت أخلاق الأنصار وطريقة حياتهم .
والأنصارية هي طريقة الحياة السودانية القديمة التي رسختها وطورتها المهدية وخلقت االإنسان المقدام والمعطاء والمتجرد والمتواضع والاخيرة اهم شيء لا يكذب ولا يسرق حق الاخرين. ويقول الحق كل الوقت إذا كان له أو عليه
يا عصمت العالم أنت تعرف قدر تقديرنا لوالدتنا الحاجة أمينة رحمة الله عليها. في يوليو 1966 وأنا في الأجازة كان الناس يحضرون لزيارتي ولا يجدوني وكنت كل الوقت مع صديقك وتوأم روحي بله .فقالت والدتي بله شنو بله ما حرامي فذهبت اليه مباشرة في شارع الاربعين وقلت له امي قالت انت حرامي يا يكون كلامها صاح والبيناتنا انتهت يا تكون المرا دي غلطانة ونصحح ليها غلطتها وبعد ساعات من المجادلة وافق بله علي مواجهة والدتي واتضح انها سمعت من صديقك الطيب سعد الفكي الرباطابي عندما سألته عدم حضوره مع بله ان قال: بله اتسلف مني قروش وما عايز يرجعها عشان كده ما بنتكلم مع بعض . فأفهمها بله بأنهم كانوا يلعبون الورق في منزل يوسف مصطفي أمباشي الحريقة وانه قد خسر مرتبه عدة مرات والطيب كن الرابح ولكن بعد وقت تغيرت الامور وارجع للطيب فلوسه وصار الطيب مدان له، فاعتذرت له والدتي وقالت أنها كانت متألمة لأنها ظنت أنه موظف براتب ضخم والطيب مسكين قاعد في مكنة خياطة في برندة السوق.
المواجهة الصراحة والوضوح أوضح الأمر وبله والطيب الذين تعرفهم يحمل أبنائي أسماءهم ، الأنصاري لا يكذب ولا يسرق حق الناس.
لقد واجه الصادق المهدي هجوما في منزل العميد يوسف بدري بواسطة حسب سيدها زوجة بابكر مخير وأحمد كوري شقيق بابكر وكما اوردت كثيرا لقد قالوا للصادق بالحرف الواحد يا تكون إنت عارف ود عمك مبارك بيسرق ودي مصيبة يا تكون ما عارف انه بيسرق ودي مصيبة أكبر. هذه هي أخلاق الأنصار.
وعندما حاول مبارك المهدي أن يرشي المهندس أحمد قاسم مخير برخصة مواسير رفضها ولهذا نجد رجال الانصار الحقيقين خارج مجموعة الصادق المهدي انه يجمع حوله من يطبلون ويقدسونه ولا يعارضونه .

البروفسر ابراهيم قاسم مخير والعميد يوسف بدري كانوا مقدامين معطاءيين متجردين ماتوا ولم يمتلكوا اي شيء من متع الدنيا ولو ارادوا لكانوا ممتلكين لمصانع الدواء ويجلسون علي رؤوس الشركات فالاثنين ماتا وكل ملابسهم لا تملا بقجة لم تكن يدهم تلامس المال لعشرات السنين كانت زوجة يوسف بدري سارة موسي وزوجة ابراهيم قاسم مدينة بدري يستلمون مرتباتهم وفي نفس الوقت كان يوسف بدري يقف امام تغول زياد ارباب وزير حزب الامة (الغير أنصاري) والذي كان يناصب يوسف بدري العداء ويحاول ان ينتزع الاحفاد من يوسف بدري ويضمها للحكومة خاص عندما صار زياد ارباب وزيرا في حكومة عبود . وعندما قابلهم يوسف بدري وهم خارجين من مدارس الاحفاد قال لهم بشجاعة الانصاري عندكم حظ انتوا جيتوا وانا مافي لانه ما كان سمحت ليكم تخشوا الاحفاد وعندما احتدوا مع العميد قال لهم التراب ده في خشمكم والتراب ده نحن بنعرفو بنمش فيه وبنينا فيه بيوتنا . وإن كان يوسف بدري لم يبني بيتا في حياته .
من الانصار الحقيقين الامير نقد الصغير الحالي ووالده عندما مرض الامير نقد في نهاية التسعينات طلبت من شقيقتي الهام أن تذهب وتعوده نيابة عني وعندما شاهدت منزله في ود نوباوي اللي هو اقل شأنا من بقية المنازل الاخري قالت له انا الان فهمت لماذا شوقي يرسل تحياته .

لقد أخطأ رفيق الصبا والطفولة عصمت العالم وبابكر فموقفهم كان موقف المتفرج عندما تخصص ود العمدة في الإساءة إلي رموز الحزب الشيوعي السوداني.
يجب ان نقتنع بأن الصادق المهدي ليس مقدسا ، يخطئ ويصيب وإن كان يصيب قليلآ فهو السبب في أغلب مشاكل لسودان ومات ويموت مئات الألوف بسبب أخطاءه وهو ليس بمعصوم.

ننطق بالحق وقت الخوف ولا نخاف فيه ضرب السيف

التحيه
شوقى

________________________________________

اقتباس:

السيد محمد حسن العمده
اراك تناديني بجدو ، هل انا جدك و انا ما عارف و لا القصد استخفاف ، لانو انا بعرف ناس كتير في السودان وسط المعاليه ، جعليين ، لكوجا ، مورلي، باريا ، فرتيت ، زاندي ، رباطاب ، ارقمه لكن الحقيقه لا اعرف عنك اي شئ .
فمن المتداخلين معنا ، الابن دينق مثلا انا اعرف اهله و ابنتي سابينا التي كنت اتوقع انها ولد قبل ثلاثين سنه كان المفروض ان تحمل اسم عم دينق . و المجموعه القصصيه الاخيره التي اصدرتها الهداء لجوزيف قرنق . كما اعرف روميو و هو عم لدينق . و لم اقابل الدكتور ياسر الشريف و لكني اعرف الكثير عنه و عن اهله و عن ال المليح في الابيض و امدرمان و اماكن اخري و اعرف منه اسامه الخاتم . و اعرف الدكتور جني و اعرف ابو الريش و اعرف اهله في الشماليه و اعرف عبدالماجد يوسف من الدامر و اعرف جده يوسف معرفه شخصيه . و لسنين عديده كانت عيوني مركزه علي عمة مجذوب يوسف عم عبدالماجد لانه كان يجلس امامي في الفصل و اكن كثير من الود و الحب لمحمد الفاضلا و اعرف عنه الكثير و اعرف الكثير الكثير عن الخاتم عدلان و اهله . و اعرف بنت الخال نورتاور و لنا اقرباء مشتركين في كادقلي و في امدرمان و في اماكن اخري . فهل انا جدك حقيقه ام ......؟
.................................................. .........

هذا جزء من مداخله طويله مع السيد محمد حسن العمده , فأرجو ان لا يتأثر اى انسان بما قاله وما سيقوله عنى ود العمده , فليشتم ويسب ويلعن . المهم ان يواصل معنا انا اظنه الآن فى حاله صدمه . فعندما اعطت الحكومه الانجليزيه السيد عبد الرحمن المهدى منزلاً فى العباسيه واعطته معاشاً خمسه جنيها شهرياً لكى يقتات بها كان يذهب الى السيد محمد البدوى لكى يتعلم . وكان للسيد محمد البدوى لا يبداء الدرس حتى يحضر السيد عبد الرحمن . وقبه الشيخ البدوى على بعد خطوات جنوب منزل السيد عبد الرحمن . وعندما احتج الطلاب الآخرين على المعامله الخاصه كان ود البدوى يقول لهم ( ده لو فهم الدين بينعدل الحال وبيأثر على الثانيين . ) فأتركوا ود العمده فى حاله .
لقد قلت فى صيف 1982 فى مؤتمر المصالحه المصغر فى بادنقتون بحضور الدكتور عز الدين على عامر وخالد الكد رحمه الله عليهم والاستاذ محجوب عثمان والدكتور الباقر محمد عبد الله وآخرين . ( نظام مايو فى نهايه ايامه وسينهار عما قريب . هذه الروح والاشاده بدور الحزب الشيوعى . والتآلف والمحبه تشابه الروح التى وجدت فى اكتوبر . ولكن بعد اكتوبر مباشرةً تغيرت النغمه وهوجم الحزب الشيوعى السودانى وطرد نوابه وقتلت الديمقراطيه بواسطه المتبجحين بحمايتها .......... الخ ) . فوجم الجميع وقال لى الدكتور عز الدين على عامر طيب الله ثراه . ( ما هو العمل السياسى كده انت عايز الناس ديل يدونا صك ؟ . ) . فقلت ( لا , بس نحاول نتذكر الروح دى والكلام ده , لانو النغمه حتتغير ) . وقد حدث .
هنا نجد بوست كامل كتبته الى الابن محمد حسن العمده , بعد ان كتب بطريقه استفزازيه عن ظهور نقد وتواجد الامن فى منزله . ثم ادعى كذلك ان بوسته قد حُذف لاسباب خاصه واعطى الشعور بأنه مستهدف . والحقيقه بانه كانت هنالك مسأله هكر ولخبطه . ارجو مراعاه طريقه الرد عليه , على ما اعتبره انا تطاولاً على نقد الذى اكن له كل التقدير . لدرجه انه عندما اتانى صوته معزياً فى وفاه شقيقى الشنقيطى وهو كان مختفياً قلت له ده كثير على وده شرف كبير . وبالرغم من هذا لم احتد فى ردى على الابن محمد حسن العمده .
.................................................. ..........................

((((يا ود العمدة , بوستك ده صفر الامام؟ . جنّنتنا يا اخى , ما كل الناس بوستاتا راحت . زمان فى أمدرمان الزول لامن يكون طالب حاجة ويلح بيقولوا ليهو ( طلبك ده يا اخى صفر الامام ؟ ) . عمنا .......... ضاقت معاهو , وكان نديما لدابى الليل أو الأديب عبدالله عشرى الصديق الذى كان مثل شقيقه متمكنا من اللغة العربية والانجليزية - وكافأ الملك فيصل عشرى بجائزة لقصيدة رائعة بالرغم من أن عشرى يرجع أصلهم الى أهلنا الشلك . والشقيقان جزء من جمعية الهاشماب . أحمد يوسف هاشم ابو الصحافة المحجوب البوص وآخرين - لدرجة أنه كان صديق للورنس العرب الذى حضر لزيارته فى منزلهم فى شارع الموردة جنب محطة كاس كمرى . والمنزل تحول الى طلمبة فى السبعينات . والعميد بابكر بدرى أورد فى سيرة حياته أنه شاهد عشرى ولورنس وهو فى الترام فنزل ولام لورنس لسياسة بلده الاستعمارية .

أها يا سيدى الراجل المصطرم طلب من عشرى ودبّج ليهو رسالة فاخرة قدمها للامام عبدالرحمن الذى كان مشهورا بكرمه , ولهذا يقال ( فاتحة أبو علوة بصرفوها عند ابو عبده) لأن السيد على كان يعطى فاتحة فقط . الامام أرسل رجل بورقة لعمنا باب الله الذى كان مسئولا عن المالية و مرافقا للامام . وهو قليل الكلام مثل ابنه الذى جاورنى فى الفصل فى الأولية وفى الأحفاد فى الثانوى .

الراجل استلم تلاتة جنيه . فقال له دابى الليل : ( كلامى ده ما بتاع تلاتة جنيه والامام ما بدّى تلاتة جنيه , فى صفر ضايع أمشى كوس الصفر ده ). فذهب الرجل فى الصباح الى القبة وكان يصرخ : ( أين صفر الامام ؟ أين صفر الامام؟ أريد صفر الامام . ) فاستلم سبعة وعشرين جنيه واعتذار بأن الصفر كان ضايع . هسى يا ود العمدة بوستك ده بقى صفر الامام .

أخونا كمال سينا طيب الله ثراه طلب من النميرى قائلا : ( أطلع يا ريّس .) فاعتذر جعفر بأن ليس عنده كاش . وقديما كان سينا متكفل بالعشا والعرقى , والنميرى كان كحّيته أو مكفّن ما بدفع . فنظر سينا لدكتور بهـــاء الدين وقال لجعفر : ( ما تسأل باب الله ) .

بخصوص نقد : يا سيدى نقد ظهر وكان بمشى بكيات ومناسبات . والبيت ده نقد أجّرو من واحد اسمه عبدالرحمن كان عارضو للايجار . ونقد وقع باسمه. وسيد البيت لامن قالوا ليهو البيت عاوزو نقد ما كان مصدق فى الأول . جيّت ناس الأمن دى كانت حرّارة ساكت ما مقصودة , والحرارات مرات أشد من العرس . نقد زمان لامن كان مدّسى فى أيام نميرى كان بجى لى اهله راكب جمل وملفح بتوب . وما كلّو شيىء فى السياسة بنكشف يا ود العمدة . هسى انتو ناس حزب الآمة قاعدين تورّونا كل حاجة . تفاصيل عملية ( تهتدون) لسه تعتبر أسرار . ما أذيع للناس يختلف عن الواقع .

وبالمناسبة نقد ما عندو بيت . البيت الكان قاعد فيهو زمان فى الرياض ده بيت ناس فايزة محمد الفضل بنت خال المناضلة فاطمة أحمد ابراهيم . وحتى الزعيم التجانى الطيب بابكر ليس فى امكانه أن يمتلك أى بيت , والبيت ( القدر الحال) بناه أخوه أحمد الطيب بابكر , وعبدالخالق ما كان عندو بيت غير بيت الورثة فى حى السيد المكى . ومش غريبة الناس تأجّر للشيوعيين . ضابط البوليس فارس كان مؤجر لناس سمير جرجس طيب الله ثراه فى حى البوستة . ونقد قبل كل شىء هو ممثل الخرطوم فى البرلمان . كما مثل عبدالخالق محجوب أمدرمان فى أكبر دائرة انتخابية فى السودان .

عندما قرر عبدالخالق محجوب الانتقال بجريدة الميدان الى منزل كامل لأسباب أمنية اتصل سمير جرجس بسيدة صاحبة منزل خالى وقدم نفسه كمستأجرللمنزل لجريدة الميدان فقالت السيدة سائلة : ( لسان حال الحزب الشيوعى السودانى؟) فتجنّب سمير الاجابة المباشرة . فتناولت السيدة جريدة الميدان قائلة : ( الميدان لسان حال الحزب الشيوعى السودانى؟ ). وقدمت له مفتاح المنزل مباشرة .

هذه السيدة القبطية هى والدة وداد التى صارت زوجة سمير جرجس الذى غادرنا قبل فترة قصيرة . وجد زوجة جرجس بالرغم من أنه قبطى ابن قبطى اسمه الكباشى لأن والده كان صديقا لصيقا بالشيخ الكباشى فى التركية . هذا هو السودان الذى نريده الآن يا ود العمدة .

قبل أن يبلغ الصادق الحلم كان الانسان يستطيع أن يرى من نهاية سوق حى الملازمين منزله تحت التشييد . فلم يكن فى المنطقة سوى منزل دفع الله الياس , عبدالقادر محمد أحمد , ودكتور محمود حمد نصر , ومنزل مهدى مسعود الحلو . أما منزل آل أبوالقاسم , والعم المغربى والد الزميل مزمل , وخليفة محجوب والد خبير الأمم المتحدة نجيب , ومنزل الجوازات الحالى , وصالح العبيد , والوزير بدوى مصطفى , ومستشفى الملازمين فلم يكن قد شيّدوا بعد . كما ترى فان رجال الحزب الشيوعى ليس عندهم ما يفقدوه سوى حياتهم أو حريتهم . ولهذا نحترمهم , ونحب ونحترم الأمير نقد . لأنه ووالده لا يزال يسكن فى منزل بيت ودنوباى ( بشرّامه وقرّامه) .

عندما غادر عبدالله نقد الى كندا قلت له مداعبا : ( والله يا الشيوعيين الماشين تخدموا الرأسمالية فى عقر دارها) . فضحك الحبيب وقال لى : ( أسرتنا كلها ما عندها متر واحد فى السودان , احتمال الواحد اذا اشتغل فى كندا يمكن يشترى ليهو قطعة أرض . الحبيب عبد الله نقد كان يعمل فى نهايه التسعينات فى المنطقه الصناعيه فى القاهره ويعمل عشره ساعات يومياً او اكثر وهو ليس بالرجل الذى يستمتع بقوه جسديه فائقه . .)

ود العمدة الكلام بتاع نقد ده بينى وبينك سرّانى بيهو واحد شيوعى . شايفك كاتلك حب الاستطلاع , لاكين ما تكلم زول تانى . وانت لو ما كنت ود أنصار ما كنت كلمتك . لك الود والتحية .
)))))) شـــوقى

.................................................. ................

بما ان ود العمده يستطيع ان يأتى بالتوضيحات والاجابات . محمود يريد ان يعرف .
1... هل محمد احمد عبد الله المهدى هو المهدى المنتظر ؟ . وهل كان سيدنا محمد صلى الله عليه وسلم قائد جيشه كما كتب فى منشوراته ؟. وهل كل من لم يؤمن به كافر يباح دمه وماله وعرضه ؟ .
الاجابه لا او نعم .
2... عندما ضرب هاشم بدر الدين الترابى فى كندا ذهب نساء من اسرة الصادق المهدى لزياره الاستاذ بدر الدين محمد عبد الرحيم فى امدرمان وطلبوا صوره لهاشم نكايةً وشماتةً فى الترابى . لان رجال حكم الترابى سجنوا الصادق وأهانوه وهددوه . الخ .. لماذا يهرع الصادق الى الترابى كلما فرقع الترابى باصابعه ؟ هل الترابى ماسك حاجه على السيد الصادق ؟ . لماذا يتناسا الصادق الاهانه ؟ . ولا يقبل البعض انتقاد الصادق ؟ نحن اتعس بلد الآن فى العالم بسبب سياسينا . الا يحق لنا ان ننتقد , او ان نملك الآخرين المعلومات التى نعرفها ؟.
انا والكثيرون سنكون من اسعد خلق الله اذا وجدنا جواباً . لان كثير من الانصار واعضاء حزب الامه يحسبون ان عندهم الحق فى التعدى على الآخرين وشتمهم وضربهم واسكاتهم والآخرين يحب ان يكونوا مأدبين . ولما لا فلقد كان عمر نور الدائم يقول البلد بلدنا ونحنا اسيادها والبيتكلم حنضربوا بالمليشيات . وما حنسلمها الا للمسيح الدجال وسلموها للشيخ الدجال . وبعدين الناس تزعل لمن يحصل نقد .؟؟؟؟.

التحيه
شوقى .....